Isẹ 17 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Omotọ rẹ emu ra rere vwẹ ufuoma yovwi nọ uwevwi re chere vọn vẹ eranvwe ra ria vwẹ ukpokogho.

² Ọviẹn ro vwo aghwanre che suẹn ọmọ ro gbe ozighi, o che nene imoni na ghare uku.

³ Ẹphẹre a vwọ wran idọnọ, ẹkuerhanre kọye a vwọ wran oro, Ọrovwohwo re davwa udu rẹ ihwo nẹ.

⁴ Ohwo umwemwu kerhọn rẹ eta imiomiovwi, eriyin ọvwọrefian je kerhọn rẹ ohwo ogbarogba.

⁵ Ohwo rọ vwẹ ovwiogbere jehwe ọ je vwẹ Ọrọmarọ jehwe, ohwo rọ ghọghọ okpetu rẹ ohwo ofa che fiabọ rẹ ehwe-e.

⁶ Ivwrọmọ eye erhu rẹ uvie rẹ ọmare, urinrin rẹ emọ na ke rha ọse rayen.

⁷ Ota esiri fi emuọvo kẹ ẹkpa-a; ọtiọye na ọfian ji se fi emuọvo kẹ osu-un.

⁸ Udiẹjẹ họhẹ ukọkọghọ rẹ inehweri vwẹ obọ rẹ ohwo rọ jẹrẹ; kasan kasan ro bioma phihọ ko yovwi kẹ.

⁹ Ohwo rọ vwẹ oruchọ ghovwo ihwo erhuvwu ọ guọnọ, ẹkẹvuọvo ohwo rọ vwariẹn ota ọ fan ugbeyan.

¹⁰ Eghwo kuo vwirhi ohwo ro vwo eruo Ibiẹfẹn nọ ubi buebu re vwo dje ohwo.

¹¹ Ohwo umwemwu ozighi egbe ọ guọno, ọtioye na ukọn umwemwu koye e ji kpahọ.

¹² Oyoma rẹ ohwo ra vwa edjanakpo re mu ọmọ mie, nọ ọ ra vwa ẹkpa vwẹ evun rẹ ughenghẹn rọye.

¹³ Ohwo da vwẹ umwemwu hwa osa rẹ ẹse, o rhe vwo ọke rẹ umiovwo vwo nẹ uwevwi rọye-e.

¹⁴ Ẹtuọhọ rẹ ofovwi ọ họhọ ẹsiẹ re bru udio rẹ ame, vwẹ ọtiọye na gba kẹnẹ oma bẹsiẹ rẹ ẹghwọ vwọ phia.

¹⁵ Ohwo ro brorhiẹ kẹ oruimwemwu vẹ ohwo ro bruhwe ọvwata, ayen ihwo ivẹ na ẹgua kẹ Ọrovwohwo.

¹⁶ Die ẹkpa vwọ naghoma vwẹ igho yọnrọn obọ rọ guọnọ aghwanre dẹ, yo vwo iroro-o.

¹⁷ Ugbeyan vwo eguọnọ kpahe ohwo kọke kọke, e vwiẹ oniọvo kpahe ohwo fiki rẹ ẹdoja.

¹⁸ Ohwo ro vwo iroro-o yan eyan, ọ me vwẹ omavovwẹ re esarobọ vwẹ irharo rẹ ọrivẹ rọye.

¹⁹ Ohwo rọ guọnọ urhi chọ ofovwi yọ guọnọ, ohwo rọ kpare ẹche re uwevwi rọye kpenu eshe ọye ọ guọnọ.

²⁰ O se yovwẹ kẹ ohwo ro vwo evun ọnko-o, ohwo vẹ ẹrẹnvwe ọbrabra sua okpetu.

²¹ Ọmọ rhurhu nẹrhẹ ivun miovwẹ ọsẹ rọye, ọsẹ rẹ ẹkpa se vwo omavwerhovwẹ-ẹ.

²² Udu sasasa yẹ omamọ rẹ uhuvwu, ẹkẹvuọvo erhi ro muomaphihọ nẹrhẹ ibeku rẹ oma ya muẹ.

²³ Ohwo umwemwu dia obuko ria udi nẹ ọ me rhẹriẹ ẹdjọ.

²⁴ Ohwo ro vwo ẹruọ tọn opharo viẹ aghwanre, ẹkẹvuọvo ẹro rẹ ẹkpa etan rẹ akpọ na ọye o nẹ.

²⁵ Ọmọ oghenghẹn ivunemiovwo kẹ ọsẹ rọye, ivuemiovwo kẹ ohwo ro vwiere.

²⁶ Eho re ho ọvwata she phihọ-ọ, emu ọchọchọ rere a vwọ ta ihwo ri ruẹ dẹndẹn.

²⁷ Ohwo ro rhurhu ota ba unu jo vwo erianriẹn, ọ rọ vwọ ẹnvwẹ ofuefu ọye ohwo ro vwo ẹruọ.

²⁸ Ẹkpa dede de hwe oma mu ke se ọvwaghwanre, ọke rọ de rhurhu unu rọye, ka reyọ phihọ nẹ ọ riẹn emuọvo .