Isẹ 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A vwẹ Ohwo Ọsoso Kugbe Ohwo Umwemwu vwo ru Udje

¹ Ọmọ rọ ghwanre nẹrhẹ Ọsẹ ghọghọ, ẹkẹvuọvo ọmọ oghenghẹn ọ nẹrhẹ ivun miovwẹ oni rọye.

² Efe ra vwẹ umwemwu ghwẹ koko fi erere ọvuọvo-o, ẹkẹvuọvo ọvwata siẹ ohwo nẹ ughwu.

³ Ọrovwohwo rhọvwa nẹ owẹvwi hwe ọvwata-a, ẹkẹvuọvo o tua urhurusivwe rẹ ohwo umwemwu muotọ.

⁴ Obọ rẹ ọvwiẹrẹ ghwa ogbere cha, ẹkẹvuọvo obọ rẹ ọgba me rha ghwa efe rhe.

⁵ Ọmọ rọ kokọn vwẹ ọkeuvo vwo aghwanre, ẹkẹvuọvo ọmọ rọ rha vwerhẹ vwẹ ọke orhọn nẹrhẹ oma vua ohwo.

⁶ Ebruba kẹ uyovwi rẹ ọvwata, ẹkẹvuọvo ugbunu rẹ ohwo umwemwu siẹ ozighi nẹ.

⁷ Ekarohọ rẹ ọvwata vọnre vẹ ebruphihọ, ẹkẹvuọvo odẹ rẹ ohwo umwemwu che gbo kufia.

⁸ Ohwo rọ ghwanre vwẹ udu sa yọnrọn irhi, ẹkẹvuọvo ohwo ughenghẹn rọ ta ọpata cha họrhọ rua idẹbono.

⁹ Ohwo rọ yan vẹ evunesiri cha yan vwẹ ufuoma, ẹkẹvuọvo ohwo ro ku idjerhe rọye rhẹriẹ ka mrẹ otọ rọye.

¹⁰ Ohwo rọ brẹro gbrigbri sua okpetu, ohwo ro yivwaro ghwọ kuẹ oruchọ ọye sa rhuẹrẹ ihwo phihọ.

¹¹ Ugbunu rẹ ọvwata ọye ọgbugbu ra rhọ; ẹkẹvuọvo ugbunu rẹ ohwo umwemwu vẹ ozighi gba yan.

¹² Eghrẹn ẹjẹ ọye ghwa ohọnre cha, ẹkẹvuọvo ẹguọnọ rhurhẹ oruchọ ejobi.

¹³ Vwẹ ugbunu rẹ ohwo ro vwo ẹruọ a da mrẹ aghwanre, ẹkẹvuọvo ophiaphiẹ vwọ kẹ ugbuko rẹ ohwo ghengẹn.

¹⁴ Ihwo ri vwo ẹghwanre eye re sa sẹro rẹ erianriẹn, ẹkẹvuọvo ọgbota rẹ ohwo ghenghẹn ọye re ghwa ẹghwọrọ cha.

¹⁵ Efe rẹ ọdafe ọye orere ọgangan rọye; ọbẹvwẹ rẹ ovwiogbere kọye rha hẹ ẹghwọrọ rọye.

¹⁶ Osa rẹ ọvwata ọye arhọ, erere rẹ ohwo umwemwu kọye rha umwemwu rọye.

¹⁷ Ohwo rọ reyọ uyono yọ hẹ idjerhe rẹ arhọ, ekẹvuọvọ ohwo rọ rhọvwa nẹ aghwọ ku oye-e yọ he idjerhe rẹ ughwru.

¹⁸ Ohwo rọ si eghrẹn nu vwẹ udu rọye ọphiẹnvwẹ o ruẹ, ohwo rọ rha jẹ ihwo fia ẹkpa ọye epha.

¹⁹ Ohwo da dia ọgbota, riẹn nẹ oruchọ karobọ-ọ, ẹkẹvuọvo ohwo rọ sa yọnrọn unu rọye ọvwiroro oruẹ.

²⁰ Ẹrẹnvwe rẹ ọvwata yovwi nọ omamọ rẹ idọnọ efuanfon; ẹnwẹn rẹ ohwo umwemwu fi emu ọvuovọ-ọ.

²¹ Ẹbẹrunu rẹ ovwata nẹrhẹ evun vọn ihwo buebu, ẹkẹvuọvo jẹ iroro evwo re nẹrhẹ ughwu hwe ohwo oghenghẹn.

²² Ebruphihọ rẹ Ọrovwohwo nẹrhẹ efe cha, ọ vwẹ enuebro ba-a.

²³ Ohwo oghenghẹn vwẹ umwemwu eruo roro e hẹ ha, ẹkẹvuọvo uruemu rẹ ẹghwanre ọye hẹ omavwerhovwẹ kẹ ohwo ro vwo erianriẹn.

²⁴ Obo rẹ ohwo umwemwu djẹ oshọ rọye che bro rhe, ẹkẹvuọvo emu rẹ ọvwata guọnọ ọye a vwọ kẹ.

²⁵ Ọke rẹ ogiribo de dju fọ nu, a gbo mrẹ oruimwemwu ọfa-a ẹkẹvuọvo ọvwata cha dia bẹdẹ.

²⁶ Otiobo rẹ akoro ghẹghẹ ako na, rẹ ivwirhi da dja ẹro na, eriyin ọvwiẹrẹ epha kẹ ihwo ri jiro uwevwi.

²⁷ Oshọẹdjẹ rẹ Ọrovwohwo na nẹrhẹ atọn, ẹkẹvuọvo ikpe rẹ oruimwemwu ke cha krẹ.

²⁸ Iphiẹrohọ rẹ ọvwata vọnre vẹ aghọghọ, ẹkẹvuọvo iphiẹrohọ rẹ ohwo umwemwu che vwo oba.

²⁹ Ọrovwohwo na ọye ogba ọgangan kẹ ohwo rẹ idjerhe rọye dia ọsoso, ẹkẹvuọvo ọye eghwọrọ kẹ ihwo umwemwu.

³⁰ Eche se ghwiẹ ọvwata nẹ otọ-ọ, ẹkẹvuọvo oruimwemwu cha sa dia otọ na-a.

³¹ Ugbunu rẹ ọvwata ẹghwanre ọ vwọ ta ota, ẹkẹvuọvo a cha nyavwẹ ẹrẹnvwe ọbrabra ejobi kufia.

³² Ugbunu rẹ ọvwata riẹn ọbo ri fori vughe, unu rẹ ohwo umwemwu, emu ọchọchọ ọvo ọ riẹn.