Hosia 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A Ghwọku Edjẹgọ rẹ Izrẹl

¹ Phi owanre na phihọ unu wẹn, kidie udene ọ hẹ enu rẹ uwevwi rẹ Ọrovwohwo, kidie ayen miovwo ọphọ mẹ, ayen da chọ urhi mẹ.

² Mẹvwẹ ayen kperi se, Ọghẹnẹ mẹ, avwanre Izrẹl riẹn wẹn.

³ Izrẹl kọ vwẹ emuesiri jehwẹ, Ivwighrẹ cha vwọ tua.

⁴ Ayen vwẹ ivie mu, yẹ ẹkẹvuọvo ayen wan oma mẹ-ẹ. Ayen vwẹ isun mu, yẹ ẹkẹvuọvo me riẹnre-e. Idọnọ vẹ iro rayen ayen vwo duvwu ema, vwọ kẹ ẹghwọrọ rẹ ayen.

⁵ Me vwẹ upene rẹ erhuẹn wẹn jehwẹ, E Sameria. Ophu mẹ ra tua kpahe ayen. Mavọ okrite rẹ ayen ke fon

⁶ Vwẹ Izrẹl? Oruona re marọ, ọ dia Ọghẹnẹ-ẹ. Upene rẹ erhuẹn ri Sameria, ka guọghọ ivwivwuvwu.

⁷ Kidie ayen kọn odju, ayen ki che vun ogiribo. Eka ri mudia na mu emọ phihọ uko-o, ayen gbe cha mọ-ọ e da tobọ mọ erhorha ke riọ nu.

⁸ A rọ Izrẹl nure, uherevie rẹ ẹgborho efa kọye ayen epha fafarhiẹ kirẹ ekuakua ra kpare kufia.

⁹ Kidie ayen yanran kpo Asiria, kerẹ ekẹtẹkẹtẹ rẹ ivuẹghwa ro di muẹ yan; Ifrem re durhie igbeyan.

¹⁰ Owenẹ ayen re durhie ẹgborho na vwọ ba oma dede, Me cha ghwẹ ayen koko vwẹ ọmọke krẹn vwobọ ayen gbe cha vwẹ ivie kugbe isun vwo muẹ-ẹ.

¹¹ Kidie Ifrem so egbada pruru ro vwo ru umwemwu, i de ghine hirhe phihọ egbada rẹ imwemwu kẹ.

¹² Ọ dianẹ mi si irhi mẹ vwọ kẹ abọ uriori ihwe dede, ke dia gedegede kẹ ayen.

¹³ Ayen guọnọ izobo; eranvwe rẹ ayen vwo ze izobo ayen rerọ; ẹkẹvuọvo Ọrovwohwo vwẹ omavwerhovwẹ vwẹ aye-en. Asakiephana kọ karohọ orukuruku rayen, kọ guọghọ imwemwu rayen, ayen che rhivwi kpo Ijipt.

¹⁴ Kidie Izrẹl gbe karohọ Ọrọmarọ-ọ, ighẹn keye ayen bọn; Juda da bọn irere ra gba riariẹ pete pete; ẹkẹvuọvo mi che phi erhanre phihọ irere rọye, kọ torhẹ ogba ọgangan rọye.