Hosia 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Izrẹl epha kerẹ vain pọkọpọkọ rọ mọ emamọ rọye. Ọtiobo rẹ emamọ rọye buẹ te ọtiọye ọ je ghwa so egbada buebu te; kerẹ obo rẹ ọrho rọye yovwẹ te ọtiọye ọ je ghwa ma osusu te.

² Udu rayen ọ re efian; asakiephana kẹ ayen ghwa abe rayen. Ọrovwohwo cha guọghọ egbada rayen te otọ, ọ guọghọ osusu rayen.

³ Kidie asakiephana kẹ ayen ta; Avwanre vwo ovie-e, kidie avwanre djẹ oshọ rẹ Ọrovwohwo-o, Kugbe ovie-e, kidie o se ru kẹ avwanre?

⁴ Eta diodi ayen ta, kugbe ive ifefe ayen vwọ re ọphọ; ọtiọye orhiebro da va nẹ otọ rhe kerẹ areba vwẹ uvwre re ẹkuẹbe.

⁵ Ihwo ri Samiera re muẹ phariẹ fiki rẹ ọmọ rẹ erhuẹn ri Bẹtaven. Ihwo rọye ki che muomahọ kẹ, irherẹn rẹ edjọ rayen ki che muomahọ kẹ, fiki rẹ urinrin rọye ro muro oma.

⁶ E, oravwọ na dẹn ke che muo kpo Asiria ra vwọ hwa osa kẹ ovie rode na. Oma kọ cha vuẹ Ifrem, oma rẹ edjọ ẹga kọ vo Izrẹl.

⁷ Ovie ri Sameria kọ ghwọrọ kerẹ ephraphrurhe rọ hẹ enu rẹ ame.

⁸ Asan ro kpenu vwi Avẹn, umwemwu rẹ Izrẹl, ka guọgho. Inwe vẹ idjigbẹ ke djẹ vwẹ enu rẹ egbada rayen; kẹ ayen ta kẹ igbenu na, Rhurhu avwanre; kẹ imigbenu na she nyẹ avwanre.

⁹ Ne ọke ri Gibeah rhe, ọye wo vwo ru umwemwu, E Izrẹl, ayen ji phi obọ phihọ rhi te nonẹ na. Kẹ ofovwi rhe phi ayen kua vwi Gibeah?

¹⁰ Ke mi che mukpahe ihwo ri suosuo na, ke me vwẹ uphiaphia fa ayen; ẹgborho rẹ akpọ na ejobi ke ghwẹ oma koko vwọ so ayen ọke rẹ a da cha fa ayen fiki rẹ orukuruku rayen.

¹¹ Ifrem umuomuo rẹ erhuẹn re yonori rẹ oma rẹ owian vwerha, me da yan jẹn oghwa rọ hẹ ohọre rọye vwo; ẹkẹvuọvo me cha gba urhekpe mu ohọre rẹ Ifrem, Juda ko che voro ivoro, Jekọp kọ che tuetue odi kẹ oma rọye.

¹² Kọn ọvwata kẹ oma wẹn, ru wo vun ẹguọnọ ro jẹ re, she otọ ọgangan wẹn na kidie o te ọke ra vwọ guọnọ Ọrovwohwo re, rere Ọ rhe rhọ esivwo phihọ enu rẹ ovwan.

¹³ Wọ kọn orukuruku, wọ de rhe vun oshenyẹ wọ re emamọ rẹ efian. Fikiridie wọ vwẹ ẹro so ekpẹrẹ rẹ ofovwi wẹn, kugbe ebuo rẹ ẹgba rẹ ofovwi wẹn.

¹⁴ Fiki rẹ ọtiọye na edo rẹ ofovwi vwo mu vwẹ ohri rẹ ihwo wẹn, ogba ọgangan wẹ ejobi ka guọghọ ayen, kerẹ obo ri Shalman guọghọ Bẹtabẹl vwẹ ẹdẹ rẹ ofovwi na; te ini vẹ emọ rayen ka vwẹ ayen fa otọ hwe.

¹⁵ Ọtiọye e che ru kẹ wẹ, E uwevwi rẹ Izrẹl, fiki rẹ umwemwu rọde wọ ruru. Vwẹ evun rẹ ogiribo ke hwe ovie rẹ Izrẹl.