Hibru 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Mẹlkizẹdẹk ga Ọghẹnẹ Kerẹ Orherẹn

¹ Kidie Mẹlkizẹdẹk nana, ovie ri Salẹm, orherẹn rẹ Ọghẹnẹ ro me kpenu, ọye re vwa Ebraham ro vwo nẹ ofovwi rẹ ihwehwe rẹ ivie cha ọ da nẹ ẹrhovwo kẹ;

² kẹ ọye Ebraham ghare ẹkẹn-ihwe rẹ ekuakua rọ ghwẹ mie ayen kẹ. Otọ rẹ odẹ rọye na kirobo re ke se vwẹ ẹsosuọ nẹ, ovie rẹ ọvwata, ra ke rhoma se nẹ, ovie ri Salẹm, kọye hẹ ovie rẹ ufuoma.

³ O vwo ọsẹ eyẹ oni eyẹ orua-a, o vwo ẹtuọhọ eyẹ oba vwẹ akpọ-ọ, ẹkẹvuọvo ọ họhọ Ọmọ rẹ Ọghẹnẹ orherẹn rhiri bẹdẹ.

⁴ Gbe nighe obo rọ rho te! Ebraham ọsẹ rode na da jẹ ẹkẹn-ehwe rẹ ekuakua vwọ kẹ.

⁵ Uvwiẹ ri Livae ra vwẹ ẹdia rẹ orherẹn kẹ na a je vwẹ ogangan kẹ ayen vwẹ urhi na nẹ ayen toro ẹkẹn-ihwe mie ihwo na, kọye hẹ imoni rayen, dede enana je vwẹ uvwiẹ rẹ Ebraham ọvuọvo na.

⁶ Ẹkẹvuọvo ohwo nana rọ wan fi uvwiẹ raye-en dede na toro ẹkẹn-ihwe mie Ebraham o da nẹ ẹrhovwo kẹ ohwo re ve ive na kẹ.

⁷ O vwo aphro-o nẹ ohwo rode ọye re nẹ ẹrhovwo kẹ ohwo otete.

⁸ Vwẹ etinẹ na ihwo rẹ akpọ ri ghwẹ eye e toro ẹkẹn-ehwe na kẹ; vwẹ oboyi, kẹ ohwo ọvo re se oseri kpahe nẹ ọ dia bẹdẹ.

⁹ Kirobo re djemu okpuyovwi ri Livae wan oma rẹ Ebraham jẹ ẹkẹn-ehwe na,

¹⁰ kidie vwẹ ọke yena yọ je hẹ evun rẹ ọsẹ rọye rode vwẹ ọke ri Mẹlkizẹdẹk vwọ vwa.

¹¹ Asakiephana ọ dianẹ a mrẹ orugba vwẹ oma rẹ orherẹn ri Livae (kidie otọ rọye ihwo na da reyọ urhi na), kidie ọfa a rha guọnọ ra vwẹ orherẹn ofa mu nene urhi ri Mẹlkizẹdẹk, rha nọ ọ re mu odẹ rẹ Erọn se?

¹² Ọda dia nẹ ewene herọ vwẹ iruo rẹ orherẹn na, kẹ o ji ghwe fo rere e wene je dia vwọ kẹ urhi na rhe.

¹³ Kidie ohwo ra ta eta nana kpahe na orua ọfa san o nurhe, ohwo ọvuọvo je gọ iye vwẹ enu rẹ agbada vwọ kẹ-ẹ.

¹⁴ Kidie o muẹro nẹ orua ri Juda ọye Ọrovwavwanre nurhe, yi Mosis ta ota rẹ orherẹn ọvuọvo kpahe orua yena-a.

¹⁵ Ọnana ko rhi muẹro phihọ nẹ ọke rẹ orherẹn ọfa de mu rọ họhọ Mẹlkizẹdẹk,

¹⁶ rọ dia orherẹn nure, o dianẹ kerẹ urhi rẹ evwiẹ rẹ ugboma-a ẹkẹvuọvo kẹ ogangan rẹ arho ro jẹ ghwọrọ.

¹⁷ Kidie e se oseri kpahọ nẹ, We orherẹn bẹdẹ kerẹ urhi ri Mẹlkizẹdẹk.

¹⁸ Vwẹ abọ ọvo, urhi rẹ awanre na a pharọ fikiridie ọvwiẹre o ruẹ o fi emu ọvuọvo-o,

¹⁹ (kidie urhi na se ruẹ emuọvo gba-a); vwẹ obọ rivẹ, ọ vwẹ omamọ rẹ iphiẹrohọ rhe, oma rọye avwanre wan sikẹre Ọghẹnẹ.

²⁰ Yẹ iyori eduvwo je kanrọ-ọ.

²¹ Ihwo re ke vwo mu irherẹn jovwo na a vwẹ ayen duvwu iyori-i, ẹkẹvuọvo ọnana na iyori e vwo vwo mu, Ọrovwohwo duvwu iyori nure o gbi che ku unu rhẹriẹ-ẹ, Wẹ orherẹn bẹdẹ.

²² Kọye Jesu rhe vwọ re esarobọ rẹ omamọ rẹ ọphọ.

²³ Irherẹn rẹ awanre na epha buebu, fikiridie ughwu rhe jẹ ayen tọn vwẹ iruo raye-en;

²⁴ kirobo rẹ ekpuyovwi rọye vwọ dia rhiri bẹdẹ na, orherẹn rọye rhe vwo ewene-e.

²⁵ Vwẹ ọtiọye na ko se sivwi kohwo kohwo rọ wan oma rọye sikẹrẹ Ọghẹnẹ, fikiridie ọ herọ kọke kọke rọ vwọ rẹ kẹ ayen.

²⁶ Kidie o fori rere avwanre vwo orherẹn rode ọtiọye, fuanfon, ọ reabe-e, o vwo upe-e, rọ hẹriẹ oma nẹ iruimwemwu, ra kpare kpenu pheneke.

²⁷ O rhe vwo ọdavwẹ, kerẹ irherẹn yena, re gọ iye kẹdẹ kẹdẹ-ẹ, rọ ka gọ iye kẹ oma rọye tavwe rọ ke gọ kẹ ihwo efa-a; ẹsiẹvo ọ gọ iye nana kẹ ihwo ejobi vwẹ ọke rọ vwọ vwẹ oma rọye ze kẹ ughwu.

²⁸ Mrẹmrẹ, urhi na vwẹ ihwo ri fori-i vwo muẹ orherẹn rode, ẹkẹvuọvo ive rẹ Ọghẹnẹ rọ rhere vwẹ ukuko na, da vwẹ Ọmọ na vwo mu ọ re ru gba bẹdẹ.