Isẹ 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ọmọ rọ ghwanre nyo uyono rẹ ọsẹ rọye, ẹkẹvuọvo ọ rọ jẹ ọjẹfia kerhọn rẹ uchebro-o.

² Evun rẹ omamọ ro nẹ unu rẹ ohwo esiri rhe etiyin ọ da ria emu esiri, ẹkẹvuọvo ẹguọnọ rẹ ohwo ọbrabra kẹ ozighi.

³ Ohwo rọ serọ rẹ unu rọye che sivwi arhọ rọye; ọ rọ rhie unu rọye phihọ tẹ ẹtan cha họrhọ ro ughwu.

⁴ Erhi rẹ ọvwiẹrẹ ro ẹwan, yo vwo emuọvo-o, ye erhi rẹ ọgba mrẹ ria buebu.

⁵ Ofian ẹvwọrọn tuẹ ọvwata oma, ẹkẹvuọvo ohwo umwemwu vọnre vẹ omẹrhaphiẹ vẹ omavovwẹ.

⁶ Ọvwata ri suẹn ohwo rẹ idjerhe rọye kpọvi, ẹkẹvuọvo umwemwu gerẹ oruimwemwu na she.

⁷ Ohwo ọvo herọ ro soma rọye ọdafe, yo vwo emuọvo-o, ọfa herọ ro soma rọye ogbere, yo vwo efe buebu.

⁸ Efe rẹ ohwo vwori ọye ọ vwọ tan arhọ rọye hirhe, ẹkẹvuọvo ovwiogbere vwo emuọvo rọ vwọ tan oma rọye-e.

⁹ Urhukpẹ rẹ ọvwata aghọghọ, ẹkẹvuọvo e che fu urhukpẹ rẹ ohwo umwemwu na.

¹⁰ Eheri ọye ohwo ro jẹ ẹme enyo vwọ sua ofovwi, ẹkẹvuọvo aghwanre vẹ ihwo re reyọ uchebro gba dia.

¹¹ Efe rẹ okpakpa obobotọ ọ ra, ẹkẹvuọvo ohwo rọ kọn ọkọn ememerha, ko che vwo buebu.

¹² Emu re phi ẹro phihọ nu ra da kparọ ọ nẹrhẹ udu rẹ ohwo mwa ọga, ẹkẹvuọvo obo rẹ ohwo guọnọ ro de se te obọ ọ họhọ urhe rẹ arhọ.

¹³ Ohwo rọ jẹ ota na fia ọye ọvo hwe oma rọye, ẹkẹvuọvo ohwo ro mu ọghọ kẹ urhi na che vwo osa.

¹⁴ Uyono rẹ ọvwaghwanre na ogbugbu rẹ arhọ, rere ohwo vwọ kẹnẹ oma kẹ ugodo rẹ ughwu.

¹⁵ Iroro esiri nẹrhẹ ohwo mrẹ aroesiri, ẹkẹvuọvo idjerhe rẹ ihwo ri vwo esegbuyota-a ke ghwọrọ.

¹⁶ Erianriẹn ọye ohwo ro vwo iroro vwo ruẹ emu kemu ejobi, ẹkẹvuọvo ẹkpa vwẹ ughenghẹn rọye nẹ.

¹⁷ Ọyinkọ umwemwu sua okpetu, ẹkẹvuọvo omamọ rẹ ikọn ghwa esivwo cha.

¹⁸ Ohwo rọ davwerhọn rẹ uyono-o ọbẹvwẹ vẹ omaẹphọphọ ọye ọ mrẹ, ẹkẹvuọvo ohwo rọ kerhọn rẹ ẹghwọ o vwọ ọrho vẹ ejiro.

¹⁹ Obo rẹ ohwo guọnọ de te obọ oma kọ vwerhẹ erhi rọye, ẹkẹvuọvo umwemwu ẹ yan jovwo yẹ ẹgua kẹ ihwo ri jẹ iroro evwo.

²⁰ Ohwo rọ yan nene ẹvwaghwanre ko vwọ aghwanre, ẹkẹvuọvo ugbeyan rẹ ẹkpa kọ re oja.

²¹ Uyovwiemiovwo vwo tua iruimwemwu, ẹkẹvuọvo oruimwemwu kon koko kẹ ọvwata.

²² Ohwo esiri ghwẹ jẹ uku vwo kẹ emọ vẹ ivwrọmọ rọye, ẹkẹvuọvo oruimwemwu kọn koko kẹ ọvwata.

²³ Ogo rẹ ogbere na yovwẹ emu gangan, ẹkẹvuọvo evunmwemwu ọye ihwo vwọ ghwọrọ kuẹfia.

²⁴ Ohwo rọ vwẹ ophiaphiẹ fa ọmọ rọye-e yo mu ọmọ na mwumwerhe ẹkẹvuọvo ohwo rọ guọnerọ nabọ ruo gangan.

²⁵ Ovwata mrẹ uche emu rọ vọn evun ria, ẹkẹvuọvo evun sa vọn oruimwemwu-u.