Hibru 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Vwẹ ọtiọye na e gbe jẹ avwanre gbobọnyẹ ebaghẹrẹ rẹ uyono ri Kristi na re e ru kerẹ omiragua, re e kurhẹriẹ nẹ iruo rẹ umwemwu na kpo esegbuyota rẹ Ọghẹnẹ,

² vẹ uyono kpahe ẹhọ, abọ ẹghwẹ kpahe uyovwi, evrenushi rẹ otu ri ghwuru, kugbe ẹdjọeguo ri bẹdẹ.

³ Ọna kọye avwanre se ru ọ da dianẹ Ọghẹnẹ rhọvwere.

⁴ Kidie ọ pha bẹnbẹn re vwo ku ihwo ri rhie ẹro nure rhẹriẹ, re davwe avwerhe rẹ okẹ rẹ obo odjuvwu na, ri de vwo obọ vwẹ ughwẹ rẹ Erhi Ọfuanfon na.

⁵ Re davwẹ avwerhe rẹ erhuvwu rẹ ota rẹ Ọghẹnẹ kugbe ogangan rẹ oge rọ cha na.

⁶ Rẹ ayen da rhoma rhi she; fikiridie kẹ ayen rhe rhoma kanre Ọmọ rẹ Ọghẹnẹ na mu agbagba san kẹ oma rẹ ayen, ayen da phọphọ vwẹ azagba.

⁷ Kidie otọ rọ da ame rẹ osio rọ rhọ phihọ, ro de yovwi emu kẹ otu ri voiro, ke mrẹ ebruphihọ nẹ obọ rẹ Ọghẹnẹ rhe.

⁸ Ẹkẹvuọvo ọ da rha dia ekpia vẹ idjigbẹ re djẹ rhe vwọ, yẹ otọ yena miovwiri kerẹ otọ re duvwu iyori phihọ; oba rọye ka torhẹ.

⁹ Ẹkẹvuọvo fiki rẹ ovwan na, imoni re ghare, ọtiobo rẹ avwanre vwẹ unu kpotọ ta kẹ ovwan na, o ji mu avwanre ẹro nẹ emu esiri buebu hẹ oma rẹ ovwan ro fo esivwo.

¹⁰ Kidie Ọghẹnẹ dia orharhe rẹ ohwo ro jẹ iruo esiri kugbe ẹguọnọ rẹ ovwan vwo kẹ odẹ rọye ẹkarohọ, ri we ru kẹ ihwo efuanfon na fiki rọye, kirobo rẹ ovwan ji ruẹ na.

¹¹ Avwanre ji phiẹrohọ nẹ ovwan ji phi obọ phihọ uruemu esiri na vẹ ẹroẹvwọsuọ rhiri rhi te oba.

¹² Ọtiọye na ovwan rha dia lọkpọ lọkpọ-ọ, ẹkẹvuọvo vwẹ ẹro keri otu re wan oma rẹ esegbuyota kugbe erhiori reuku rẹ ive na.

Ive rẹ Ọghẹnẹ na Rugba

¹³ Kidie ọke rẹ Ọghẹnẹ vwo ve ive kẹ Ebraham, rọ rha mrẹ ohwo ọfa rọ rho nọ oma rọye vwo duvwu iyori-i, ọ da vwẹ omaobọ rọye vwo duvwu iyori,

¹⁴ tanẹ, Uyota ki mi bruba kẹ wẹ ki mi ru nwe bu phihọ.

¹⁵ Rẹ Ebraham, vwọ vwẹ erhiori hẹrhẹ, ive na de te obọ.

¹⁶ Ohwo rọ rho nọ ohwo rọ gan oma nọ ohwo ọye e se vwo duvwu iyori, vwẹ ẹghwọ rayen iyori kọye ri brorhiẹ.

¹⁷ Vwẹ ọtiọye na ọke rẹ Ọghẹnẹ vwọ guọnọ dje gbagba ro muẹro kẹ ohwo rọ cha reuku rẹ ivẹ na ro je kuorhẹriẹ bẹdẹ na, o de duvwu iyori phihọ,

¹⁸ rere vwi fiki rẹ emu nana ivẹ re sa rhẹriẹ-ẹ na, kidie ọ pha bẹnbẹn kẹ Ọghẹnẹ rọ vwọ vwọrọn ofian, kẹ arueyivwo yena avwanre vwọ djẹ sioma nu vwẹ iphiẹrohọ rọ vwọ kẹ avwanre na.

¹⁹ Kọye hẹ ọtan rẹ avwanre churu erhi rẹ avwanre mu ro vwo je bo, iphiẹrohọ rọ sa ro obo ẹtan rẹ ẹshẹ na rọ hẹ obuko rẹ oga na,

²⁰ asan ri Jesu vwi fiki rẹ avwanre ka obaro ra na, rọ rhe vwọ dia orherẹn rode na bẹdẹ vwẹ urhi ri Mẹlkizẹdẹk.