Galesha 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Urhi eyẹ Esegbuyota

¹ Ẹ ihwo ri Galesha ẹkpa na, ono re phiẹn ovwan, ovwan ra dia irharo rayen gbonozẹ da kanre Jesu Kristi mu agbagba kẹ akpọ ejobi mrẹ?

² Jẹn uvwe nọ ovwan ọnana ọvo; A vwẹ Erhi na kẹ ovwan fiki rẹ iruo rẹ urhi na, gbenẹ fiki rẹ enyo rẹ esegbuyota?

³ Ọtiọye ovwan dia ẹkpa te? Ovwan vwẹ erhi tophihọ nu, ke rha vwẹ ugboma we vwo fue?

⁴ Kẹ ovwan de re egbudugbu rẹ oja nana ejobi kufia? ọ da dianẹ uyota nẹ kẹ ghinẹ hẹ odiodi.

⁵ Ohwo rọ kẹ ovwan Erhi na ro de ru iruo rẹ igbunu vwẹ ohri rẹ ovwan na kẹ oma rẹ urhi na o ruo vwo, gbenẹ oma rẹ enyo rẹ esegbuyota?

⁶ E nẹ Ebraham se Ọghẹnẹ gbuyota, e de kere phihọ ọvwata kẹ.

⁷ Wọ mrẹrẹ nẹ ihwo ri vwo esegbuyota ọtiọye eye hẹ emọ rẹ Ebraham.

⁸ Re ẹbe ọfuanfon na, vwọ mrẹ nẹ Ọghẹnẹ cha vwẹ ase kẹ ihwo ri Keferi fiki rẹ esegbuyota, ọye o vwo ghwoghwo iyẹnrẹ esiri na kẹ Ebraham jovwo nẹ Vwẹ oma wẹn ọye ẹgborho na ejobi wan vwo ebruphihọ.

⁹ Ọtiọye na, otu rẹ ihwo ri vwo esegbuyota ke bruphihọ kẹ ayen vẹ Ebraham ro segbuyota.

¹⁰ Kidie ayen ejobi re vwẹ oma da urhi na ayen hẹ otọ rẹ ekan kidie e siro, Ekan kẹ ohwo kohwo rọ yọnrọn emu ejobi re siri phihọ ọbe rẹ urhi na, ro ru ayen gba-a.

¹¹ Asakiephana o muẹro nẹ o vwo ohwo ọvuọvo rọ sa rease vwẹ obaro rẹ Ọghẹnẹ vwi fiki rẹ urhi na-a; kidie ohwo rọ wan oma rẹ esegbuyota na dia ọvwata kọ rhọ;

¹² Kidie ẹkẹvuọvo urhi na rha vwẹ oma rẹrẹ esegbuyota-a kidie ohwo ro ru ayen kọ rhọ fiki rẹ ayen.

¹³ Kristi tan avwanre nẹ ekan rẹ urhi na nure, ekpuyovwi rọye da rhoma rhi hirhe phihọ ekan fiki re avwanre kidie e siro, Ekan kẹ ohwo kohwo ro churu ughwu vwẹ enu rẹ urhe.

¹⁴ rere vwẹ oma ri Jesu Kristi ebruphihọ rẹ Ebraham vwọ mrasan bru ihwo ri Keferi rhe, rere avwanre vwo vwo ive rẹ Erhi na fiki rẹ esegbuyota.

Urhi na kugbe Ive na

¹⁵ Imoni, a gba vwẹ uruemu rẹ ohwo rẹ akpọ dje, ohwo ọvuọvo sa phan urhi rẹ uku rẹ ohwo siri-i, eyẹ vwọ ba-a, vwẹ ẹsiẹ ra da ghwẹ obọ phihọ nu.

¹⁶ Asakiephana e ve ive na kẹ Ebraham vẹ uvwiẹ rọye. Ọ dianẹ kọ tare nẹ, ivwiẹ-ẹ, kerẹsiẹ ra mrẹ nẹ ibuebu-u; ẹkẹvuọvo, ọvuọvo ọ ọtare, “Uvwiẹ wẹn”, Kọye hẹ Kristi.

¹⁷ Ọnana hẹ obo re me ta na. Urhi na, re jiri ikpe ujori ẹne gbẹ ọgban vwẹ ukuko na, sa phan ọphọ rẹ Ọghẹnẹ ghwẹ obọ phihọ nu rhabae re ki ji urhi rọ da sa phan ive na-a.

¹⁸ Kidie ọ da dianẹ ukuẹriọ na kẹ fiki rẹ urhi na, ye ọ gbe dia ifiki rẹ ive ọfa-a; ẹkẹvuọvo Ọghẹnẹ vwe rọ kẹ Ebraham ifiki rẹ ive.

¹⁹ Kidie e rhe vwo ji urhi? A vwe rọ ba fiki rẹ urhi egbe bẹsiẹ rẹ uvwiẹ na che vwo te obọ rẹ ohwo re ve ive na kẹ, e de vwo mu vwẹ obọ rẹ emakashe vwẹ oma rẹ usuọnvwan.

²⁰ Asakiephana usuọnvwan dje phia nẹ emu na bunọ ọvo; ẹkẹvuọvo Ọghẹnẹ ọvuọvo.

Obo rẹ Urhi na Epha

²¹ Kẹ urhi na vwọ so ivẹ rẹ Ọghẹnẹ na? Kaka vwo; kidie ọ da dianẹ ke ji urhi rọ sa kẹ arhọ, yẹ ọvwata kẹ fiki rẹ urhi na.

²² Ẹkẹvuọvo ọbe ọfuanfon na de ke emu na ejobi ba umwemwu, rere obo re ve kẹ esegbuyota vwi Jesu Kristi a sa vwọ kẹ ayen otu ri segbuyota.

²³ Asakiepbana tavwe rẹ esegbuyota ke rhe, ke huhu ẹchẹ gbe avwanre vwẹ otọ rẹ urhi na, a da da avwanre obọ ji bẹsiẹ ra ke vwẹ esegbuyota phia.

²⁴ Ọtiọye na urhi na kẹ ọsẹro rẹ avwanre bẹsiẹ ri Kristi ke rhe, rere avwanre vwọ rease fiki rẹ esegbuyota.

²⁵ Ẹkẹvuọvo asakiephana rẹ esegbuyota vwọ rhe na, avwanre gbe hẹ otọ rẹ ọsẹro ọfa-a;

²⁶ Kidie vwẹ oma ri Jesu Kristi ovwan ejobi kẹ emọ rẹ Ọghẹnẹ, fiki rẹ esegbuyota.

²⁷ Kidie ovwan ejobi re reyọ ame vwẹ evun ri Kristi ku Kristi phihọ oma nure.

²⁸ O gbi vwo ohwo ri Ju eyẹ Grik, o gbi vwo ọviẹn eyẹ ọmuvwiẹ-ẹ, o gbi vwo ọshare eyẹ aye-e, ovwan ejobi kẹ ọvuọvo vwi Jesu Kristi.

²⁹ O da dianẹ ovwan ọ ri Kristi, yẹ ovwan kẹ uvwiẹ rẹ Ebraham ọreuku kirobo rẹ ive epha.