Iguẹdjọ 17 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹdjọẹgọ ri Mika

¹ Ọshare ọvo da herọ vwẹ orere rẹ ugbenu rẹ Ifrem, ode rọye Mika.

² Ọ da ta kẹ ọni rọye nẹ, ibro rẹ idọnọ ujọri uhwọvo ra reyọ mie we ye, ru wo duvwu iyori phihọ ye, re wọ ta ota rọye phihọ erhọn mẹ ye, nighe idọnọ na rhe vwe; Mẹvwẹ re reyerọ. Oni rọye da ta nẹ, Ebruba kẹ ọmọ mẹ vwẹ oma rẹ Ọrovwohwo na.

³ O de phi ibro rẹ idọnọ ujori uhwọvo na phihọ otọ kẹ oni rọye; oni rọye da tanẹ, Me reyọ idọnọ na nẹ obọ mẹ vwọ kẹ ọmọ mẹ rere e ruọ fon kẹ Ọrovwohwo, rere a vwọ kare oma kugbe oma re duvwuru; eriyin na mi phi rọ phihọ otọ kẹ wẹ

⁴ Ọtiọye ọke rọ vwo phi idọnọ na phihọ otọ kẹ oni rọye nu, oni rọye da reyọ ibrọ rẹ igho ẹko uri rẹ idọnọ na vwọ kẹ ọdjọgu, rere ọ vwọ kare oma kugbe oma re duvwuru; e de muo phihọ uwevwi ri Mika.

⁵ Ọshare na re se Mika na de vwo ẹshẹ, o de ko ibuluku kugbe terafim, ọ da sanọ ọvo vwẹ usun rẹ emọ rọye rẹ eshare na vwo mu, vwo ru orherẹn rode rọye

⁶ Vwẹ ọke yena, Izrẹl vwo ovie ọvuọvo-o; dohwo vẹ obọ ri jere vwẹ ẹro kọye o ruẹ kẹ oma rọye

⁷ Emeghene ọvo ri Bẹtlẹhẹm ri Juda da herọ ọ rẹ orua ri Juda, ohwo ri Livae o ruẹ, ọ da kpare oyan kpo oboyi.

⁸ Ọshare na de vrẹn nẹ orere ri Bẹtlẹhẹm ri Juda, rọ vwọ guọnọ asan rọ dia; rọ vwọ yan oyan na, o de te orere rẹ ugbenu rẹ Ifrem rẹ uwevwi ri Mika epha.

⁹ Mika da ta kẹ nẹ, Tivọ wo nurhe? Ọ da ta kẹ nẹ, Mẹvwẹ ohwo ri Livae ri Bẹtlẹhẹm ri Juda, me kpare oyan kpo asan re me cha dia.

¹⁰ Mika da ta kẹ nẹ, Nene uvwe dia rere me vwẹ owẹ ru ọsẹ kugbe orherẹn mẹ, me kẹ wẹ ibro rẹ idọnọ ihwe, kugbe iwun kugbe emu ra ria rẹ ẹgbukpe. Etiyin ohwo ri Livae na da ro uwevwi.

¹¹ Ohwo ri Livae na da rhọvwe nẹ ọye nene ọshare na dia, emeghene na vẹ ọshare na da dia kerẹ ọvo vwẹ usun rẹ emọ rọye rẹ eshare na.

¹² Mika da vwẹ ohwo ri Livae na vwo mu, emeghene na de rhi hirhe phihọ orherẹn rọye, ọ dia evun rẹ uwevwi rẹ Mika.

¹³ Etiyin Mika da tanẹ, Ọke nana me ke riẹn nẹ Ọrovwohwo na che fe vwe, fikiridie me vwẹ ohwo ri Livae vwo ru orherẹn mẹ.