Iguẹdjọ 21 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Eya ra vwọ kẹ ihwo ri Bẹnjamin

¹ Ọke nana eshare rẹ Izrẹl de duvwu iyori vwẹ obi Mizpah nẹ, E jẹn ohwo ọvo vwẹ usun rẹ avwanre na vwẹ ọmọtẹ kẹ Bẹnjamin vwọ rọvwọ-ọ.

² Etiyin ihwo na da rhe obi Bẹtẹl, ayen de tidia oboyi vwẹ obaro rẹ Ọghẹnẹ re te ọke rẹ ovwọnvwọn, ayen de kuenu rẹ oviẹ.

³ Etiyin ayen da tanẹ, E Ọrovwohwo, Ọghẹnẹ rẹ Izrẹl, die nẹrhẹ emu nana ru vwẹ evun rẹ Izrẹl nonẹ na, rọ nẹrhẹ ẹgborho ọvo ghwru nẹ Izrẹl?

⁴ Vwẹ ẹdẹ rivẹ ihwo na da fobọ vrẹn, ayen da ra bọn agbada ọvo vwẹ oboyi, ayen de ze izobo ra torhẹre kugbe izobo rẹ ufuoma.

⁵ Etiyin ihwo rẹ Izrẹl da tanẹ, Ọvo herọ vwẹ orua na ejobi ro jẹ ukoko rẹ Ọrovwohwo na ẹcha? Kidie ayen duvwu iyori rode kpahe ohwo ro jẹ ukoko rẹ Ọrovwohwo ẹ ra vwi Mizpah, ohwo yena e hwe kpo erivwi.

⁶ Etiyin ẹro ri Bẹnjamin rẹ omoni rayen da don ihwo rẹ Izrẹl, ayen da tanẹ, E bru ọvo kufia nẹ oma rẹ Izrẹl nonẹ na.

⁷ Kidie avwanre che ru kẹ eya kugbe ihwo ri chekọ na, rẹ avwanre vwọ vwẹ Ọrovwohwo duvwu iyori nẹ avwanre vwẹ emetẹ rẹ avwanre vwọ kẹ ayen vwọ rọvwọ-ọ?

⁸ Ayen da tanẹ, Didi orua ọvo vwẹ Izrẹl na ri jẹ Ọrovwohwo na bro cha vwi Mizpa? E vwo no, nughe, ohwo ọvuọvo nẹ erhọn ri Jabesh Giliad rhe ukoko nana-a.

⁹ Fikiridie ọke re vwo se ihwo na koko dẹvọ, nighe, ohwo ọvuọvo rẹ ihwo ri Jabesh Giliad hẹ etiyiin.

¹⁰ Fiki rẹ ọtiọye ukoko na de ji eshare vẹ udu uriori ihwivẹ kpo oboyi, e de ji urhi kẹ ayen nẹ, Yanran rere wa vwẹ ọlọkọ hwe ihwo ri Jabesh Giliad na; te eya na kugbe imitete rayen ejobi.

¹¹ Ọnana ọyen obo ru we che ru; wan mi hwe ọshare kọshare kugbe aye kaye rọ vẹ ọshare gba mrẹ oma re kufia kakare.”.

¹² Etiyin ayen da mrẹ vwẹ usun rẹ ihwo ri Jabesh Giliad emetobẹ, imighene ujorin ẹne re vẹ ọshare je mrẹ oma dẹvọ-o. Etiyin ayen de mu ayen rhe erhọn na vwẹ obi Shilo, vwẹ otọ ri Kenan.

¹³ Etiyin ukokọ na ejobi da vwẹ ọvue rhe ihwo ri Bẹnjamin rẹ obo oragha ri Rimmọn, e de re ghwoghwo ufuoma kẹ ayen.

¹⁴ Etiyin Bẹnjamin de rhivwi rhe vwẹ ọke yena; ayen da vwẹ eya ri Jabesh Giliad re hweri-i na vwọ kẹ ayen; ẹkẹvuọvo i te kẹ aye-en.

¹⁵ Etiyin ẹro ri Bẹnjamin da dọ ihwo na fikiridie Ọrovwohwo na gbere ughwru phihọ orua rẹ Izrẹl na ejobi nure.

¹⁶ Etiyin ekpako rẹ ukoko na da tanẹ, kidie avwanre che ru vwọ kẹ eya ra vwọ kẹ ihwo ri chekọ na, re eya ri Bẹnjamin vwọ guọghọ kufia nure na?

¹⁷ Etiyin ayen da tanẹ, A vwẹ uku ọvo kẹ ihwo ri Bẹnjamin ri chekọ na, rere orua ọvuọvo vwo je phoro kufia nẹ oma rẹ Izrẹl.

¹⁸ Dede na avwanre cha rhọvwe vwẹ emetẹ rẹ avwanre kẹ ayen vwọ rọvwọ-ọ. Kidie ihwo rẹ Izrẹl duvwu iyori nure nẹ, Iyori dia kẹ ohwo rọ vwẹ aye kẹ Bẹnjamin vwọ rọvwọ.

¹⁹ Eriyin na ayen da tanẹ, Nighe, orẹ rẹ ẹgbukpe rẹ Ọrovwohwo ọvo herọ vwẹ obi Shilo, rọ hẹ obọhwẹrọnre vwi Bẹtẹl, vwẹ obaro ọnre vwẹ ada rode na ro nene nẹ obi Bẹtẹl kpo obi Shikẹm, kugbe obọrhe ọnre vwi Lẹbonah.

²⁰ Etiyin ayen de ji urhi kẹ ihwo ri Bẹnjamin nẹ, yanran ra hẹrhẹ vwẹ evun rẹ ogba ri vain na,

²¹ ra rhẹrẹ; emetẹ ri Shilo da cha eha egbe, we gbe nẹ evun rẹ ogba ri vain na rhe rere we mu emetẹ ri Shilo na vwọ kẹ ọshare ọvuọvo vwọ rọvwọ, rere wa yanran kpo otọ ri Bẹnjamin na.

²² Ọke rẹ esẹ rayen eyẹ imoni rayen rẹ eshare da rhe nẹ iyenrẹn kẹ avwanre, avwanre ke cha ta kẹ ayen nẹ, vwẹ arodọvwẹ wẹn siobọ nẹ ayen kẹ avwanre; fikiridie avwanre mrẹ aye rẹ ọshare ọvuọvo vwọ kẹ vwẹ evun rẹ ofovwi yena-a, eyẹ ovwan ji mu ayen vwọ kẹ aye-en, a joma otọ-ọ ovwan cha riabe.

²³ Etiyin ihwo ri Bẹnjamin de ru ọtiọye, ayen de re mu eya reyọ kerẹ uche rẹ ayen guọnọre, igbeha na eyẹ ayen mu reyọ; etiyin ayen de rhivwi kpo orho rẹ ayen, ayen da ra bọn irere rayen, ayen da dia evun rayen.

²⁴ Etiyin ihwo rẹ Izrẹl de vrẹn nẹ etiyin vwẹ ọke yena, dohwo dorua rẹ uwevwi rọye da ra, ayen de kpo dohwo do orho rọye.

²⁵ Vwẹ ọke yena Izrẹl vwo ovie-e; dohwo dobo ri jere vwẹ ẹro rọye kọye o ruẹ.