Iguẹdjọ 16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Samsin vwi Gaza

¹ Samsin da yanran kpo Gaza, ọ da mrẹ igberadja ọvo vwẹ oboyi, o de bro kpo uwevwi.

² A da ta kẹ ihwo ri Gaza nẹ, Samsin rhe etinẹ, ayen da ra gba hẹrhẹ vwẹ anurhoro rẹ orere na vwẹ evun rẹ ason na ejobi. Ayen de fotovwi gbiei vwẹ ason na ejobi, tanẹ Jẹn avwanre hẹrhẹ bẹsiẹ ro vwo te irhiọke ride; etiyin avwanre ki hwe.

³ Ẹkẹvuọvo Samsin de shevwerhẹ re te uherevie ason ọke rọ vwọ te uherevie ason re o de vrẹn ọ da yọnrọn ẹchẹ kugbe ichivwo ivẹ rẹ anurhoro rẹ orere na, o de yoro ayen, te ogba te ichivwo rẹ ayen ejobi, o de mu ayen phihọ igabọ rọye ọ da ghwẹ ayen phihọ enu rẹ ugbenu rọ obaro ri Hebrọn.

Samsin vẹ Dẹlila

⁴ Rẹ ọnana vwọ wan nu ọ da ra guọnọ aye ọvo vwẹ iyara ri Sorẹk, odẹ re se aye na ki Delila.

⁵ Etiyin ihwo ride ri Filistia da rhe ta kẹ aye na nẹ, Gha riẹriẹ, rere wọ riẹn asan rẹ ogangan rọye rode na epha, kugbe ogangan rẹ avwanre vwo muo, rere avwanre mrẹ asan rhe nyẹ muotọ gba; avwanre ọhwo ọvuọvo ke cha kẹ wẹ ibro rẹ igho efuanfon ujori uhwọvo.

⁶ Etiyin Dẹlila da ra ta kẹ Samsin nẹ, Biko ta kẹ vwẹ asan rẹ ogangan wẹn rode na epha, kugbe emu ra sa vwọ gba wẹ, kugbe ọ ra vwọ nyẹ wẹ muotọ.

⁷ Samsin da ta kẹ aye na nẹ, ọ da dianẹ ayen vwẹ irihrẹ ighwrẹn ekpokpọ rẹ umurhabọ re je ya-a vwọ gba vwẹ, oma kọ cha ghwọro ovwẹ, ke me cha dia kerẹ ohwo ghevweghe.

⁸ Etiyin ihwo ride ri Filistia da reyọ irihrẹ ighwrẹn ekpokpọ rẹ umurhabọ re je ya-a vwo rhe aye na, ọ da reyọ vwọ gba ọshare na.

⁹ Ọke nana o de phi eshare phihọ evun ri sioma nu vwọ hẹrhẹ Aye na da ta kẹ nẹ Ihwo ri Filistia na rhere, Samsin! Ẹkẹvuọvo o de vwrẹn irihrẹ na kerẹ oruru rẹ erhanre torhẹre. Ọtiọye na a gbe riẹn odjahọ rẹ ogangan rọye-e.

¹⁰ Dẹlila da ta kẹ Samsin nẹ, Nighe, wọ vwo vwẹ jehwẹ, wọ je phiẹn vwẹ; biko ta kẹ vwẹ obo ra sa vwọ gba wẹ.

¹¹ Ọ da ta kẹ aye na nẹ, Ọ da dianẹ ayen reyọ irihrẹ ekpokpọ ra je vwọ gba emu-u, vwọ gba vwẹ, oma kọ cha lọhọ ovwẹ, ke me cha dia kerẹ ohwo ghevweghe.

¹² Eriyin na Dẹlila da reyọ irihrẹ ekpokpọ na vwọ gba, ọ da ta kẹ nẹ, Ihwo ri Filistia na rhere, Samsin! Ihwo re hẹrhẹ na de sioma nu vwẹ evun rẹ uvun. Ẹkẹvuọvo ọ da sanvwe irihre na nu abọ rọye kerẹ ohwo rọ sanvwe oruru kufia.

¹³ Dẹlila da ta kẹ Samsin nẹ, Wọ je vwẹ ovwẹ jehwẹ rhi te ọke nana, wọ da vwọnrọn efian kẹ vwẹ; ta kẹ vwẹ obo ra sa vwọ gba wẹ. Ọ da ta kẹ aye na nẹ, Wo de me osunsun rẹ ẹton ighwrẹn rẹ uyovwi mẹ na wo de churo mu irhe re vwo rhuo emwa na wo da chahọ mu ubibẹ kokoroko, oma kọ cha lọhọ ovwẹ, ke me cha họhọ ohwo ghevweghe.

¹⁴ Eriyin na ọke rọ vwọ vwerhe, Etiyin Dẹlila de me osunsun ighwrẹn rẹ ẹton rẹ uyovwi rọye na churu mu irhe re vwo rhuo emwa na. Ọ da kanre ubibẹ muo kokoroko, ọ da ta kẹ nẹ, Samsin ihwo ri Filistia na rhe vwọ so wẹ! Ẹkẹvuọvo rọ vwọ rhọvwọ nẹ ọvwerhẹ rhe ọ de yoro ibibẹ na kugbe irhe re vwo rhuo emwa na kufia.

¹⁵ Aye na da ta kẹ nẹ, Die nẹrhẹ wọ tanẹ, Me guọnọ owẹ, ye wọ vwẹ iroro phiẹn vwẹ? Etiyin asiarha wọ vwẹ ovwẹ jehwẹ re, wo dje asan rẹ ogangan wẹn rode na epha kẹ vwẹ-ẹ.

¹⁶ Ọke rẹ aye na vwọ ta eta vwọ ghwọrọ oma kẹdẹkẹdẹ re, ofun de rhi dje, erhi rọye de muo ophu rẹ ughwu.

¹⁷ Ọ da vwẹ iroro rọye ejobi phia kẹ aye na nẹ, A vwẹ arẹn te uyovwi mẹ-ẹ; kidie mẹvwẹ Ojigbo rẹ Ọghẹnẹ nẹ evun rẹ oni mẹ rhe. A da waren ẹto mẹ., ogangan mẹ ko che vrẹn nẹ oma mẹ, oma kọ cha lọhọ ovwẹ, ke me cha dia kerẹ ohwo ghevweghe.

¹⁸ Ọke ri Dẹlila vwọ mrẹ vughe nẹ ọ vwẹ iroro rọye ejobi phia kẹ nure, etiyin o de ji re se ihwo ride ri Filistia tanẹ Ovwan yanrhe obọvo nana, fikiridie ọ vwẹ iroro rọye ejobi phia kẹ vwẹ nure. Etiyin ihwo ride ri Filistia de bru aye na rhe, ayen da ghwẹ igho phihọ abọ rayen rhe.

¹⁹ Aye na da riẹriẹ phihọ ọvwerhẹ vwẹ awọ rọye; o de se ọshare ọvo rhe re waren osunsun ighwrẹn rẹ ẹto rẹ uyovwi rọye ejobi no. Aye na de muohọ elaghọ, ogangan rọye de vrẹn no oma.

²⁰ Aye na da ta kẹ nẹ, Samsin, ihwo ri Filistia na rhere rhi mu we! Ọ da rhọvwọ nẹ ovwerhẹ rhe, ọ da ta nẹ, Mi kpo otafe kirobo mi ruẹ jovwo, rere Me ra sasa oma mẹ. Ọ gbe riẹn nẹ Ọrovwohwo yan jẹn ọye vwo-o.

²¹ Ihwo ri Filistia na de muo, ayen de yoro ibiẹro rọye ivẹ na no, ayen de muo rhe Gaza, ayen da vwẹ igoni rẹ enrovwo buebu kanrọ; ayen de muo phihọ uwodi vwẹ asan re de wuye ọka.

²² Ẹkẹvuọvo ẹto rẹ uyovwi rọye ra wanre na da rhoma grọ kpenu.

Ughwu ri Samsin

²³ Ọke nana ehọnvwọre ri Filistia ejobi de rhi koko rere ayen ze izobo rode kẹ Dagọn rẹ ẹdjọ rayen, rere ayen rhe ghọghọ, fikiridie ayen tare nẹ, Ẹdjọ rẹ avwanre phi Samsin ọvweghrẹ rẹ avwanre phihọ obọ rẹ avwanre nure.

²⁴ Ọke rẹ ihwo na vwọ mrẹ nure, ayen de jiri ẹdjọ rayen; kidiẹ ayen tare nẹ, Ẹdjọ rẹ avwanre phi ọvweghrẹ rẹ avwanre phihọ obọ rẹ avwanre, igbulegbu ro kpokpo orere rẹ avwanre, rọ guọghọ ihwo rẹ avwanre buebu.

²⁵ Ọke rẹ oma vwọ vwerha ayen re, ayen da tanẹ, se Samsin na rhe, rere o gbeha kẹ avwanre. Eriyin ayen de se Samsin nẹ evun rẹ uwodi na rhe, o de gbeha ke ayen. Ayen de mu Samsin mudia uherevie rẹ ichivwo rẹ uwevwi na

²⁶ Samsin da ta kẹ ọmọshare rọ yọnrọn obọ vwọ yan na nẹ, Ji uvwe yọnrọn ichivwo rẹ uwevwi na ghwoma nyẹ na, rere me vwẹ oma rẹrẹ ayen.

²⁷ Ọke nana uwevwi na da rhe vọn vẹ eshare kugbe eya; kugbe ehọnvwọre ri Filistia ejobi, eshare vẹ eya ri nughe rẹ eha ri Samsin vwẹ enu rẹ uwevwi na, kerẹ ihwo uriori erha.

²⁸ Etiyin Samsin de kperi se Ọrovwohwo tanẹ, E Ọrovwohwo Ọghẹnẹ, karophihọ ovwẹ, me rẹ wẹ, gbe ru uvwe goma, me rẹ wẹ, obọ nana ọvo, E Ọghẹnẹ, rere me sa vwọ choja rẹ ibiẹro mẹ ivẹ na vwẹ uyovwi rẹ ihwo ri Filistia na.

²⁹ Samsin da yọnrọn ichivwo ivẹ rẹ uherevie rẹ uwevwi na, o de rhiri oma nyẹ ayen, ọ da vwẹ obọrhe yọnrọn ọvo ọ da vwe obọhwẹre yọnrọn ọrivẹ.

³⁰ Samsin da ta nẹ, Ghe jẹn uvwe vẹ ihwo Filistia na ghwu kugbe. Etiyin ọ da vwẹ ogangan vwo rhiri oma rhe otọ; uwevwi na de rhurie she teye ehọnvwọre na kugbe ihwo ejobi re evun rẹ uwevwi na. Ọtiọye na ihwo ro hweri vwẹ ọke rẹ ughwu rọye de bunọ ihwo ro hweri vwẹ ọke rọ vwọ akpọ.

³¹ Etiyin imoni kugbe orua rọye ejobi de rhi muo re shi phihọ ogbẹ rẹ Manoa rẹ ọsẹ rọye vwẹ uvwre ri Zora kugbe Eshtaol. O de guẹdjọ rẹ Izrẹl ẹgbukpe uje.