Isẹ 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Osa rẹ Ohwo rọ Guọnọ Aghwanre vwo

¹ Ọmọ mẹ, wọ da reyọ eta mẹ ru wọ da sẹro rẹ irhi mẹ vwẹ evun wẹn,

² ru wọ da kerhọn rẹ aghwanre ru wo de rhiẹ udu wẹn phihọ kẹ erianriẹn,

³ e, wọ da sa pharhe vwo vwẹ erianriẹn, wo de bunu kẹ ẹruọ,

⁴ wọ da nabọ guọnọ kerẹ idọnọ efuanfon wo da vwẹ erhiori guọnọ kerẹ efe re sinu;

⁵ kẹsiẹye wọ ke riẹn otọ rẹ oshọẹdjẹ rẹ Ọrovwohwo na ku wọ mrẹ erianriẹn rẹ Ọghẹnẹ.

⁶ Kidie Ọrovwohwo na ye kẹ ohwo aghwanre; unu rọye ọye erianriẹn vẹ eruọ nẹ cha.

⁷ Ọ sẹro rẹ omamọ rẹ aghwanre na kẹ ihwo rẹ udu rayẹn dia ọsoso. Ekpọfia kẹ ihwo ri vwo evun ọfuanfon.

⁸ O muẹdia kẹ idjerhe rẹ uyota ọye re je sẹro rẹ idjerhe rẹ ihwo efuanfon rọye.

⁹ Kẹsiẹna wọ ke cha riẹn otọ rẹ ọvwata vẹ orhiebro kugbe orhiọsoso vwẹ idjerhe kidjerhe esiri ejobi.

¹⁰ Kidie aghwanre cha ro udu wẹn, erianriẹn kọ cha vwerhẹ erhi wẹn oma.

¹¹ Ọmrẹvughe kọye re cha rhẹrẹ owẹ; ẹruọ kọye ri che sun we.

¹² Ko sun we nẹ idjerhe rẹ umwemwu, vwo nẹ obọ rẹ ihwo re rhẹriẹ eta,

¹³ re yan jẹ idjerhe rẹ ọvwata vwo ra wan idjerhe rẹ ebri,

¹⁴ re ghọghọ vwẹ umwemwu eruo ri vwo omavwerhovwẹ vwẹ umwemwu eruo;

¹⁵ ihwo rẹ idjerhe rayen gunuru, rẹ idjerhe rayen epha kini kini.

¹⁶ Ko che sivwi uwe nẹ obọ rẹ igberadja na, kugbe obọ rẹ aye rọ vẹ eta ro riẹriẹvwe.

¹⁷ Ro gbobọnyẹ otu rọye rẹ ọke emọ, ọphọ rẹ Ọghẹne rọye da chọrọ ẹro.

¹⁸ Kidie uwevwi rọye she divwi kpotọ idjerhe rọye hirharo ku uhoho rẹ ughwu;

¹⁹ ohwo kohwo ro bruro ra ro rhivwi cha herọ-ọ, eyẹ ayen gbi vwo idjerhe rẹ arhọ ọfa-a.

²⁰ Vwẹ ọtiọye na gba yan vwẹ idjerhe rẹ ihwo esiri rere wo nene idjerhe rẹ evwata.

²¹ Kidie ihwo rẹ udu rayen dia ọsoso cha dia evun rẹ otọ na, ihwo ri vwo evun ọfuanfon re cha dia otọ na bede;

²² ẹkẹvuọvo a cha nyavwẹ iruimwemwu kufia nẹ evun rẹ otọ na, e che ghwiẹ awọ rayen otu re phiẹn ihwo nẹ evun rẹ otọ na.