Hosia 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹguọnọ rẹ Ọrovwohwo vwo kẹ Ihwo Rọye ri Gbe Ọfanrhiẹ

¹ Ta kẹ oniọvo wẹn rẹ ọshare, Ihwo mẹ, ta kẹ oniọvo wẹn rẹ ọmọtẹ nẹ, Ọ mrẹ ehrọre reyọ.

² Nene oni wẹn jẹ iroro, vuẹ kidie ọ gbe dia aye mẹ-ẹ, me gbe dia ọshare rọye-e nẹ o siobọ nẹ igberadja rọye, no si ọfarhiẹ nẹ udu rọye,

³ me da rhe ban phihọ ọ da rhe dia kerẹ ọke re vwo vwiẹ, mi de rhi ruọ hirhe phihọ aghwa mi de rhe ruo hirhe phihọ otọ ọyaya, me da vwẹ urhuru rẹ ame hwe.

⁴ Me rha re ehrọre rẹ emọ rọye-e, kidie ayen emọ rẹ ọfarhiẹ.

⁵ Kidie oni rayen gbe ọfarhiẹ; ohwo ro mrẹ evun rẹ ayen ru emu rẹ omẹvuọ. Kidie ọ tare, Mi nenẹ esen mẹ, re kẹ vwẹ emuọrẹ mẹ vẹ ame mẹ, ẹton rẹ ogegede mẹ vẹ oruru mẹ, ọfigbo mẹ vẹ udi mẹ.

⁶ Fiki rẹ ọtiọyẹ na kẹ mẹ vwẹ inwe gba idjerhe rọye me tọn igbẹhẹ phihọ ghẹnẹ, ọtiọye na ọ gbe mrẹ idjerhe rọye-e.

⁷ Ọ cha vwọ tua esen rọye, ẹkẹvuọvo ọ gbe djẹ mu aye-en kọ guọnọ ayen, jẹ ọ gbe mrẹ ayẹ-ẹn kọ ta, mẹ ra mi rhivwi bru ọsharẹ mẹ rẹ ẹsosuọ, kidie ọke yena o de me yovwi kẹ vwẹ nọ asakiephana.

⁸ Ọ gbe rha riẹn nẹ omẹvwẹ re vwẹ ọka na, vẹ udi na vẹ ọfigbo na kẹ-ẹ, nẹ mẹvwẹ re je rhaphiẹ idọnọ vẹ oro rọ rhaphiẹ kẹ Baal.

⁹ Fiki rẹ ọtiọye na ke me rhoma reyọ ọka mẹ hirhe vwẹ ọke rọye, vẹ udi mẹ vwẹ ororo rọye, me je reyọ ẹton rẹ ogegede vẹ oruru mẹ, ro vwo rhurhu ẹban rọye.

¹⁰ Asakiephana ke me ban amwa no vwẹ obaro rẹ esen rọye, ohwo ọvuọvo gbi se sio nẹ obọ mẹ-ẹ,

¹¹ Ki mi phi oba phihọ omavwerhovwẹ rọye, te erẹ rọye, tẹ ọtuphro rẹ emeranvwe rọye, ẹdidjala rọye, kugbe ẹdẹ rẹ orẹ re bruru.

¹² Ke me guọghọ irhe ri vain vi figi rọyẹ, rọ ta ota kpahe nẹ, Enana osa mẹ, rẹ esen mẹ vwọ kẹ vwẹ. Mi ru ayen hirhe phihọ egbo, eranvwe rẹ aghwa ke re ayen.

¹³ Ki mi vwẹ oja riọ fiki rẹ ẹdorẹ ri Baal ọke rọ vwọ torhẹ insens kẹ ayen rọ vwọ vwẹ Isa vẹ ejọnrọn vwọ rhuẹro oma rọye, ro de nenesi rẹ esen rọye, Me da chọrọ ẹro, ọtiọye Ọrovwohwo tare,

¹⁴ Fiki rẹ ọtiọye na, ki mi ruo re urhuru sio, ke me riẹriẹ kpo ivuaghwa, ke me vwẹ aghẹghẹ ta ota kẹ.

¹⁵ Etiyin ke me vwẹ ogba ri vain rọye vwọ kẹ, ki mi ru iyara rẹ Akọ ẹchẹ rẹ iphiẹrohọ. Etiyin ọ de che nyo kerẹ ọke rọ vwọ hẹ emeghene, kerẹ ọke rọ vwo vrẹn nẹ otọ rẹ Ijipt rhe.

¹⁶ Vwẹ ẹdẹ yena Ọrovwohwo da ta, ku wọ se vwẹ, Ọshare mẹ, wọ gbi se vwẹ Baal mẹ-ẹ.

¹⁷ Kidie mi si odẹ ri Baal nẹ unu rọye, e gbi se odẹ rayen ọfa-a.

¹⁸ Ke me vẹ owẹ cha re ọphọ vwẹ ẹdẹ yena kugbe eranvwe rẹ aghwa, ephran rẹ irharheghe, vẹ ọbo ri kpono vwẹ otọ, ke me guọghọ umurhabọ, ọlọkọ kugbe ofovwi nẹ otọ na; ke me vwẹ owẹ sherhẹ otọ gbiei.

¹⁹ Ke me rhoma sa wẹ otọ kẹ oma mẹ bẹdẹ; me sa wẹ otọ vwẹ ọ rẹ ọvwata vẹ ọsoso, vẹ ẹguọnọ esiri ro jẹrhẹriẹ vẹ arodọvwẹ.

²⁰ Me sa wẹ otọ vwẹ ọ rẹ uyota; ku wọ riẹn Ọrovwohwo na.

²¹ Vwẹ ẹdẹ yena, Ọrovwohwo da ta, ke me kpahe kẹ idjuvwu ayen ke kpahe kẹ otọ,

²² otọ ke rha kpahe kẹ eka, udi kugbe ọfigbo, ayen ejobi ke kpahe kẹ Jezrẹl,

²³ ke me kọn phihọ otọ na kẹ oma mẹ ke me re ehrọre kẹ ro vwo ehrọre-e ke me ta kẹ ihwo re dia ihwo mẹ-ẹ, Ovwan ihwo mẹ, Kọ ta nẹ, Wẹ Ọghẹnẹ mẹ.