Hosia 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Amọ, re rhivwi bru Ọrovwohwo kidie ọ bẹrẹ avwanre nure ko sivwi avwanre; O bru ora phihọ avwanre rere ọ rha gban.

² Ẹdẹ ivẹ da wan nu kọ rhọvwọ avwanre: ẹdẹ rerha kọ kpare avwame vrẹn, rere ma vwọ sa dia obaro rọye.

³ Jẹn avwanre riẹn, e jẹn avwanre davwe ra riẹn Ọrovwohwo na, e yan phia rọye muẹro kerẹ ọke ro rhie cha; O che bru avwanre rhe kerẹ eghwẹghwẹ rẹ osio, kere isio rẹ ẹsosuọ rọ kpọrhọ otọ.

⁴ Die me vwo wẹ ru, E Ifrem? Die me vwo wẹ ru, E Juda? Ẹguọnọ wẹn ọ họhọ evwru rẹ irhiọke, kerẹ ọphogho rọ fobọ ya.

⁵ Fiki rẹ ọtiọye me vwọ vwẹ emraro na she ayen me da vwẹ eta rẹ unu mẹ hwe ayen, orhiẹbro mẹ da phia kerẹ uvo.

⁶ Kidie me guọnọ ehrọre ọ dia izobo-o, erianriẹn rẹ Ọghẹnẹ, nọ izobo rẹ ẹtorhẹ.

⁷ Ẹkẹvuọvo ayen de miovwi ophọ mẹ kerẹ Adam etiyin ayen de ru vwe chọ.

⁸ Gilead ọye orere rẹ ihwo umwemwu, ri nene esi rẹ ọbara.

⁹ Kirobo rẹ iji hwa phihọ idjerhe hẹrhẹ ohwo ye, otiọye irherẹn na ji se oma koko, ayen da dia izighẹ vwẹ idjerhe ro kpo Shikẹm, uyota, ayen ru obo re brare.

¹⁰ Vwẹ evun rẹ uwevwi rẹ Izrẹl me da mrẹ okpemu rode; ọfarhiẹ rẹ Ifrem hẹ etiyin, e gbe Izrẹl ẹgua.

¹¹ Fiki wẹ rhe, E Juda, e bru ẹdẹ rẹ orhọ wo nure. Oke me vwọ vwẹ ughwẹ rẹ ihwo mẹ rhivwi rhe.