Hibru 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Esẹgbuyota

¹ Esegbuyota hẹ iphiẹrohọ rẹ obo ri mu ohwo ẹro, imuẹro rẹ obo re jẹmrẹ.

² Fiki rọye Ọghẹnẹ vwọ jẹ ihwo efuanfon rẹ awanre na reyọ.

³ Vwẹ esegbuyota avwanre vwọ riẹn nẹ ota rẹ unu Ọghẹnẹ vwọ ma akpọ, vwẹ ọtiọye na obo ra mrẹ na, emu re ji rhie ẹro mrẹ dẹvo-o eye a vwọ ma ayen.

⁴ Vwẹ esegbuyota ọye Ebẹl vwo ze omamọ rẹ izobo kẹ Ọghẹnẹ vwọ nọ Ken, kọye e vwo se oseri kẹ nẹ ovwata o ruẹ, fiki rẹ iseri yena Ọghẹnẹ vwọ reyọ izọbo rọye; ọ de ghwu, vwi fiki rẹ ẹsegbuyota na kọye ọ je vwọ ta ota.

⁵ Vwẹ esegbuyota na e vwo mu Inọk kpo odjivwu vẹ ẹro ọkpokpọ; a gbe sa mrẹ-ẹ, fikiridie Ọghẹnẹ reyerọ. Tavwe re ki muo reyọ na e ji se oseri kpahọ nẹ ivun rọye vwerhe Ọghẹnẹ.

⁶ Ọ dia esegbuyota-a yọ epha bẹnbẹn re vwo ru obo ri je. Kidie ohwo kohwo rọ tanẹ ọye si kẹre Ọghẹnẹ mi segbuyota nẹ ọ herọ nẹ ọye re hwa osa kẹ ayen otu re guọnerọ.

⁷ Vwẹ esegbuyota ọye Ọghẹnẹ vwọ vuẹ Noa kpahe obo re cha phia ra je mrẹ-ẹ, o da djẹ oshọ ra kare okọ ro vwo sivwi evwruwevwi rọye, vwẹ oma rẹ ọnana o vwo brorhiẹ hwe akpọ na ọ da rhe dia ọreuku rẹ ọvwata rọ wan oma rẹ esegbuyota rhe.

⁸ Vwẹ esegbuyota Ebraham vwo mu ọghọ vwẹ ọke re vwo se kpo asan rọ ra reyọ vwọ reuku na; ọ da yanran, yọ riẹn obo ro vwo gbe-e.

⁹ Vwẹ esegbuyota ọye o vwo ghoro vwẹ otọ rẹ ive na, vwẹ otọ ọrhorha, yọ dia itughẹ ọ vẹ Aizik kugbe Jekọp, re vẹ ọye gbe koko reuku rẹ ive na.

¹⁰ Kidie o re rhẹro rẹ orere ro jẹ uchivwo evwo, ohwo rọ bọnrọ kugbe ọ rọ fanrọ kẹ Ọghẹnẹ.

¹¹ Vwẹ esegbuyota ọye Sera rhi vwo vwo ogangan ro vwọ mrevun, vwẹ ọke ro vwo bru afe nure, fikiridie o se ohwo ro ve ive na gbuyota.

¹² Vwẹ oma rẹ ohwo ọvo na, ro ji ghwẹ na, kọye a wan vwiẹ uvwiẹ ro buru kerẹ isio rẹ obenu na, kerẹ ehavwo rẹ oma rẹ abadi re je se kere.

¹³ Enana ejobi na ghwuru vwẹ evun rẹ esegbuyota rayen, yẹ ive re ve kẹ ayen na ji te ayen obọ-ọ, ẹkẹvuọvo rẹ ayen vwọ mrẹ ayen de yenre vwẹ ogboko, ayen da rhọvwe nẹ ayen ghine hẹ erhorha re hẹ imu vwẹ akpọ na.

¹⁴ Kidie ihwo re ta ọnana djere phia phẹphẹ nẹ ayen guọnọ ẹdia rẹ obọ rayen.

¹⁵ Ọ da ghene dia nẹ urhuru rẹ otọ rẹ ayen diare na siẹ ayen nọ, yẹ ayen mrẹ uphẹ vwo rhivwi.

¹⁶ Ẹkẹvuọvo kirobo rọ epha na, ayen guọnọ ọrho ro me yovwi, kọye hẹ, orere rẹ obo odjivwu. Vwẹ ọtiọye na Ọghẹnẹ gbe vuoma re de se Ọghẹnẹ rẹ aye-en, kidie ọ rhuẹrẹ orere phihọ kẹ ayen nure.

¹⁷ Vwẹ esegbuyota, vwẹ ọke ra vwọ davwẹ Ebraham ni, ọ da vwẹ Aizik gọ iye, ohwo re ve ive na kẹ da choma rọ vwọ vwẹ ọmọ rọye ọvuọvo na gọ iye,

¹⁸ kọye a tarọ kpahe nẹ, Vwẹ oma rẹ Aizik e de se uvwiẹ wẹn odẹ.

¹⁹ O rori nẹ Ọghẹnẹ sa kpare ihwo nẹ ughwu; kerẹsiẹ ra da vwẹ itẹ ta ota nẹ erivwi ọye e si Aizik nurhe.

²⁰ Vwẹ esegbuyota ọye Aizik vwọ nẹ ẹrhovwo ki Jekọp vẹ Isọ kpahe obo re cha vwẹ obaro.

²¹ Vwẹ esegbuyota ọye Jekọp vwọ nẹ ẹrhovwo kẹ emọ ri Josẹf vwẹ ọke ro vwo ghwẹ, rọ vwọ ghwoma nyẹ ọkpọ rọye ọ da ga Ọghẹnẹ rọye.

²² Vwẹ esegbuyota ọye ọke ri Josẹf vwo muegbe rẹ ughwu, ọ da ta ota kpahe ẹyano rẹ ihwo rẹ Izrẹl o de rhe dje obobo re sho wan.

²³ Vwẹ esegbuyota re vwo vwiẹ Mosis, ọsẹ vẹ oni rọye de sionu emeranvwe erha, fikiridie ọmọ na pha yoyovwi; oshọ rẹ urhi rẹ ovie na mu aye-en.

²⁴ Vwẹ esegbuyota oye ọke ri Mosis vwọ ghwanre nu, ọ da sen nẹ e se ọye ọmọ rẹ ọmọte ri Fero-o,

²⁵ ọ da jẹ nẹ ọye vẹ ihwo rẹ Ọghẹnẹ reoja nọ ọ rẹ ọye da ghọghọ vwẹ evun rẹ umwemwu.

²⁶ O de roro nẹ ekan ra harhe ohwo fiki ri Kristi re ma dia efe rode nọ efe rẹ Ijipt, fikiridie ọ vwẹ ẹro so osa na.

²⁷ Vwẹ esegbuyota o vwo vrẹn nẹ Ijipt, ọ djẹ oshọ rẹ ophu rẹ ovie na-a; o de chirako kerẹ ohwo rọ mrẹ ọ re jẹmrẹ na.

²⁸ Vwẹ esegbuyota ọye ọ vwọ re Ewanvrẹn na ọ da fẹrẹ ọbara na, rere Ughwu ro hwe emekpako na vwo jẹ ayen oma ete.

²⁹ Vwẹ esegbuyota ọye ihwo na vwọ wan Abadi Ọvwavware na vrẹn vwẹ otọ ọyaya; ẹkẹvuọvo otu rẹ Ijipt na, re vwẹ ẹro kere ayen ruọ, de divwi ghwu.

³⁰ Vwẹ esegbuyota ọye igbẹhẹ ri Jeriko vwo ghwie she, ọke rẹ ayen vwọ yan riariẹ ẹdẹ ighwrẹ nu.

³¹ Vwẹ esegbuyota ọye Rihab rẹ igberadja na vwo je ghwo kugbe ayen otu ri jẹ ọghọ emuo na, fikiridie ọ nabọ dede otu ri rhi dọrhẹ na.

³² Kidie ọfa me ta? Kidie a sa mrẹ ọke vwo gbe ikun ri Gidiọn, Berak, Samsin, Jẹfta, ọ ri Devid kugbe Samuẹl kugbe emraro na–

³³ ihwo re wan esegbuyota phi uvie kparobọ, ri brorhiẹ rẹ ọsoso, re ve ive na kẹ, re gba unu rẹ ikpohrokpo,

³⁴ ri furhie ogidi-erhanre, re vabọ rẹ ọlọkọ, ri nẹ ọvwiẹre ra ro ọgba, re dia egba vwẹ ofovwi, re vẹn unuofovwi rẹ erhorha.

³⁵ Emọ rẹ eya ri ghwuru a kpare ayen vrẹn. E gbe osọnọ kẹ evo re, e rhovwere nẹ esiobọ nẹ aye-en, rere ayen se vwo vrẹn kpo arhọ ri bẹdẹ.

³⁶ A vwẹ evo jehwẹ a vwẹ ugbudia fa evo, a vwẹ igoni kanre evọ e mu evo phihọ uwodi.

³⁷ A vwẹ ukpokpo phi evo, a vwẹ isara bẹrẹ evo ẹbẹre ivẹ, a vwẹ ọlọkọ nyavwe evo hwe; evo vwẹ ophiẹn rẹ ẹvwe vẹ ogegede rhuo yan, ẹnsọn, ukpokpogho, a vwẹ oja re ayen–,

³⁸ akpọ na rhe fọ kẹ ayen ẹdia-a–ayen re suosuo wan egbo vẹ ogo, ẹmwa vẹ igbogho rẹ akpọ na.

³⁹ Enana ejobi na, dede nẹ e se oseri rẹ esegbuyota rayen na, yẹ ayen sa mrẹ ive na reyọ-ọ,

⁴⁰ rẹ Ọghẹnẹ vwọ ka mrẹ obo ri me yovwi kẹ avwanre na, nẹ ọ rha dia avwanre-e e gbi se ru ayen gba-a.