Isẹ 19 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ O yovwi vwọ kẹ ogbere rọ rhẹrhẹ akpọ nọ ohwo ro muẹ eta ta fanfanrhiẹ, rọ je dia ẹkpa.

² Ofori rẹ ohwo vwo jẹ erianriẹn evwo-o, ohwo ro bru okpakpa yan cho ada rọye ra.

³ Oke rẹ ohwo da vwẹ ughenghẹn rẹ obọ rọye yan chọ nu, kọ mu ophu kpahe Ọrovwohwo.

⁴ Efe nẹrhẹ ohwo vwo igbeyan kpokpọ buebu, ẹkẹvuọvo igbeyan rẹ ogbere dje jovwo.

⁵ Ohwo ro se oseri rẹ efian jẹ oja ẹriọ-ọ, ọ rọ rha vwọrọn ofian cha sa djẹ vabọ-ọ.

⁶ Ihwo buebu eye guonọ ẹse rẹ oruẹse, ohwo ro ruẹ ọghọ ugbeyan rẹ ihwo ejobi ọ dia.

⁷ Imoni ro ogbere ejobi muẹ kpahọ; komavọ yẹ igbeyan rọye yan jovwo sheri te! Ọ vwẹ ota guọnọ ayen, ẹkẹvuọvo i se te obọ-ọ.

⁸ Ohwo ro vwo aghwanre guọnọ omaobọ rọye, ohwo ro vwo 'eruọ o che yovwi kẹ.

⁹ Oseri re efian jẹ oja ẹriọ-ọ, ọ rọ vwọrọn ofian cha ghwọrọ kufia.

¹⁰ Ofori rere ẹkpa vwọ re ọriunu-u, eriyin na o ji fo rere ọviẹn vwo sun isu-un.

¹¹ Ohwo ro vwo ọhọ fobọ muẹ ophu-u, je vwẹ ọrho rode kẹ ro de kuaro fia kẹ oruchọ.

¹² Ophuemuo rẹ ovie họhọ eguango rẹ okpohrokpo, ẹkẹvuọvo ẹroesiri rọye họhọ irho rọ hẹ enu rẹ ẹbẹ.

¹³ Ọmọ oghenghẹn ughwru kẹ ọsẹ rọye, eriyin rhe aye rọ djẹ ẹghwọ ẹghwọ họhọ osio ro jẹ ka.

¹⁴ Uwevwi vẹ efe eye obo ra vwọ reuku rẹ ọsọmọ, ẹkẹvuọvo aye ro vwo iroro obo rẹ Ọrovwohwo na o nẹ cha.

¹⁵ Ọvwufeti vwerhẹ okpovwerhẹ rode, ohwo rọ ro uvwerhi owevwi hwe.

¹⁶ Ohwo rọ yọnrọn urhi sẹro rẹ arhọ rọye; ohwo rọ jẹ ota na fia che ghwu.

¹⁷ Ohwo ro ru ẹse kẹ ovwiogbere ru ro kẹ Ọrovwohwo na, kọye cha hwa osa rẹ iruo rọye kẹ.

¹⁸ Nabọ si ọmọ wẹn orhọn rẹ iphiẹrohọ vwọ herọ na; wọ vwẹ udu kpahe ẹghwọrọ rọye-e.

¹⁹ Ohwo ro mu ophu ọgangan cha hwa osa rọye, kidie wo de sivwo obọvo nu, wọ je cha vwariẹ.

²⁰ Kerhọn rẹ uchebro rere wọ reyọ uyono, rere wo vwo aghwanre hẹrhẹ ọke rọ cha.

²¹ Iroro buebu re dia udu rẹ ohwo, ẹkẹvuọvo ọ rẹ Ọrovwohwo guọnọre ri se muẹdia.

²² Obo ra guọnọre vwẹ obọ rẹ ohwo rha vrẹn ọghọ emuo-o, ovwiogbere yovwi nọ ọvwọrefian.

²³ Oshọẹdjẹ rẹ Ọrovwohwo ri suẹn ohwo kpo arhọ; ohwo ro vworo evun kọ vọn; kidie ukpokpogho gbi che te ẹdia rọye-e.

²⁴ Ọvwiẹrẹ duvwu obọ phihọ ẹvwẹrẹ fẹn, yọ tobọ sa kparọ vwo tẹ ugbunu rọye-e.

²⁵ Ghwiẹ ọjejẹfia na, ohwo oghenghẹn ko yono aghwanre; ghwọ ku ohwo ro vwo ẹruọ, ko vwo erianriẹn phihọ.

²⁶ Ohwo rọ họnrọ ọsẹ rọye ọ me rha djẹ oni rọye kufia, ọye ọmọ rọ ghwa omavovwẹ vẹ ekan yan.

²⁷ Ọmọ mẹ, gbobọnyẹ uyono, ku wo che ghwrẹ nẹ eta rẹ erianriẹn.

²⁸ Orharhe rẹ oseri re vwẹ uyota jehwẹ, unu rẹ ohwo umwemwu muẹ orukuruku ria.

²⁹ Ohwo rọ jẹjefia ke bru hwe, Uphiaphiẹ a vwọ ta ota kẹ ugbuko rẹ ẹkpa.