Hosia 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọghẹnẹ re Rhẹro rẹ Ihwo Rọye ri Begheri

¹ Ọke rẹ Izrẹl vwọ hẹ omotete, me da guọnọ mi de se ọmọ me nẹ Ijipt rhe.

² Tiobo mi se ayen na, ọtiọye ayen je ghwa mrẹ vwẹ djẹ te; ayen ji ze izobo kẹ Baal, jẹn ayen ghwa torhẹ insens kẹ ema.

³ Jẹ omẹvwẹ ri yono Ifrem obo ra yan, Mi de mu ayen phihọ abọ mẹ ẹkẹvuọvo ayen riẹnre nẹ mẹvwẹ ri sivwi aye-en.

⁴ Me da vwẹ irihrẹ rẹ ehrọnre vwo sun ayen, vẹ ufi rẹ ẹguọnọ. Mi de rhi hirhe phihọ ohwo ro dogho urhukpe re vwo mu ohwo vwọ kẹ ayen, Mi de rhuẹn kpotọ ra ghẹrẹ ayen.

⁵ Ayen che rhivwi kpo otọ rẹ Ijipt, Asiria kọ cha dia ovie rayen, fikiridie ayen rhọvwe rhivwi bru vwẹ rhe-e.

⁶ Ọlọkọ kọ cha hra irere rayen, kọ guọghọ itehru rẹ inurhoro rayen, ko ghwọrọ ayen vwẹ evun rẹ ogba ọgangan rayen.

⁷ Ihwo mẹ kẹ ukuko ayen siẹ phihọ kẹ vwẹ, ọtiọye na e de kru oghwa nyẹ ayen, rẹ ohwo ọvuọvo se mu-u.

⁸ Mavọ mi se vwo siobọ nu we, E Ifrem! Mavọ mi se vwo sibọ nu we, E Izrẹl! Mavọ mi se ru we kerẹ Admah! Mavọ mi se ru we kerẹ Zeboim! Udu mẹ djẹgo, ehrọre mẹ kọ rhua phihọ .

⁹ Ki mi gbobọnyẹ ophu ọtuatua mẹ na, Me gbe sa guọghọ Ifremu-u, kidie Mẹvwẹ Ọghẹnẹ me dia ohwo rẹ akpọ-ọ, Ọfuanfọn Ọvuọvo vwẹ uherevie rẹ ovwan, Me gba rha rhe rhe ghwọrọ-ọ.

¹⁰ Ayen che nene Ọrovwohwo, ko che kperi kerẹ okpohrokpo, e, o che kperi, emọ rọye ki che nẹ obuko ọnre rhe vẹ ophariẹ;

¹¹ Ayen cha vẹ ophariẹ kerẹ emephran ri nẹ Ijipt cha, kerẹ ilekuku ri nẹ Asiria cha, ke me vwẹ ayen rhivwi kpo iwevwi rayen, eriyin Ọrovwohwo tare.

A Ghwọku Ifrem Fiki rẹ Ofian Evwọnrọ Kugbẹ Oshenyẹ

¹² Ifrem vwọron efia rhurhu uvwe uwevwi rẹ Izrẹl vẹ ọphiẹnvwẹ; ẹkẹvuọvo Ọghẹnẹ je riẹn Juda, ọ je hẹ ohwo rẹ uyota kẹ Ọfuanfon Ọvuọvo na.