Hibru 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọghẹnẹ wan Oma rẹ Ọmọ Rọye ta Ota

¹ Vwẹ ọke rẹ awanre idjerhe buebu Ọghẹnẹ wan ta ota kẹ esẹ rẹ avwanre ride vwẹ unu rẹ emraro na;

² vwẹ asakiephana unu rẹ Ọmọ rọye kọye ọ wan ta ota kẹ avwanre, ọye o ve phihọ nẹ ọ reuku ri kemu kemu ejobi re hẹ akpọ na; oma rọye ọ wan mama akpọ na.

³ Ọye hẹ elo rọ họhọ urinrin rọye rọ họhọ Ọghẹnẹ vwẹ erhuvwn rọye dẹn, ọ da reyọ ota rẹ ogangan rọye vwọ yọnre akpọ na. Ọke rọ vwọ hworhẹ imwemwu nu, o de tidia obọrhe rẹ Ọrho vwẹ obenu.

⁴ Ọ da rhe wan oma rẹ ọtiọye na yovwi nọ emakashe na kidie odẹ ro rere na yovwi nọ ọ rayen.

Ọmọ na kpenu nọ Emakashe na

⁵ Didi usun rẹ amakashe na a ta kẹ dẹvure, Wẹ hẹ Ọmọ mẹ, nonẹ na mi vwiẹ wẹ? Eyẹ je ta, ke me dia ọsẹ kẹ, kọ dia ọmọ kẹ vwẹ?

⁶ Ọfa, ọke ro vwo vwiẹ ọmọkpako rọye phihọ akpọ na nu, Ọ da ta, E jẹn emakashe rẹ Ọghẹnẹ ejobi ga.

⁷ Vwọ kpahe emakashe na ọ da ta, O de ru emakashe rọye phihọ odju, idibo rọye kẹ ẹkuerhanre rode.

⁸ Ẹkẹvuọvo vwọ kpahe Ọmọ na ọ da ta, Ekete wẹn, E Ọghẹnẹ, ọ dia bẹdẹ bẹdẹ, ọkpọ rẹ ovwata na ọye hẹ ọkpọ rẹ uvie wẹn.

⁹ Ọvwata wọ guọnọ ozighi tu we oma; kọye Ọghẹnẹ, Ọghẹnẹ wẹn na, vwọ vwẹ evwri te we evwri rẹ aghọghọ ru wọ vwọ rho nọ otu wẹn.

¹⁰ Wẹ, Ọrovwohwo, re mama akpọ na nẹ ẹtuọhọ rhe, odjuvwu na kẹ iruo rẹ obọ wẹn;

¹¹ ayen cha ghwọrọ, ẹkẹvuọvo yu wọ herọ; ayen cha ghwo kerẹ ewun,

¹² wo kpirhi ayen koko kerẹ ukpo, ke wene ayen. Ẹkẹvuọvo abavo wọ epha, ikpẹ wẹn che vwo oba-a.

¹³ Ẹkẹvuọvo kẹ amakashe rhọ ọ ta kẹ dẹvure, Tidia vwẹ obọrhe mẹ, bẹsiẹ me vwọ vwẹ ivwighrẹ wẹn hwa otọ kẹ wẹ chiyi.

¹⁴ Ayen ejobi dia irhi ri gbe odibo re ji rhe rhe gẹ ga, fiki rẹ ayen otu ri che vwo esivwo na?