Iguẹdjọ 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Une ri Dẹbora kugbe Barak

¹ Ẹdẹ yena Dẹbora vi Barak ọmọ rẹ Abinoam da so ine:

² Manẹ isun ihwo na ka obaro vwẹ Izrẹl, rẹ ihwo na da vwẹ ohọrobọ rayen rhe vwene, ebruba kẹ Ọrovwohwo na,

³ Nyo, E ivie, kerhọ, E isun; Ọrovwohwo na Me cha so ine kẹ, Me so ine ọvwevwerhe kẹ Ọrovwohwo na, Ọghẹnẹ rẹ Izrẹl na.

⁴ Ọrovwohwo, ọke wọ vwọ yan phia nẹ Seir, ọke wo vwo mu oyan nẹ ubrakpọ rẹ Edọm, otọ na de kpogho, odjuvwu na ejobi de sunrhe, uyota, ame de sun nẹ idedeghe rhe,

⁵ Igbenu ride na ki kpogho vwẹ obaro rẹ Ọrovwohwo, vwẹ abọ oboyi ri Sinae vwẹ obaro rẹ Ọrovwohwo na, Ọghẹnẹ rẹ Izrẹl na

⁶ Vwẹ ọke ri Shamgar, ọmọ rẹ Anat, vwẹ ọke ri Jael, usun rẹ ekẹtẹkẹtẹ da daji otu rẹ eyoyan na da ra wan oghrẹnghrẹn.

⁷ Eghwẹrẹ rẹ Izrẹl da daji, ayen da obọ ji bẹsiẹ wọwẹ, ri Dẹbora vwo Vrẹn, wo de Vrẹn kiri oni vwẹ Izrẹl

⁸ Ọke rẹ ayen vwọ jẹn edjọ ekpokpọ reyọ, Etiyin ofovwi de rhi te inurhoro ka mrẹ ekpọfia eyẹ ishuẹ vwẹ ohri rẹ ihwo uriori ujuvẹ vwẹ evun rẹ Izrẹl na?

⁹ Udu mẹ de bru inotu rẹ ofovwi rẹ Izrẹl ra re vwẹ ọhọrobọ rayen ọvo vwẹ oma rayen ze kẹ ihwo na. Ebruba kẹ Ọrovwohwo na.

¹⁰ Gbe ikun rọye, ovwan re gua ekẹtẹkẹtẹ re vwara gbagbagba, ovwan ri tidia eruẹ rẹ edafe kugbe ovwan re yan vwẹ idjerhe.

¹¹ Edo re eha ọ vwevwerhe vwẹ asan rẹ ame epha, Etiyin ayen da vwanriẹn ikun rẹ ephiokparobọ rẹ Ọrovwohwo na, ephiokparobọ rẹ eghwẹrẹ rẹ Izrẹl. Etiyin ihwo rẹ Ọrovwohwo na de ne udje kpo ughere na.

¹² Vrẹn, vrẹn Dẹbora! Vrẹn, vrẹn wo so ine Vrẹn, Barak, wo sun ighuvwu wẹn yanran E ọmọ rẹ Abinoam.

¹³ Etiyin ehọnvwọnre ri chekọ de ne udje rhe; ihwo rẹ Ọrovwohwo na de ne udje fiki rọye vwọ so egba na.

¹⁴ Nẹ obi Ifrem rhe ayen de mu oyan re te obi iyara na, ri nene uwe, Bẹnjamin, vẹ orua wẹn, nẹ Maka inotu rẹ ofovwi na de ne udje, nẹ Zẹbulọn ihwo re ghwa ọkpọ rẹ ogba rẹ ofovwi nurhe.

¹⁵ Isun rẹ Isaka de nene Dẹbora rhe, Isaka de vwo evuesiri kẹ Barak; vwẹ evun rẹ iyara na ayen da họrhọ nene vwẹ obuko. Vwẹ usun rẹ ihwo ri Rubẹn oboyi ihwo re vwẹ udu hiẹ otọ rẹ emu ejobi epha.

¹⁶ Die wọ vwọ hẹrhẹ vwẹ usun rẹ ogba rẹ igodẹ wọ vwọ kerhọ rẹ umri rẹ urephe re hworo kẹ igegede? Vwẹ usun rẹ ihwo ri Rubẹn oboyi ihwo re vwẹ udu hiẹ otọ rẹ emu ejobi epha.

¹⁷ Giliad da daji ẹbẹre oboyi ri Jọdan; kugbe Dan, die sorọ ọ vwọ dia evun rẹ eko? Asha tidia gbiẹi vwe obọ erhuru re urhie, ọ ghwa dia kerẹ asan ro gbo phihọ na.

¹⁸ Zẹbulọn ihwo re mrẹ ọdjarhe kamasan ughwu; kugbe Naftali rhe, vwẹ enu rẹ ugbenu rọ aghwa na.

¹⁹ Ivie na da rhe, ayen da họnre; Etiyin ayen de phi ivie ri Kenan, vwẹ obi Taanak, vwẹ orhoma rẹ urhie ri Megiddo, ayen mrẹ idọnọ ghwẹ no-o.

²⁰ Isio rẹ obo odjuvwu da rhe họnre, ayen da rhe họnre Sisira.

²¹ Ọkẹre ri Kishọn de hwerhe ayen yanran, ọkẹre rẹ urhie rọ djẹ gbugbu, ọkẹre ri Kishọn na. Erhi mẹ, ne udje yanran, vẹ ogangan!

²² Kẹsiẹye e ki nyo edo rẹ ichiyi rẹ iyesi ri pho, ri pho kraekrae.

²³ Harhọn Merọz, Ọtiọye amakashe rẹ Ọrovwohwo tare, harhọn ihwo rọye ejobi gangan, fikiridie ayen rhe chọ Ọrovwohwo na uko-o, ayen rhe chọ Ọrovwohwo na uko vwọ họnre egba na-a.

²⁴ Jael e Me bruba kẸ vwẹ usun rẹ eya na ejobi, aye ri Heber rẹ ọmọ ri Ken, rọ dia utughẹ na wẹ e Me bruba kẹ.

²⁵ Ọ da nọ ekpẹn rẹ ame ọ da vwẹ ameivie vwọ kẹ, o de mu udjọkpọ rẹ ivwri vwọ kẹ.

²⁶ O de gbe obọ phihọ ubibẹ rẹ utughẹ ọ da vwẹ obọrhe yọnre umomo, ọ da vwọ teyọ Sisira, ọ da guọghọ uyovwi, ọ da guọghọ re fi afọnrhe.

²⁷ O de si wurhu, ọ de she, o de dophie vwẹ awọ rọye; vwẹ asan awọ rọye o de si wurhu, o de she; asan ro de she na, Etiyin o de ghwu.

²⁸ Vwẹ evakpo kẹ Etiyin ọ da riẹn ohọre, oni ri Sisira da tẹro vi uphrophro re fi otafe Die sorọ rẹ idjighere rẹ ofovwi rọye vwo kruko? Die ichiyi otọ rẹ eranvwe rẹ idjighere rẹ ofovwi rọye vwo kri ẹcha?

²⁹ Emetẹ rọye re ma ghwanre da kpahe kẹ, ẹjo, ọye ọvo da kpahe kẹ oma rọye,

³⁰ Ọ dianẹ ayen guọnọ obo rẹ ayen ru vwọ ghare ekuakua? Ọmọtẹ ọvo eye ivẹ vwọ kẹ ọshare ọvuọvo; emwa re cheri vwọ kẹ Sisira, emwa re cheri re brona phihọ, uweamwa ivẹ re cheri re brona phihọ, re Me vwọ gbanọ ọhọre mẹ ọ ghare te oma?

³¹ Ọtiọye ivwighrẹn wẹn ejobi guọghọ kufia, E Ọrovwohwo! Ẹkẹvuọvo igbeyan wẹn ejobi dia kerẹ ọnre rọ vacha vwẹ evun rẹ ogangan rọye. Otọ na de vwo omaerovwo ikpe ujuvẹ.