Hibru 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jesu kpenu nẹ Mosis

¹ Fiki rẹ ọtiọye na, imoni re fonro, ri vwo obọ vwẹ use rẹ obo odjuvwu na, gbe roro Jesu, ọyinkọn kugbe orherẹn rode rẹ avwanre rhọvwere na.

² Ọye hẹ ohwo rẹ uyota kẹ ohwo ro vwiro mu, kirobo ri Mosis dia ohwo rẹ uyota vwẹ uwevwi rẹ Ọghẹnẹ.

³ E kere Jesu nẹ ọye me fo ohwo ra vwẹ ọghọ rode kẹ nọ Mosis kirobo rẹ ohwo rọ bọn uwevwi vwo ọghọ nọ uwevwi rọ bọnre.

⁴ (Kidie uwevwi kuwevwi ohwo re bọn, ẹkẹvuọvo ọbọn ebabọn rẹ emu ejobi ọye hẹ Ọghẹnẹ.)

⁵ Asakiephana Mosis ghine dia ohwo rẹ uyota vwẹ uwevwi rẹ Ọghẹnẹ kerẹ odibo, rere e vwo se oseri kẹ obo ra cha ta ota kpahe vwobọ,

⁶ ẹkẹvuọvo Kristi kẹ ohwo rẹ uyota rọ hẹ rẹ uwevwi rẹ Ọghẹnẹ kerẹ ọmọ. Avwanre hẹ uwevwi rọye ọ da dianẹ avwanre yọnre ẹro ẹvwọsuọ kugbe eyan rẹ iphiẹrohọ rẹ avwanre gan.

Oma Erovwo kẹ Ihwo rẹ Ọghẹnẹ

⁷ Vwẹ ọtiọye na, kirobo rẹ Erhi Ọfuanfon tare, Nonẹ na, wo de nyo urhuru rọye,

⁸ we vwo udu-u kerẹ ọke rẹ emuokpahọ, vwẹ ẹdẹ rẹ ẹdavwọ vwẹ evun rẹ aghwa,

⁹ asan rẹ esẹ rẹ ovwan da davwe ovwẹ ni ayen da mrẹ iruo mẹ ikpe ujuvẹ soso.

¹⁰ Kọye uvwiẹ yena da kpare ophu mẹ, me da ta, ayen ghwrẹ vwẹ udu rayen kọke kọke, o rhe jẹ ayen riẹn idjerhe mẹ-ẹ.

¹¹ Kirobo mi vwo ophu duvwu ayen iyori na, O rhe jẹ ayen te omaerovwo mẹ-ẹ.

¹² Wa jomaotọ, imoni, rere udu rẹ idẹbono vwo jẹ ovwan e rhe, udu ro jẹ esegbuyota evwo, ro de si ovwan she nẹ idjerhe rẹ Ọghẹnẹ ro jeghwo na.

¹³ Ẹkẹvuọvo ovwan bru ohwohwo uche kẹdẹ kẹdẹ, kirobo ri nonẹ kri te vwẹ akpọ na, rere ophiẹvwe rẹ umwemwu vwo jẹ udu rẹ ovwan eruo gan.

¹⁴ Kidie avwanre ji vwo ẹkẹn vwẹ evun ri Kristi, ọ da dianẹ avwanre yọnre ẹroẹvwọsuọ rẹ avwanre rẹsosuọ na rhi te oba.

¹⁵ Kọye a vwọ ta nẹ, Nonẹ na we de nyo urhuru rọye we vwo udu kerẹ ọke rẹ emuokpahọ.

¹⁶ Kẹ amono ri nyo nu, rẹ ayen de rhe mukpahọ? Ọ dia ayen ihwo ri nẹ Ijipt rhe vwẹ otọ rẹ isuesun ri Mosis?

¹⁷ Kẹ amono re kpaherọ ophu ikpe ujuvẹ soso? Ọ dia ayen otu ri ru umwemwu, ri she ghwu vwẹ evun rẹ aghwa na?

¹⁸ Kẹ amono e duvwu iyori kẹ nẹ ayen che te omaerovwo mẹ-ẹ, ọ gbe dia ayen ri jẹ ọghọ emuo?

¹⁹ Ọtiọye na avwanre mrẹre nẹ ayen gbi se te-e fiki ri jesegbuyota.