Isẹ 12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ohwo rọ guọnọ urhiẹyọrọ ọye ohwo rọ guọnọ erianriẹn, ẹkẹvuọvo ohwo rọ rhovwa nẹ aghwọ kuo-o yẹ ẹkpa.

² Ohwo esiri ọye sa mrẹ aroesiri vwẹ obọ rẹ Ọrovwohwo na, ẹkẹvuọvo o brẹhwe ohwo rọ vwẹ evun roro iruimwemwu.

³ Umwemwu sa vwẹ ohwo mudia-a, ẹkẹvuọvo awọ rẹ ovwata vwo muẹdia e se ghwie-e.

⁴ Aye esiri ọye erhu rẹ uvie kẹ ọshare rọye, ẹkẹvuọvo aye rọ nẹrhe oma vua ohwo họhọ orin ro gbo vwẹ ibeku rọye.

⁵ Iroro rẹ ọvwata ọsoso ọ dia, iroro rẹ ọvwozighi ọ vẹ ọghware.

⁶ Eta rẹ oruimwemwu re fiọnko hẹrhẹ ọbara, ẹkẹvuọvo unu rẹ ohwo esiri siẹ ohwo nẹ ughwu.

⁷ Iruimwemwu de she nu kẹ ayen ghwe re kakare, ẹkẹvuọvo uwevwi rẹ ohwo esiri che mudia bẹdẹ.

⁸ Ọtiobo rẹ iroro rẹ ohwo yovwi te eriyin ejiro te, ẹkẹvuọvo ọjẹfia ọye ẹkẹn ro te ohwo rẹ iroro rọye chọre.

⁹ Ohwo dẹndẹn rẹ ọye ọvo wian kẹ oma rọye yovwi nọ ohwo ro soma ọdafe yẹ ọ mrẹ emu ria-a.

¹⁰ Ọvwata nabọ sẹro rẹ arhọ rẹ uchuru rọye, ẹkẹvuọvo arodọvwẹ rẹ ohwo umwemwu vọnre vẹ evunmwemwu.

¹¹ Ohwo ro voro udju rọye ọye re mrẹ emu ria, ẹkẹvuọvo ohwo ro gbe osoghoro nene emu ofefe vwo ọhọ-ọ,

¹² Ohẹrhẹ ọgangan rẹ oruimwemwu che ghwie she, ẹkẹvuọvo awọ rẹ ọvwata che mudia kokoroko.

¹³ Ufi che mu oruimwemwu na fiki rẹ ọtachọ rẹ unu rọye, ẹkẹvuọvo ọvwata cha vabọ rẹ ukpokpogho ejobi.

¹⁴ Ota esiri rẹ ohwo esiri tare vọn ohwo evun, obo rẹ ohwo ruru rhoma bro cha.

¹⁵ Ẹkpa roro nẹ idjerhe rọye ri me yovwi, ẹkẹvuọvo ohwo rọ ghwanre nabọ kerhọn rẹ uchebro.

¹⁶ Ophu de mu ẹkpa a me ghwa mrẹ vughe, ẹkẹvuọvo ohwo ro vwo iroro phurie arueyivwo.

¹⁷ Ohwo rọ ta uyota ọye ri se oseri rẹ uyota, ẹkẹvuọvo ọvwọron efian ophiẹvwẹ ọye oguẹ.

¹⁸ Ohwo ọvo herọ rẹ eta rọye epha kpata-kpata kerẹ adjara ro duvwẹ ohwo, ẹkẹvuọvo ẹrẹnvwe rẹ ọvwiroro sivwe ohwo.

¹⁹ Ugbunu rọ ta uyota cha dia bẹdẹ, ẹkẹvuọvo ẹrẹnvwe rọ vwọrọn efian ọmọke krẹn ọye ọ dia.

²⁰ Ọphiẹnvwẹ hẹ udu rẹ ihwo re je iroro umwemwu, ẹkẹvuọvo ihwo re jẹ iroro esiri i vwo aghọghọ.

²¹ Emu omiomiovwi ọvuọvo che ru ọvwata-a, ẹkẹvuọvo iruimwemwu na vọnre vẹ ukpokpogho.

²² Unu kunu rọ vwọrọn efian ejobi yẹ ẹgua kẹ Ọrovwohwo na, ẹkẹvuọvo ihwo ri ruẹ uyota vwerhọn oma.

²³ Ohwo ro vwo iroro siẹ erianriẹn rọye nẹ, ẹkẹvuọvo ẹkpa ghwoghwo ughenghẹn rayen.

²⁴ Obọ rẹ ohwo ro vwo odiri che suẹn, ẹkẹvuọvo ọvwufeti ka cha gba vwọ wian owian.

²⁵ Ewan ẹruọ rọ hẹ evun rẹ ohwo ghwọrọ ohwo na oma, ẹkẹvuọvo ota esiri nẹrhẹ oma vwerhọn.

²⁶ Ọvwata siẹ oma rọye nẹ umwemwu eruo, ẹkẹvuọvo idjerhe rẹ iruimwemwu na suẹn ayen ghwrẹ.

²⁷ Ovwufeti sa djẹ eranvwe rọye muẹ-ẹ, ẹkẹvuọvo ohwo ro vwo erhiori che vwo omamọ rẹ efe.

²⁸ Idjerhe rẹ ọvwata ọye arhọ epha, idjerhe rẹ ọruchọ suẹn ohwo kpo ughwu.