Iguẹdjọ 12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jẹfta vẹ Ifrem

¹ Eshare rẹ Ifrem de se otu ofovwi koko, ayen da gua vrẹn kpo Zafọn ra ta kẹ Jẹfta nẹ, Die sorọ wọ vwọ gua vrẹn ra họnre ihwo rẹ Ammọn, wo vwo jẹ avwanre ese rere avwanre nene uwe ra? Avwanre cha vwẹ erhanre torhẹ uwevwi wẹn ghene uwe.

² Jẹfta da ta kẹ ayen nẹ, Me vẹ ihwo mẹ vwo nene ihwo rẹ Ammọn họnre ohọnre rẹ orere vẹ orere, mi vwo kperi se ovwan, we se sivwi uvwe nẹ obọ rẹ aye-en

³ Ọke me vwọ mrẹ nẹ ovwan se sivwi uvwe-e, me da reyọ arhọ mẹ phihọ obọ mẹ, me da gua vrẹn nene ihwo rẹ Ammọn họnre, Ọrovwohwo de phi ayen phihọ obọ mẹ; die sorọ ovwan vwo bru vwe rhe nonẹ, rhe vwọ họnre ovwẹ?

⁴ Etiyin Jẹfta de se eshare ri Giliad ejobi koko ra vwọ họnre Ifrem, eshare ri Giliad de hwe Ifrem, kidie ayen tare ne, Ovwan ihwo rẹ Giliad ivwosoghọro we ruẹ vwẹ ohri rẹ Ifrem vi Manasse.

⁵ Ihwo ri Giliad da djẹ ka obaro ra hẹrhẹ ihwo rẹ Ifrem vwẹ uvwre ri Jọdan. Ọke rẹ ivwosoghoro rẹ Ifrem re djẹ vwọ tanẹ, Ju vwe wanvrẹn eshare ri Giliad da ta kẹ nẹ, Ohwo rẹ Ifrem wo ruẹ? Ọke rọ vwọ tanẹ, Ẹjo;

⁶ Etiyin ayen da ta, Shibbolẹt, ọ da tanẹ Sibbolẹt fikiridie ọ sa riẹn se-e; Etiyin ayen de muo ayen de hwe vwẹ uvwre ri Jọdan. Etiyin e vwo hwe ihwo rẹ Ifrem uriori ujuvẹ gbe vwẹ ẹdẹ yena.

⁷ Jẹfta de guẹdjọ rẹ Izrẹl ẹgbukpe esan, Jẹfta ohwo ri Giliad na de ghwu, e de sho vwi Giliad rẹ otorho rọye.

Ibzan, Elọn kugbe Abdọn vwẹ Izrẹlguẹdjọ

⁸ Okuko rọye Ibzan ri Bẹtlẹhẹm de guẹdjọ rẹ Izrẹl.

⁹ O de vwo emeshare ọgban; kugbe emetẹ ọgban, ọ da vwẹ emetẹ ọgban na bru egọ kẹ ihwo rẹ irere efa, ọ da reyọ emetẹ ọgban rẹ irere efa vwọ kẹ emọ rọye vwọ rọvwọ. O de guẹdjọ rẹ Izrẹl ẹgbukpe ighwrẹn

¹⁰ Etiyin Ibzan de ghwu, e de sho vwi Bẹtlẹhẹm.

¹¹ Okuko rọye Elọn ohwo ri Zẹbulọn de guẹdjọ rẹ Izrẹl; o de guẹdjọ rẹ Izrẹl ẹgbukpe ihwe.

¹² Etiyin Elọm ohwo ri Zẹbulọn na de ghwu, e de shọ vwi Aijalọn vwẹ otọ ri Zẹbulọn.

¹³ Okuko rọye Abdọn ọmọ ri Hillel ohwo ri Piratọn de guẹdjọ rẹ Izrẹl.

¹⁴ O de vwo emeshare ujuvẹ, kugbe ivwrọmọ rẹ eshare ọgban ri vwo ekẹtẹkẹtẹ ujorha gbe ihwe re vwọ gua; o de guẹdjọ rẹ Izrẹl ẹgbukpe ẹrenren.

¹⁵ Etiyin Abdọn ọmọ ri Hillẹl ohwo ri Piratọn na de ghwu, e de sho phihọ otọ rẹ Ifrem, vwẹ evun rẹ orere rọ ugbenu rẹ ihwo rẹ Amalẹk na.