Isẹ 16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Isẹ kpahẹ Arhọ kugbe Uruemu

¹ Ohwo ro vwo iroro ọye iroro jẹ, ẹkẹvuọvo ota rẹ ẹrẹnvwe kpahe re obọ rẹ Ọrovwohwo o nẹ cha.

² Idjerhe rẹ ohwo rẹ akpọ ejobi oyoyovwo vwẹ aro rọye, ẹkẹvuọvo Ọrovwohwo vwanvwan erhi.

³ Phi iruo wẹn ejobi phihọ obọ rẹ Ọrovwohwo na, obo wo rori ejobi kọ mudia ga.

⁴ Ọrovwohwo ma emu na ejobi vwọ kẹ iruo rọye, ekpuyovwi rẹ ohwo umwemwu na ọ marọ vwọ kẹ ẹdẹ rẹ ukpokpogho

⁵ Ohwo kohwo ro phuoma ejobi ẹgua kẹ Ọrovwohwo, jo mu we ẹro nẹ, ọ cha sa vabọ rẹ oja ẹriọ-ọ.

⁶ Vwẹ oma rẹ esegbuyota vẹ omaevwokpotọ ọye a vwọ sa rhuẹrẹ orukuruku, oshọẹdjẹ rẹ Ọrovwohwo ọye ohwo sa vwọ kẹnẹ oma kẹ umwemwu.

⁷ Ọke rẹ idjerhe rẹ ohwo de je Ọrovwohwo, ivwighre rọye dede na ke rhoma dia ọnse rọye.

⁸ Emerha ra wan ọvwata vwo yovwi nọ efe buebu ra wan oshenyẹ vwo.

⁹ Iroro rẹ ohwo ọye ọ vwọ gbẹn idjerhe rọye, ekẹvuọvọ Ọrovwohwo kọye rhe suẹn ichiyi rọye kẹ.

¹⁰ Omamọ rẹ orhiebro rẹ erhi suẹn ọye a mrẹ vwẹ unu rẹ ovie, unu rọye ruẹ umwemwu siẹ ro de guẹ ẹdjọ-ọ.

¹¹ Ovwanvwọn rẹ ọsọso kugbe omamọ rẹ uchunu e rẹ Ọrovwohwo na, ẹhọhọ rẹ emu rọ hẹ ekpu na ejobi je vwẹ iruo rọye.

¹² Ẹgua rode kẹ ivie rere ayen vwo ru umwemwu, kidie evun rẹ ọvwata ọye a vwọ reyọ ekete rẹ uvie na vwo mu.

¹³ Unu esiri je ovie, ivun rẹ ohwo rọ ta uyota vwerhọn.

¹⁴ Ivuemiovwo rẹ ovie ọye ikun rẹ ughwu, ọvwẹghwanre kọye ri se fue.

¹⁵ Ovie da sasa opharo ọye arhọ ẹroesiri rọye họhọ osio rẹ ọkeuvo.

¹⁶ Ẹghwanre evwo yovwi nọ oro, o fori ra jẹ ẹruọ reyọ nọ idọnọ efuanfon.

¹⁷ Idjerhe rode rẹ ohwo esiri kẹnẹ oma kẹ umwemwu, ohwo rọ sẹro rẹ idjerhe rọye ọye ri sivwẹ arhọ rọye.

¹⁸ Eheri re karo kẹ ẹghwọrọ, oma ephuo me rha karo kẹ eshe.

¹⁹ Oyovwiri ra vwẹ oma kpotọ vwẹ ohri rẹ ivwiogbere nọ ra da ghare ughwẹ rẹ eheri.

²⁰ Ohwo rọ kerhọn rẹ ota ko yovwi kẹ, aghọghọ kẹ ohwo rọ vwẹ ero so Ọrovwohwo.

²¹ Ohwo rọ ghwanre vwẹ udu ke se nẹ ohwo rọ mrẹ emu vughe, omamọ rẹ eta ri ku ohwo rhẹriẹ ki bu phihọ vwẹ unu rọye.

²² Aghwanre họhọ ogbugbu rẹ arhọ kẹ ohwo ro vworo, ẹkẹvuọvo ughenghẹn ọye ophiaphiẹ ra vwọ fa ẹkpa.

²³ Iroro rẹ ọvwaghwanre nẹrhẹ ota rọye gba, ọ me nẹrhẹ ota ro kuẹ ohwo rhẹriẹ nẹ unu rọye cha.

²⁴ Eta avwerhe họhọ evwavwa rẹ ọnyọ, ọ vwẹ avwerhe kẹ erhi ọ me rha vwẹ oma kpokpọ kẹ ugboma.

²⁵ Idjerhe ọvo herọ rọ họhọ obọ ri she phihọ vwẹ ẹro ro ohwo, ẹkẹvuọvo oba rọye idjerhe rẹ ughwu.

²⁶ Urhuru sivwi rẹ emuọre ọye oruiruo vwo ruẹ iruo, ugbunu rọye kọye ri bio phihọ.

²⁷ Ohwo ro fi emuọvo-o re jẹ iroro umwemwu, ota rẹ unu rọyẹ họhọ erhanre rọ tọrhẹ.

²⁸ Ohwo rọ shuakpọ sua eghwọ, ọvwerhia fan igbeyan.

²⁹ Ọvwozighi phiẹn ọrivẹ rọye, o mi suo kpo idjerhe ọbrabra.

³⁰ Ohwo rọ vwẹ ẹro ta ota shuakpọ, ohwo rọ siunu phihọ umiovwo ye ọ ghwa cha.

³¹ Uyovwi rọ tọnre vẹ esha ọye erhu rẹ urinrin; eyenre rẹ ọvwata ọye e se vwo vwo.

³² Ohwo rọ fobọ muẹ ophu-u yovwi nọ ọgba, ohwo ro se suẹ erhi rọye yovwi nọ ohwo rọ phio orere kua.

³³ E mu itẹ kpahe ekpoghowọ, ẹkẹvuọvo orhiẹn rọye obọ rẹ Ọrovwohwo o nẹ cha.