Isẹ 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ovwanvwọn rẹ efian ọye ẹgua kẹ Ọrovwohwo na, ẹkẹvuọvo ovwanvwọn rẹ uyota nabọ vwerhọn oma mamọ

² Oma eyan da rhe nu, oma ẹphọphọ ko ji ghwe nene, ẹkẹvuọvo omaevwokpotọ ọ vẹ aghwanre gba yan.

³ Uduesiri rẹ ohwo esiri ọye ri suen ayen, ẹkẹvuọvo ogbeku rẹ ovwozighi ọye re ghwọrọ ayen.

⁴ Efe sa chọ ohwo uko vwẹ ẹdẹ rẹ ophu-u, ẹkẹvuọvo ọvwata siẹ ohwo nẹ ughwu.

⁵ Uruemu esiri rẹ ọvwata gbẹn idjerhe rọye phiọnphiọn, ẹkẹvuọvo umwemwu eruo rẹ oruimwemwu na ọye ghwa eshe rọye cha.

⁶ Ọvwata rẹ ohwo esiri sivwe ayen, ẹkẹvuọvo urhuru sivwe rẹ ọruero na che mue ayen imu.

⁷ Oruimwemwu de ghwu nu, yẹ iphiẹrohọ rọye reri, ẹruẹrhẹ rẹ ohwo rọ riẹn Ọghẹnẹ-ẹ che vwo oba.

⁸ E se sivwi ọvwata nẹ ukpokpogho, yẹ oruimwemwu she ruọ.

⁹ Ohwo rọ riẹn Ọghẹnẹ-ẹ vwẹ ugbunu rọye ghwọrọ ọrivẹ rọye, ẹkẹvuọvo fiki rẹ erianriẹn e mi rhe sivwi ọvwata rhọ.

¹⁰ Siẹ rẹ akpọ de yovwi kẹ ọvwata, orere na ejobi kọ ghọghọ, oruimwemwu de rhe ghwu ihwo ki kuvwie ke ghọghọ

¹¹ Vwẹ oma rẹ ebruphihọ rẹ ọvwata ọye orere vwo kpenu, ẹkẹvuọvo ugbunu rẹ oruimwemwu mi rhe geri orere she.

¹² Ohwo ro nẹ ọrivẹ rọye hahavwe yo vwo iroro-o, ẹkẹvuọvo ohwo ro vwo ẹruọ me fo gbiei.

¹³ Ohwo ro gbe ikun yan vẹn ume, ẹkẹvuọvo ohwo ro vwo odiri se rhurhu ume.

¹⁴ Asan rẹ osun epha-a, ihwo rọye she, ẹkẹvuọvọ asan rẹ evwiroro vẹ ibruche epha ihwo rọye she-e.

¹⁵ Ohwo rọ riẹ esarohọ kẹ ọrhorha cha hwa osa rọye, ẹkẹvuọvo ohwo ro tuoma rẹ esarobọ ẹriọ ọ djẹ rhọ.

¹⁶ Aye ro vwo ọghọ che vwo ọrho, eshare ri gbe ozighi vwo efe.

¹⁷ Ohwo ro nẹ aruedọ che vwo erere kẹ oma rọye, ẹkẹvuọvo ohwo umwemwu oma rọye o hwe.

¹⁸ Ohwo umwemwu osa rẹ ọphiẹnvwe ọye o vwo, ẹkẹvuọvo ohwo rọ kọn omamọ rẹ esiri ughwẹ rọye muero.

¹⁹ Ohwo ro churu obọ mu ọvwata kọ sa rhọ, ẹkẹvuọvo ohwo rọ djẹ nene umwumwu che ghwẹ.

²⁰ Ihwo ri vwo udu ọchọchọ ejobi ẹgua kẹ Ọrovwohwo, ẹkẹvuọvo ayen otu rẹ re abe vwẹ idjerhe na-a vwerhọn oma.

²¹ Jo mu we ẹro, nẹ ohwo umwemwu che jẹ ehwe ẹmrẹ-ẹ, ẹkẹvuọvo ihwo rẹ evun rayen fonro e che sivwẹ ayen.

²² Kerẹ isa rẹ oro vwẹ uwe rẹ esi eriyin aye ro yoma ro vwo iroro-o epha.

²³ Ẹguọnọ rẹ ọvwata uyoyovwi ọye oba rọye; ẹruẹrhẹ rẹ ohwo umwemwu ke rha ophu ọvo.

²⁴ Ohwo ọvo rue ese yo fe phihọ; ọfa herọ rọ tọkpẹ ẹkẹvuọvo yẹ akpọ ben.

²⁵ Ohwo ro ruẹ ẹse ọye ri fe, ohwo ro kuẹ ame kuẹ emu ra kọnre eriyin e ji ku ame kuo.

²⁶ Ohwo rọ kẹkẹn obọ rẹ ọka ke duvwu iyori kẹ ẹkẹvuọvo ebruba kẹ uyovwi rẹ ohwo rọ shẹ rẹ.

²⁷ Ohwo rọ vwẹ oma kpotọ guọnọ emuesiri kọ mrẹ ẹroesiri, ẹkẹvuọvo umiovwo kọye te ohwo rọ vwẹ okpakpa guọnọ.

²⁸ Ohwo rọ vwẹ ẹro so efe rọye che vwioro, ẹkẹvuọvo ọvwata kọ cha rho bodo bodo kerẹ ẹbẹ ọkpokpọ.

²⁹ Ohwo ro kpokpo evwruwevwi rọye kọ vwẹ aphopho reuku, ohwo oghenghẹn ko gbe odibo kẹ ọvwaghwanre.

³⁰ Omamọ rẹ ọvwata ọye urhe rẹ arhọ, ẹkẹvuọvo ozighi hwe arhọ.

³¹ Ovwata da reyọ osa rẹ iruo rọye vwẹ akpọ na, komavọ ọ dia kẹ ohwo umwemwu vẹ oruimwemwu!