Iguẹdjọ 18 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Mika vẹ ihwo ri Dan

¹ Vwẹ ọke yena Izrẹl vwo ovie-e. Vwẹ ọke yena orua ri Dan ke guọnọ otọ rayen vwọ riuku kẹ omobọ rayen, fikiridie ọke nana orua rẹ Izrẹl etọ rayen vwọ riuku kẹ oma raye-en

² Fiki rẹ ọtiọye na ihwo ri Dan de ji eshare iyori re goma nẹ evun rẹ orua rayen rhe, vwi Zora kugbe Eshtaol, rhe bẹbẹ guọnọ otọ rẹ ayen dia; ayen da ta kẹ ihwo na nẹ, Ovwan yanran re ni otọ na Ayen da rhe orere rẹ ugbenu rẹ Ifrem, ayen da rhe uwevwi ri Mika, ayen de won phihọ oboyi.

³ Ọke rẹ ayen rhi vwo si kẹrẹ uwevwi ri Mika, ayen de vughe urhuru rẹ ohwo ri Livae rẹ emeghene na; ayen da vwẹriẹ bro ra ta kẹ nẹ, Ono reyọ owẹ rhe obonẹ? Die wo ruẹ vwẹ etinẹ? Didi iruo wo vwori vwẹ etinẹ?

⁴ Ọ da ta kẹ ayen nẹ, Mika reyọ vwẹ phihọ iruo ọtiọna; ọ reyọ ovwẹ vwo ru orherẹn rọye.

⁵ Ayen da ta kẹ nẹ, Avwanre rẹ wẹ, rere wọ ra guọnọ otọ re ọyan rẹ avwanre na vwẹ obọ rẹ Ọghẹnẹ, rere wo ji avwanre riẹn sẹ oyan na shephihọ. Etiyin orherẹn na da ta kẹ ayen nẹ,

⁶ yanran egberhẹnẹdẹ. Ọrovwohwo vwẹ ẹro te oyan rẹ ovwan na.

⁷ Etiyin eshare iyori na da yanran, ayen da rhe Laish, ayen da mrẹ ihwo re dia oboyi na, kirobo rẹ ẹdia rayen mudia ga te, uruemu rayen da họhọ ihwo ri Sidọn, vẹ eyere fuefu ro vwo iroro ivẹ-ẹ, ọkanrovwen herọ vwẹ evun rẹ otọ yena-a, efe ọye herọ, ayen vẹ ihwo ri Sidọn yeri kugbe-e, ayen sherabọ ke ọhwohwo.

⁸ Ọke rẹ ayen vwo rhivwi bru iniọvo rayen rhe obi Zora kugbe Eshtaol, iniọvo rayen na da ta kẹ ayen nẹ, Didi iyẹnrẹn ovwan vwọ rhe?

⁹ Ayen da ta nẹ, Vrẹn, rere avwanre ra họnre ayen; kidie avwanre mrẹ otọ na nure, nighe, otọ na yovwi emu gangan. O vwo emuọvo we se ru-u? Ovwan jọphẹre, rere a ra reyọ otọ na.

¹⁰ Ọke rẹ ovwan da yanran na, ovwan che te asan rẹ ihwo re riẹn ọnana-a. Otọ na pha hẹhẹre; o muerọ nẹ, Ọghẹnẹ phi otọ na phihọ obọ rẹ ovwan nure, asan ri kemu kemu epha vwẹ evun rẹ akpọ na.

¹¹ Etiyin eshare uriọrha rẹ orua ri Dan, da ghwa ekuakua rẹ ofovwi phihọ, ayen de nẹ obi Zọra kugbe Eshtaọl,

¹² ayen da ra ghare ofovwi phihọ Kiriatjearim vwẹ evun ri Juda. Fiki rẹ ọtiọnana kọye e vwo se odẹ rẹ asan na nẹ Mahanehdan rhi te nonẹ na; nighe, asan na herọ vwẹ obuko ọnre vwi Kiriat-jearim.

¹³ Ayen da wanvrẹn oboyi kpo orere rẹ ugbenu rẹ Ifrem, rhe uwevwi ri Mika.

¹⁴ Etiyin eshare iyori re ke ji re dorhẹn rẹ otọ rẹ orere ri Laish, da ta kẹ imoni rayen nẹ, ovwan riẹnre nẹ ibuluku ọvo kugbe terafim, kugbe oma, kugbe oma re duvwuru herọ vwẹ uwevwi rọ oboyi na? Asakiephana gba jẹ iroro rẹ obe rẹ ovwan che ru

¹⁵ Ayen de phi oma phihọ ovwarhe ayen da rhe uwevwi rẹ emeghene rẹ ohwo ri Livae na, vwẹ uwevwi ri Mika, ayen da nọ ekpẹn rọye.

¹⁶ Ọke nana eshare uriorha rẹ ihwo ri Dan, re ghwa ekuakua rẹ ofovwi phihọ na, de mudia phihọ unu rẹ ughere na,

¹⁷ Etiyin eshare iyori re ke ji ra dorhẹn rẹ otọ rẹ orere na, da ro evun rẹ uwevwi na, ayen de mu oma na, kugbe ibuluku na, kugbe terafim na, kugbe oma re duvwuru na; yẹ orherẹn na mudia phihọ akakọ rẹ unu rẹ anurhoro na kugbe eshare uriorha na re ghwa ekuakua rẹ ofovwi na.

¹⁸ Ọke rẹ ihwo na vwọ ro uwevwi ri Mika rẹ ayen vwo muẹ oma na, kugbe ibuluku na, kugbe terafim na, kugbe oma re duvwuru na, Etiyin orherẹn na da ta kẹ ayen nẹ, Didi emu ovwan ruẹ na?

¹⁹ Ayen da ta kẹ nẹ, Fotovwi, vwo obọ di unu wẹn, rere wo bru avwanre rhe, rere wọ rhe dia ọsẹ kugbe orherẹn kẹ avwanre. Ọvo ri me je we rere wọ dia orherẹn kẹ uwevwi rẹ ohwo ọvo gbenẹ orherẹn rẹ orua rẹ uwevwi rẹ Izrẹl?

²⁰ Ivun da vwerhe orherẹn na; o de ku ibuluku na, kugbe terafim na, kugbe oma na, ọ da ro uherevie nene ayen yanran.

²¹ Ọtiọye na ayen da rhẹriẹ oma ayen da yanran, ayen da vwẹ imitete na kugbe eranvwe kugbe emu rayen ejobi ka obaro rayen.

²² Ọke rẹ ayen vwọ yan nẹ egodo ri Mika shesheri re, Etiyin eshare re evun rẹ iwevwi re kẹrẹ uwevwi ri Mika de se oma koko ayen da vwọ tua ihwo ri Dan mu.

²³ Ayen de bunu phihọ ihwo ri Dan na, ayen vwọ rhẹriẹ oma nẹ obuko ayen da ta kẹ Mika nẹ, Die kpokpo uwe re wọ vẹ otu ọtiọna vwọ rhe?

²⁴ Etiyin ọ da ta kẹ ayen nẹ, ovwan reyọ edjọ mẹ re me manre, kugbe orherẹn mẹ yanran, kidie rhe chekọ kẹ vwẹ?

²⁵ Ihwo ri Dan na da ta kẹ nẹ, Wo rhe bunu kpahe avwanre-e, ọ da nẹrhẹ otu ri mu ophu rhe họnre owẹ, wo de rhe ku arhọ wẹn kugbe arhọ rẹ uwevwi wẹn kufia.

²⁶ Etiyin ihwo ri Dan na da yanran kpo; ọke ri Mika vwọ mrẹ nẹ ayen goma nọ ọye, ọ de rhivwi kpo uwevwi rọye.

²⁷ Ayen vwo mu ekuakua rẹ Mika, kugbe orherẹn rọye reyọ nu, etiyin ihwo ri Dan na da rhe Laish, ayen de bru ihwo na ri yerẹ akpọ ofuefu vwẹ orere rayen, ayen da vwẹ ọlọkọ guọghọ ihwo na, ayen da vwẹ erhanre torhẹ orere na

²⁸ O rhe vwo ohwo ro sivwi ayen rhọ-ọ fikiridie orere na sheri kẹ Saidọn, ayen ohwohwo yeri kugbe-e. Ọ da dia iyara ro hẹ evun ri Bẹtrẹhọb asan na epha. Ayen da rhoma bọn orere na, ayen da dia evun rọye.

²⁹ Etiyin ayen de mu odẹ kẹ orere na nẹ Dan vwọ kpahe odẹ rẹ ọsẹ rayen rode re se Dan, ohwo re vwiẹ kẹ Izrẹl, ẹkẹvuọvo Laish ọye odẹ re ke mu kẹ orẹre na jovwo.

³⁰ Ihwo ri Dan na da vwẹ oma ọvo vwo mu kẹ oma rayen; Jonatan ọmọ ri Gẹshọn, ọmọ ri Mosis, kugbe emọ rọye kẹ irherẹn kẹ orua rẹ ihwo ri Dan rhi te ọke re vwo mu ayen kpo otọ rẹ ọviẹn.

³¹ Ọtiọye na ayen da vwẹ oma rẹ Mika duvwuru na vwo vi phihọ Shiloh vwẹ ọke rẹ uwevwi rẹ Ọghẹnẹ vwọ herọ.