Iguẹdjọ 15 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ọke ọvo vwo wan nu, vwọ ọke ra vwọ kọrọ orhọ rẹ eka, Samsin da reyọ ọmọ rẹ ẹvwe o de re won aye rọye: ọ da tanẹ, Mi bru aye mẹ kpo evun rẹ uvun. Ẹkẹvuọvo ọsẹ rẹ aye rọye rhọvwe kẹ-ẹ.

² Ọsẹ rẹ aye rọye na da tanẹ, Mi roro nẹ aye na tu we oma gangan; kọye sorọ me vwọ reyọ vwọ kẹ otu wẹn. Oniọvo rọye rẹ otete na yovwi nọ aye wẹn na? Biko reyọ vwo wene.

³ Samsin da ta kẹ ayen nẹ, Ọke nana mi de che ru ihwo rẹ Filistia na emu omiomiovwi, o rhe vwo ohwo rọ sa harhe ovwẹ-ẹ.

⁴ Eriyin na Samsin de re mu irhiranko uri gbe ujori, ọ da reyọ ituerhanre, o de churu rhurhuvwu re irhiranko na ivivẹ kugbe, ọ da gba ituerhanre na ọvuọvo mu uherevie rẹ irhurhuvwu rẹ irhiranko na ivivẹ na.

⁵ Ọke ro vwo phopho erhanre na mu nu, o de ji irhiranko na yanran ra ro evun rẹ ugbeka rẹ ihwo ri Filistia, ugbeka kugbe aghwa rẹ oliv ri Filistia da torhẹ djenu.

⁶ Etiyin ihwo ri Filistia na da tanẹ, Ono ru emu nana? Ayen da kpahe nẹ, Samsin ọgọ rẹ ohwo ri Timna na, kidie o miere aye vwọ kẹ ugbeya rọye. Etiyin ihwo rẹ Filistia da ra vwẹ erhanre torhẹ aye na kugbe ọsẹ rọye hwe

⁷ Samsin da ta ke ayen nẹ, Ọ da dianẹ ọtiọna kọye ovwan ruru, mi duvwi iyori nẹ kpẹsiẹ mi reihri rọye vwẹ uyovwi rẹ ovwan nu-u, mi ji ovwan vwo-o.

⁸ Ọ da ra họnre guọghọ ayen hwe buebu; ọ da yanran ra dia evun rẹ unu vwẹ oragha rẹ Etam.

Samsin phi ihwo ri Filistia kparobọ vwi Lẹhi

⁹ Etiyin ihwo ri Filistia da kpare ofovwi kpo Juda, ayen da ra ghare ofovwi phihọ Lẹhi.

¹⁰ Eshare ri Juda da ta nẹ, Die sorọ ovwan rhe vwọ họnre avwanre? Ayen da ta nẹ, avwanre rhe gba Samsin, rere avwanre ruo kirobo ro ru avwanre.

¹¹ Etiyin Eshare uriori erha ri Juda da yanran kpo asan rẹ oragha rẹ Etam epha, ayen da ta kẹ Samsin nẹ, Wọ riẹnre nẹ ihwo ri Filistia ri sun avwanre-e? Ọnana didi emu wo ru avwanre na? Ọ da ta kẹ ayen, Ọtiobo rẹ ayen ru uvwe te, ọtiọye mi ji ru ayen te.

¹² Ayen da ta kẹ nẹ, Avwanre rhere rhi mu we gba, rere avwanre vwẹ owẹ rhe ihwo ri Filistia na. Samsin da ta kẹ ayen nẹ, Ovwan duvwi iyori kẹ vwẹ nẹ ọ dianẹ ekpuyovwi rẹ ovwan ri che she hwe vwe-e.

¹³ Ayen da ta kẹ nẹ, Ẹjo; avwanre de rhe gba we rere avwanre mu we rhe rayen; avwanre che hwe we-e. Ọtiọye na ayen da vwẹ ifi ekpokpọ ivẹ vwọ gba, ayen de muo nẹ asan oragha na.

¹⁴ Ọke ro vwo te Lẹhi, ihwo rẹ Filistia de kuvwie bro rhe; etiyin Erhi rẹ Ọrovwohwo de muo gangan irihrẹ ra vwo gba abọ na kẹ lẹ tutu kerẹ emu ra vwẹ erhanrẹ torhẹ, irihrẹ na da rha nẹ abọ ghwrọnrọn she phihọ otọ.

¹⁵ Etiyin ọ da mrẹ ubeku ọkpokpọ rẹ ọhwa rẹ ekẹtẹkẹtẹ ọvo, ọ da reyọ, o de vwo hwe eshare uriori.

¹⁶ Samsin da tanẹ, Ubeku rẹ ọhwa rẹ ekẹtẹkẹtẹ ọvo ọye ẹko vwo she rhurhu ẹko, ubeku rẹ ọhwa rẹ ekẹtẹkẹtẹ ọvo ọye mi vwo hwe eshare uriori.

¹⁷ Ọke rọ vwọ ta ota na nu, o de phi ọhwa rẹ ekẹtẹkẹtẹ na kufia; e de mu odẹ kẹ asan na nẹ Ramatlẹhi.

¹⁸ Urhuru rẹ ame de rhi hwe gangan, o de kperi se Ọrovwohwo tanẹ, Wẹ ri phi ogangan rode re esivwo phihọ obọ rẹ odibo wẹn, urhuru rẹ ame gbe hwe vwe ghwu, rere mi she phihọ abọ rẹ ihwo ri jeyanvwọ na?

¹⁹ Ọghẹnẹ da bẹrẹ ukpotọ ọvo rhie phihọ vwi Lẹhi; ame da djẹ nẹ evun rọye rhe; ọke rọ vwọ da ame na nu, erhi rọye de bro rhe, oma rọye de rherhevi. Eriyin na e de mu odẹ kẹ asan na nẹ Enhakkọre; asan na je herọ vwi Lẹhi rhi te nonẹ na.

²⁰ O de guẹdjọ rẹ Izrẹl ikpe uje vwẹ ọke rẹ ihwo ri Filistia.