Hosia 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ehwe re Hwe Izrẹl Fiki ri Jesegbuyota ro Churu Obọ mu

¹ Wọ ghọghọ-ọ, E Izrẹl! wo jẹn oma vwerha owẹ kerẹ ihwo na-a; kidie wo gbe igberadja, wọ da sen Ọghẹnẹ wẹn. Osa ra hwa kẹ igberadja ọye ri je we vwẹ utuwevwi re de wuye.

² Utuwevwi re de wuye vẹ okọ ri vain gbe sa ghẹrẹ aye-en, udi ọkpokpọ ayen gbe cha mrẹ da-a.

³ Ayen gbe cha dia otọ rẹ Ọrovwohwo na-a; ẹkẹvuọvo Ifrem che rhivwi kpo Ijipt, ayen ke re emu rijẹfuọn vwẹ otọ rẹ Asiria.

⁴ Ayen gbe jẹ udi ku Ọrovwohwo ọfa-a; ayen gbe sa vwẹ izobo rayen na phoro aro-o. Emuọre rayen kọ họhọ emu rẹ uvweri; ihwo re rerọ ejobi yi gbe ẹgua; emu ayen kẹ owẹvwe rayen ọvo ofue; a cha vwọ vwẹriẹ uwevwi rẹ Ọrovwohwo kakaka-a.

⁵ Kidie wo che ru vwẹ ẹdẹ rẹ orẹ re bruru na, kugbe ẹdore rẹ Ọrovwohwo na?

⁶ Kidie gbe nighe, ayen ra yanran kpo Asiria; Ijipt cha ghwẹ ayen koko, Mẹmfis kọye che shi ayen. Ekuakua esiri vẹ idọnọ rayen ejobi odi ko di rhurhu ayen inwe ke djẹ phihọ itughẹ rayen.

⁷ Ẹdẹ rẹ ojẹriọ na rhire, ẹdẹ rẹ osa ẹ hwa tere Izrẹl cha riẹn. Ọmraro na vwonẹ ẹkpa, ohwo rẹ erhi rheri yọ mwa orhuẹ, fiki rẹ orukuruku rode wẹn kugbe omaetuo rode.

⁸ Ọmraro na ọye ọrhẹrotọ rẹ Ifreni, ihwo rẹ Ọghẹnẹ mẹ, yẹ a kpahe ufi hẹrhẹ vwẹ idjerhe rọye ejobi, omaetuo vwẹ uwevwi rẹ Ọghẹnẹ rọye.

⁹ Ayen gbe oma rayen ku putu putu kerẹ ọke ri Gibeah; kọ karohọ orukuruku rayen, kọ guọghọ imwemwu rayen.

¹⁰ Kerẹ otiẹ vwẹ evun rẹ aghwa, ọtiọye me mrẹ Izrẹl. Kerẹ otumọ rẹ emamọ rẹ owe, re mọre vwẹ ọke ororo rọye, ọtiọye me mrẹ esẹ wẹn. Ẹkẹvuọvo ayen de bru Baal-peor rhe, ayen de rhi phorho oma ki Baal, Obo rẹ ayen guọnọre na de phi ayen phihọ ekuakua rẹ omaetuo.

¹¹ Urinrin rẹ Ifrem kọ cha rhan jovwo kerẹ ọmọphran o vwo uvwiẹ-ẹ o vwo evun ẹmrẹ-ẹ, o vwo emeranvwe ẹchọra-a.

¹² Ọ tobọ dianẹ ayen vwiẹ emọ dede mi hwe ayen, ọvuọvo gbi chekọ-ọ. Ekan kẹ ayen vwẹ ọke mi de tephe kẹ ayen

¹³ Emọ rẹ Ifrem, kirobo re me mrẹ na, a vwẹ ayen ze kẹ ughwu; Ifrem ọvo che sun emọ rọye ra teye hwe.

¹⁴ Kẹ ayen, E Ọrovwohwo– kidiẹ wọ kẹ ayen gba ke ayen evwiẹchora kugbe ivie eyaya.

¹⁵ Umwemwu kumwemwu rẹ ayen vwẹ oma phia vwi Gilgal; etiyin oma rẹ ayen wan tu vwe cha na. Fiki rẹ obrabra rẹ uruemu rayen ke me djẹ ayen nẹ uwevwi mẹ. Me gbe guọnọ ayen ọfa-a; isun rayen na ihwo rẹ okpetu.

¹⁶ A ghwiẹ Ifrem, owọ rayen yamu, ayen gbe cha mọ emamọ-ọ. Ayen da tobọ vwiẹ emọ dede ki mi hwe emọ ri je ayen na.

¹⁷ Ọghẹnẹ mẹ cha kpare ayen kufia, kidie ayen davwerhọn rọye-e; ayen ki che suosuo vwẹ ohri rẹ ẹgborho na.