Iguẹdjọ 14 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Samsin Kugbe Aye Timna

¹ Samsin da yanran kpo obi Timna, ọ da mrẹ ọmọtẹ ọvo vwẹ usun rẹ emetẹ ri Filistia vwi Timna;

² Ọ da rhe ta kẹ ọsẹ vẹ oni rọye nẹ, Me mrẹ ọmọtẹ ọvo vwẹ usun rẹ emetẹ ri Filistia vwi Timna; asakiephana reyọ kẹ vwẹ vwọ rọvwọ.

³ Ẹkẹvuọvo ọsẹ vẹ oni rọye da ta kẹ nẹ, Wọ mrẹ aye vwẹ usun rẹ emetẹ rẹ orua wẹ-ẹn, eyẹrẹ vwẹ usun rẹ ihwo rẹ avwanre-e, ru wọ ra vwọ reyọ aye ri Filistia ihwo re yanvwa-a? Ẹkẹvuọvo Samsin da ta kẹ ọsẹ vẹ oni rọye nẹ, Reyọ aye na kẹ vwẹ, fikiridie o je vwe gangan.

⁴ Ọsẹ vẹ oni rọye gbe riẹn nẹ obọ rẹ Ọrovwohwo ọye emu na nurhe-e; fikiridie ọ guọnọ idjerhe ro vwo nene Filistia na họnre Kidie ihwo ri Filistia vwẹ ogangan sun Izrẹl vwẹ ọke yena.

⁵ Etiyin Samsin kugbe ọsẹ vẹ oni rọye de kpo obi Timna, o de rhi te asan ogba ri vain ri Timna Nighe, ọmọ rẹ okpohrokpo ọvo re do muo,

⁶ Erhi rẹ Ọrovwohwo na de muo gangan, ọ da bẹrẹ okpohrokpo na ẹbẹre ivẹ kerẹ ohwo rọ bẹrẹ ọmọ rẹ ẹvwe; ọ vwẹ emu ọvuọvo yọnrọn ọbọ-ọ. Ẹkẹvuọvo o gbe ikun rẹ emu ro ruru na kẹ ọsẹ vẹ oni rọye-e.

⁷ Etiyin o de bru aye na ra re nene ta ota; aye na de je Samsin gangan.

⁸ Ọmọke vwọ wan nu o de rhivwi ra reyọ aye na; rọ vwọ vwẹriẹ re ni orivwi rẹ okpohrokpo rọ hweri na; nighe ekru rẹ enyọ da ro phihọ oma rẹ okpohrokpo na.

⁹ Ọ da ghwiẹ ọnyọ na phihọ abọ rọye, ọ da riọ yọ yan bẹsiẹ ro vwo te asan rẹ ọsẹ vẹ oni rọye epha; ọ da kẹ ayen, ayen da re. Ẹkẹvuọvo ọ ta kẹ ayen nẹ oma rẹ okpohrokpo ro ghwuru, na ọ reyọ ọnyọ na nurhe-e.

¹⁰ Etiyin ọsẹ rọye da yanran bru aye na, Samsin de chere emu vwẹ oboyi; kirobo rẹ uruemu rẹ imighene rẹ emeshare rẹ oboyi epha.

¹¹ Ọke rẹ ihwo na vwọ mrẹ, ayen da reyọ otu rọye ọgban vwọ kẹ nẹ e dia kẹrẹ.

¹² Samsin da ta kẹ ayen nẹ, Ji mi gbe idọ ọvo kẹ ovwan se ovwan sa fa bẹsiẹ rẹ ẹdẹ ighwrẹn rẹ orẹ na vwọ gba, ovwan da riẹn otọ rọye, ke me cha kẹ ovwan iwun ọgban ra vwẹ isada rhuo kugbe iwun rẹ ọreotu ọgban;

¹³ ẹkẹvuọvo ovwan gbe sa fa otọ rọye kẹ vwẹ-ẹ, ovwan ke cha kẹ vwẹ iwun ọgban ra vwẹ isada rhuo kugbe iwun ọgban rẹ ọreotu Ayen da ta kẹ nẹ, ki gbe ido wẹn, na rerẹ avwanre nyo.

¹⁴ Ọ da ta kẹ ayen nẹ, Oma rẹ ọriemu: ọye emuọre nẹcha. Obo re ganre ọye obo re miẹmiẹ nẹcha. Ayen gbe sa fa otọ rẹ ido na vwẹ ẹdẹ erha-a.

¹⁵ Vwẹ ẹdẹ rẹne ayen da ra ta kẹ aye ri Samsin nẹ, Riẹriẹ ọshare wẹn rere ọ fa otọ rẹ ido na kẹ avwanre, wo rhe ru ọtiọye-e avwanre cha vwẹ erhanre torhẹ owẹ kugbe uwevwi rẹ ọsẹ wẹn Gbenẹ wo rhi se esọn hwe avwanre

¹⁶ Etiyin aye ri Samsin da viẹ vwẹ obaro rọye, ọ da ta kẹ nẹ, Mi tuwe oma, wọ guọnọ ovwẹ-ẹ; wo gbẹ ido ọvo kẹ ihwo rẹ orere mẹ, wọ fa otọ rọye kẹ vwẹ-ẹ. Ọ da ta kẹ aye na nẹ, Nighẹ, me rhọvwe fa otọ rọye kẹ ọsẹ mẹ vẹ oni mẹ-ẹ, wọwẹ kọyẹ me cha fa otọ rọye kẹ?

¹⁷ Aye na da viẹ vwẹ obaro rẹ ọshare rọye bẹsiẹ rẹ ẹdẹ ighwrẹn rẹ orẹ na vwo te; ẹdẹ rẹ ighwrẹn na vwọ gba nu ọ da fa otọ rẹ ido na kẹ ayẹ rọye, kidiẹ ayẹ na karhiẹre unu ganọ. Etiyin aye na da ra fa otọ rẹ ido na kẹ ihwo rẹ orho rọye.

¹⁸ Eshare rẹ orere na da ta kẹ vwẹ ẹdẹ rẹ ighwrẹn na rẹ ọren che vwo she kpotọ, Die re vwerhe nọ ọnyọ? Die re goma nọ okpohrokpo? Ọ da ta kẹ ayen nẹ: Ọ dianẹ ovwan reyọ erhuẹn mẹ rẹ aye vwo voro otọ-ọ, ovwan sa riẹn otọ rẹ ido mẹ na-a.

¹⁹ Etiyin Erhi rẹ Ọrovwohwo dẹ muo gangan, ọ da yanran kpo Ashkẹlọn. O de hwe eshare ọgban rẹ orho na, Ọ da ghwẹ ekuakua rayen reyọ ọ da vwọ hwosa rẹ iwun rẹ ọreotu na kẹ ihwo re fa otọ rẹ ido na. Ọ da yanran rhivwi kpo uwevwi rẹ ọsẹ rọye vẹ ophu gangan.

²⁰ Etiyin ayen dẹ miẹ Samsin aye vwọ kẹ ohwo ọfa, vwẹ usun rẹ otu rẹ ugbeya rọye na.