Hosia 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọrovwohwo vẹ Izrẹl Phra Aphro

¹ Nyo ota rẹ Ọrovwohwo E ihwo rẹ Izrẹl, kidie Ọrovwohwo vẹ ihwo rẹ otọ na vwo aphro. O gbi vwo ọvwata yẹrẹ aruẹdọ-ọn, ọ rhe vwo erianriẹn rẹ Ọghẹnẹ vwẹ otọ na-a;

² Iyori eduvwo, efian, ozighẹ, uji vẹ ọfarhiẹ egbe, ayen miovwo urhi ejobi, ozighẹ vwọ kpahe ozighẹ.

³ Fiki rẹ ọtiọye na otọ na de muoma phihọ, ihwo re dia otọ na ejobi oma re ro ayen, ọtiọye ji te eranvwe rẹ aghwa, kugbe ephran rẹ irharheghe, iyeri rẹ evun rẹ ame ghwrara e ji si ayen nọ.

⁴ Ejẹn ohwo ọvuọvo họnra-a ejẹn ohwo ọvuọvo se ohwo ẹdjọ-ọ, kidie me vẹ owẹ gbe vwo te, E orherẹn.

⁵ Wọ cha kpro owọ vwẹ oghẹruvo, ọmraro vẹ owẹ cha yẹnghrẹn vwẹ ason, ke me guọghọ oni wẹn.

⁶ A guọghọ ihwo mẹ fiki rẹ jẹriẹn fikiridie wọ sen erianriẹn, Me sen we nẹ wọ gbe dia orherẹn mẹ-ẹ. Ọtiobo rẹ urhi rẹ Ọghẹnẹ wẹn vwọ chọro owẹ ẹro na, emọ wẹn ke je chọro ovwẹ ẹro rhe.

⁷ Ọtiọbo rẹ ayen bute, ọtiọye ayen ji ghwe ru imwemwu kpahe ovwẹ, Me rhẹriẹ urinrin rayen vwo kpo omẹvuọ.

⁸ Vwẹ enu rẹ imwemwu rẹ ihwo mẹ koye ayen da ghẹrẹ oma rẹ ayen; Ayen hirhe phihọ ọvwurhuru fiki rẹ orukuruku rẹ ayen.

⁹ Kirobo rẹ ihwo na epha, ọtiọye irherẹn na je epha; Me vwẹ oja re ayen fiki rẹ idjerhe rayen, ke me re ihri rẹ umwemwu rayen vwẹ obọ rayen.

¹⁰ Ayen ke re, je evun vọn aye-en, ayen gbe igberadja jẹn ayen buru-u; kidie ayen siẹn Ọrovwohwo ọfarhiẹ kọye ayen gbe.

¹¹ Udi ekianke kugbe udi ọkpokpọ miẹ ayen iroro.

¹² Ihwo mẹ re duotọ rẹ akpọ vwẹ obọ rẹ ubrurhe, ọkpọ rayen kọye ayen vwọ bọ epha. Kidie urhuru sivwe rẹ ọfarhiẹ sun ayen ghwru, ayen da yan jẹn Ọghẹnẹ rayen vwo re gbe igberadja.

¹³ Ayen ze izobo vwẹ enu rẹ igbenu na, ayen da ghwẹ Izobo kpahe enu rẹ igbenu itete, vwẹ esiri rẹ ohahe, esiri rẹ afon vẹ esiri rẹ oghriki, kidie ophie rayen yovwiri. Fiki rẹ ọtiọye na emetẹ wẹn vwo gbe igberadja, rẹ epha rẹ ovwan vwo gbe ọfarhie.

¹⁴ Me cha vwẹ oja re emetẹ rẹ ovwan vwẹ ọke rẹ ayen de gbe igberadja, yẹrẹ epha rẹ ovwan vwẹ ọke rẹ ayen de gbe ọfarhie; fikiridie ekpuyovwi rẹ eshare na je ro akakọ bru igberadja na ayen vẹ iniedjọ rẹ igberadja gbe ze izobo rẹ ọfarhiẹ kugbe, ihwo ri vwo iroro-o ke cha guọghọ kufia.

¹⁵ Owene wo gbe igberadja, E Izrẹl, wo ji Juda reabe-e, Wọ vwẹriẹ Gilgal re, eyẹ wọ kpọ enu rẹ Betave-en, wo duvwu iyori nẹ, Kirobo rẹ Ọrovwohwo herọ na.

¹⁶ Izrẹl vẹ udu kọi, kerẹ erhuẹn ọshare ro vwo udu, kẹ Ọrovwohwo sa ghẹrẹ ayen vwẹ etiyin na, kerẹ ogodẹ vwẹ egbri ophephẹ?

¹⁷ Ifrem vwẹ oma ba edjọ, wa yan jo vwo.

¹⁸ Usun rẹ egbaidi ayen ejobi kẹ igberadja ayen gbe; emu rẹ omaẹvuọ ayen ma guọnọ nẹ ọ rẹ urinrin rayen.

¹⁹ Odju phare ayen phihọ ibekpe rọye, oma kọ cha vo ayen fiki rẹ agbada rayen.