Iguẹdjọ 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Eshare rẹ Ifrem da ta kẹ nẹ, Ọnana didi emu wo ru avwanre na, wọ ra vwọ họnre ihwo ri Midian wo vwo jẹn avwanre ese? Ayen da ghwọ kuo ganga

² Ọ da ta kẹ ayen nẹ, Didi emu mi ruru re vwo dje ovwan? Emamọ rẹ orhọ ri otie rẹ Ifrem rhe yovwi nọ ọ rẹ Abiẹza?

³ Ọghẹnẹ phi Orẹb vẹ Zẹẹb, isun ri Midian phihọ abọ rẹ ovwan nure; ki didi emu mi rhe ru re vwọ dje ọ rẹ ovwan ruru? Rọ vwọ ta ke ayen ọtiọnana nu, ophu ro mu ayen jovwo de fue.

Gidiọn mu Ivie ri Midian

⁴ Gidiọn da rhe obi Jọdan ọ da wanvrẹn ọ vẹ eshare ujori erha re vẹ ọye gba herọ, rẹ ayen vwọ tua ihwo na dede na yẹ oma rhọ aye-en.

⁵ Eriyin na ọ da ta kẹ eshare ri Sukọt na nẹ, Bikọ, vwẹ ikori rẹ ikara kẹ ihwo ri nene uvwe na; kidie oma rhọ ayen, yẹ me vwọ tua Zeba vẹ Zalmunna, ivie ri Midian na.

⁶ Igbuyovwi ri Sukọt da ta kẹ nẹ, E phi Zeba vi Zaimunna phihọ obọ wẹn nure, rere avwanre vwọ vwẹ ikara kẹ otu ofovwi wẹn?

⁷ Gidiọn da tanẹ, Ọ da dia ọtiọye, ọke rẹ Ọghẹnẹ de phi Zeba vi Zalmunna phlhọ obọ mẹ nu, ke me cha vwẹ inwe rẹ aton vẹ odjigbẹ vwọ bẹrẹ ivwọ rẹ oma rẹ ovwan.

⁸ O de vrẹn nẹ etiyin kpo obi Pẹnuẹl, ọ da ta ota ọvuọvo na kẹ ayen; etiyin eshare ri Pẹnuẹl da kpahe kẹ kirobo rẹ eshare ri Sukọt na kpahe kẹ.

⁹ Ọ da ta kẹ eshare ri Pẹnuẹl nẹ, Ọke mi de rhivwi rhe vẹ ufuoma, ke me cha guọghọ ọguan rẹ enu nana te otọ.

¹⁰ Ọke nana Zeba kugbe Zalmunna vẹ otu ofovwi rẹ ayen e he evun ri Karkọr, ayen kerẹ eshare uriori ihwiori, enana ejobi na ihwo re dia obaro ọnre rẹ otu ofovwi ro chekọ; fikiridie eshare uriori ujọri gbe uje ra vwẹ ọlọkọ hwe vwẹ ofovwi na

¹¹ Gidiọn da ra wan idjerhe rẹ iyesi vwẹ obaro ọnre vwi Nọba vi Jogbeha, o de re hwe otu ofovwi na; kidie otu ofovwi na sioma nu vẹrhe.

¹² Zeba vi Zalmunna da djẹ; ọ da vwo tua ayen o de mu ivie ivẹ ri Midian na, Zeba vi Zalmunna, ọ da jẹ uguegue phihọ ayen oma.

¹³ Etiyin Gidiọn ọmọ ri Joash de rhivwi nẹ ofovwi na rhe, ọ da ra wanvrẹn ugbenu ri Hẹrẹs.

¹⁴ O de mu emeghene ọshare ọvo ri Sukọt, ọ da nọ ota; ọ de si odẹ rẹ eshare ujorha gbe ihwe gbe ighwrẹn rẹ inotu kugbe ekpako ri Sukọt phihọ otọ kẹ

¹⁵ O de bru eshare ri Sukọt na rhe, ọ da ta nẹ, Nighe ri Zeba vi Zalmunna, ihwo rẹ ovwan vwọ wanrie ovwẹ, tanẹ, E phi Zeba vi Zalmunna phihọ obọ wẹn nure, rere avwanre vwọ vwẹ ikara kẹ ihwo rẹ oma rhọ?

¹⁶ O de mu ekpako rẹ orho na ọ da vwe inwe rẹ atọn vẹ idjigbẹ ọ da vwẹ ayen yọno ihwo ri Sukọt na.

¹⁷ Ọ da guọghọ ọguan rẹ enu ri Pẹnuẹl o de hwe eshare rẹ orho na.

¹⁸ Ọ da ta ki Zeba vi Zalmunna nẹ, Tivọ eshare ri Tabọr ri wo vwo hweri na epha? Ayen da kpahe nẹ, Kirobo wọ epha, ọtiọye ayen epha; ọvuọvo rẹ ayen họhọ emọ rẹ ivie.

¹⁹ Ọ da tanẹ, Ayen imọni mẹ iruẹ, emọ rẹ ọni mẹ rẹ eshare dede; kirobo rẹ Ọrovwohwo na herọ na ọ dianẹ kẹ ovwan sẹro rẹ ayen, mane mi e hwe ovwa-an

²⁰ Ọ da ta kẹ Jẹtẹr ọmọkpako rọye tanẹ, Vrẹn rere wo hwe ayen. Ẹkẹvuọvo ọmọ na yọnrọn ọlọkọ rọye-e; kidie oshọ muro, fikiridie ọmọboba o ji ruẹ.

²¹ Etiyin Zeba vi Zalmunna da tanẹ, Gbe vrẹn kẹ oma wẹn, rere wo she nyẹ avwanre; kidie kirobo rẹ ohwo ẹpha, ọtiọye ọgangan rọye je epha. Gidiọn de vrẹn o de hwe Zeba vi Zalmunna; ọ da reyọ ekuakua rẹ eheri rẹ ohọnre rẹ iyesi rayen.

Iruo efa ri Gidiọn ruru kugbe Ughwu rọye

²² Etiyin eshare rẹ Izrẹl da ta kẹ Gidiọn nẹ, Gbe sun avwanre, wẹ kugbe ọmọ wẹn rẹ ọshare vẹ ovwrọmọ wẹn rẹ ọshare; kidie wo sivwi avwanre ne obọ ri Midian na.

²³ Gidiọn da ta kẹ ayen nẹ, Mi che sun ovwa-an, ọmọ me rẹ ọshare che sun ovwa-an; Ọrovwohwo na ri che sun ovwan.

²⁴ Gidiọn da ta kẹ ayen nẹ, Gbe ju vwe yare emu ọvo mie ovwan; ovwan eshare na kẹ vwẹ dọhwo disan rẹ erhọ rẹ ovwan ghorhori rẹ ofovwi (Kidie ayen vwẹ isan rẹ erhọ rẹ oro buebu, fikiridie ihwo rẹ Ishmel ayen ruẹ)

²⁵ Ayen da kpahe tanẹ, Avwanre vwẹ ayen kẹ wẹ vẹ ivun avwerhe. Ayen da vwẹ ewun ọvo hwotọ, dohwo disan rẹ erhọ ro vwori da ghwiẹ phihọ,

²⁶ Ọnyẹn rẹ isan rẹ erhọ rẹ oro ra vwọ kẹ na da họhọ te ovwanvwọn rẹ oro ri Shekel uriori kugbe ujori ighwrẹn; ji kugbe ekuakua rẹ eheri buebu, kugbe ikoro rẹ ehọvwore, kugbe emwa rẹ ivie ri Midian na vwo rhuo, kugbe ejọnrọn rẹ ọhọre rẹ iyesi rayen.

²⁷ Gidiọn da vwo ko ibuluku o de phihọ otorho rọye, vwi Ọfra; Izrẹl ejobi ki vwo gbe ẹgua vwe oboyi, o de rhi hirhe phihọ ufi kẹ Gidiọn vẹ uwevwi rọye.

²⁸ Ọtiọye na a da vwẹ Midian vwo kpọtọ vwẹ obaro rẹ ihwo rẹ Izrẹl na, ayen gbe kpare uyovwi rẹ ayen kpenu ọfa-a. Otọ na de rovwoma ikpe ujuvẹ vwẹ ọke ri Gidiọn.

²⁹ Jerubbaal ọmọ ri Joash da ra dia uwevwi rẹ obọ rọye.

³⁰ Gidiọn de vwo emeshare ujorha gbe ihwe, rọ vwẹ orhẹn rọye vwiẹ, kidie ọ vwo eya buebu

³¹ Ọsen ọvo rọ jẹre vwi Shikẹm de vwiẹ ọmọshare ọvo kẹ, o de se odẹ rọye Abimẹlẹk.

³² Gidiọn ọmọ ri Joash na da nabọ ghwo gangan ro ki ghwu, e de sho phihọ ushi ri Joash rẹ ọsẹ rọye, vwi Ọfra rẹ ihwo ri Abiẹza.

³³ Ri Gidiọn ghwe vwo ghwu nu, ihwo rẹ Izrẹl da ghwa rhoma rhi gbe oma rayen ẹgua fiki ri Baal, ayen da vwẹ Baalberit ru ọghẹnẹ rẹ ayen.

³⁴ Ihwo rẹ Izrẹl gbe karophihọ Ọrovwohwo rẹ Ọghẹnẹ rẹ ayen, ro sivwi ayen nẹ obọ rẹ ivwighrẹn rẹ ayen ejobi na-a;

³⁵ ayen gbi vwo aruẹdọn kugbe iruo esiri kẹ uwevwi ri Jerubbaal (re se Gidiọn) ro ru kẹ Izrẹl na-a.