Hibru 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹga rọ Vwerhẹ Ọghẹnẹ

¹ E jẹn ẹguọnọ rẹ iniọvo na dje ebuebuo.

² E jẹn erhorha ẹghọ chọrọ ovwan ẹro-o, kidie ọtiọye na evo vwọ vwẹ emakashe roro erhorha ghẹre.

³ Karohọ ayen otu re hẹ uwodi, kerẹsiẹ ra da mrẹ nẹ ovwan vẹ ayen re gba hẹ uwodi na; kugbe otu ra vwẹ oja ria, kerẹsiẹ ra mrẹ nẹ ovwan hẹ evun rẹ oma na.

⁴ E jẹn emu ọghọ kẹ orọvwe vwẹ ohri rẹ ovwan ejobi, e jẹn e gbe ehwa rẹ orọvwe na ẹgua-a; kidie Ọghẹnẹ cha vwẹ ọvwọfanrhiẹ kugbe otu ri gbe igberadja guẹdjọ.

⁵ Si oma wẹn nẹ urhuru si vwe rẹ igho, jẹn obo ru wo vwori da wẹ ẹro; kidie ọ tarọ nure nẹ, Me sa phiẹn wẹ-ẹ eyẹ me sa sen wẹ-ẹ.

⁶ Kẹ avwanre sa vwẹ obọ saudu nẹ, Ọrovwohwo hẹ ọchuko mẹ, oshọ gbi mu uvwe-e; kidie ohwo se ru kẹ vwẹ?

⁷ Karohọ isun rẹ ovwan, ayen otu re ta ota rẹ Ọghẹnẹ kẹ ovwan; roro akpọ eyere rayen, re wa vwẹ ẹro kere esegbuyota rayen.

⁸ Obo ri Jesu epha vwẹ odẹ ro kpori na eriyin ọ epha nonẹ na eriyin ọ je cha dia bẹdẹ.

⁹ We jẹn odju rẹ uyono kuyono ọkpokpọ muẹ ovwan ghwrẹ-ẹ; kidie o fori re wa vwẹ ẹserọphẹ ghẹre oma, ọ dia emuọre, ro fi emuọvo kẹ otu re rerọ-ọ.

¹⁰ Avwanre vwo agbada rẹ ihwo re ga vwẹ evun rẹ utughẹ na nu se vwo ogangan re vwọ ria vwọ-ọ.

¹¹ Kidie eranvwe rẹ hweri rẹ orherẹn rode na reyọ ọbara rọye vwo kpo ẹshẹ na rhe vwọ gọ iye rẹ umwemwu na a torhẹ ayen vwẹ otafe rẹ erhọn na.

¹² Ọtiọye rhe Jesu je reoja vwẹ obo ughere rere ọbara rọye vwọ hworhẹ ihwo fon.

¹³ Vwẹ ọtiọye na e gbe jẹn avwanre bro kpo obo erhọn rọ hẹ ughere na, rere avwanre ghwa oghwa rẹ ekan fiki rọye.

¹⁴ Kidie avwanre vwo orere ri bẹdẹ na vwo obonẹ-ẹ, yẹ ẹkẹvuọvo avwanre guọnọ orere rọ cha na.

¹⁵ E gbe jẹn avwanre wan oma rọye gọ iye rẹ ejiro kẹ Ọghẹnẹ kọke kọke, kọye hẹ, ẹbẹrunu rẹ avwanre re vwo jiri odẹ rọye.

¹⁶ Wa rua uvwerhi rẹ emu esiri eruo-o kugbe rere wo ghare obo ri rhe we kẹ ihwo, kidie okẹ ọtiọye na ri je Ọghẹnẹ.

¹⁷ Mu ọghọ kẹ isun rẹ ovwan vwẹ oma kpotọ kẹ ayen; kidie ayen re sẹro re ẹnwẹn rẹ ovwan, ayen je hẹ ihwo re cha nẹ iyẹnrẹ kpahe ovwan. We jẹn ayen ru ọna vẹ omavwerhovwẹ, ọ dia ọ rẹ opharo emuohọ-ọ, kidie ọyena fi erere kẹ wẹ-ẹ.

¹⁸ Nẹ ẹrhovwo kẹ avwanre, kidie o mu avwanre ẹro nẹ evun rẹ avwanre pha phephẹ, re guọnọ ruẹ emu rẹ ọghọ vwi kemu kemu ejobi.

¹⁹ Me rẹ ovwan gangan rere we ru ọnana rere e vwo siobọ nẹ uvwe phẹrẹkpẹ rhe ovwan.

Efo vẹ Uyere rọ ka Oba

²⁰ Asakiephana e gbe jẹ Ọghẹnẹ rẹ ufuoma rọ kpare Ọrovwavwanre Jesu nẹ ughwu rhe, osuigegede rode na, vwẹ ọbara rẹ ọphọ re rara na,

²¹ ọ kẹ ovwan emu esiri ejobi rere we vwo ru ọhọre rọye, ro ru iruo vwẹ evun rẹ ovwan. E jẹ ovwan ru iruo ro yovwiri vwẹ obaro rọye, vwẹ oma ri Jesu Kristi; ọye a vwẹ urinrin kẹ bẹdẹ bẹdẹ. Isẹ.

²² Me rẹ ovwan, imoni, we chirako rẹ uchebro mẹ na, kidie mi siro rhe ovwan krẹn.

²³ Mi jẹ ovwan riẹn nẹ e siobọ nẹ Timoti rẹ oniọvo rẹ avwanre na re, me vẹ ọye cha mrẹ ovwan ọ da dianẹ ọ fobọ rhe.

²⁴ Yere isun rẹ ovwan ejobi kugbe ihwo efuanfon na. Otu ri nẹ obo Itali rhe yere ovwan.

²⁵ Ẹserọphẹ nene ovwan ejobi dia. Isẹ.