Filipae 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọvwata rẹ Uyota

¹ Ọ rọ ka oba, imoni mẹ, wa ghọghọ vwẹ evun rẹ Ọrovwohwo. Re vwo si emu ọvuọvo na rhe ovwan ghwa bẹn kẹvwẹ nọ-ọ, yẹ ọye ri yovwi kẹ ovwan.

² Wa kẹnoma kẹ eranko na, wa kẹnoma kẹ ivwuvumwemwu na, wa kẹnoma kẹ otu re tua ibrebru rẹ Ọghẹnẹ phihọ oma na.

³ Avwanre hẹ ihwo re yanvwe omamọ rẹ oyanvwe na, re gọ Ọghẹnẹ vwẹ erhi, ri vwi Kristi Jesu vwọ yan eyan, re vwẹ ẹro so ugboma-a.

⁴ Dede na o vwo otọ rẹ ekpuyovwi mẹ vwọ vwẹ ẹro so ugboma rhe. Ọ da dianẹ ohwo ofa rori nẹ ọye vwo otọ rọ vwọ vwẹ ẹro so ugboma, ọmẹ kọye re marho vwo.

⁵ Ayanvwe ovwẹ vwẹ ẹdẹ ẹrenre, kirobo ra yanvwe ihwo rẹ Izrẹl, mẹvwẹ ọ rẹ orua ri Bẹnjamin, ohwo ri Hibru rẹ ihwo ri Hibru vwiẹri, ọ da wan abọ rẹ urhi rhe mẹvwẹ Farisi,

⁶ ọ da wan ọ rẹ oseghe rhe mẹvwẹ ri je kpokpo ishọshi na, e de nene ovwata vwẹ otọ rẹ urhi me reabe-e.

⁷ Ẹkẹvuọvo emu na ejobi re dia erere kẹ vwẹ jovwo na mi kẹre ayen kirobo ri ghwruru fiki ri Kristi.

⁸ Mrẹmrẹ mi kere ayen kirobo ri ghwruru fiki rẹ obo rọ rhonọ emu re me vwọ riẹn Kristi Jesu nẹ ọye hẹ Ọrovwovwe. Fiki rọye mi vwo ku emu na ejobi kufia, mi de ni ayen kerẹ isọn, rere mi se vwo Kristi

⁹ ra mrẹ vwẹ vwẹ evun rọye, ọ dianẹ ki mi rhe vwo ọvwata rẹ obọ mẹ, ro nẹ oma rẹ urhi rhe-e, ẹkẹvuọvo ọ rọ wan esegbuyota vwẹ evun ri Kristi rhe, ọvwata ro nẹ obọ rẹ Ọghẹnẹ rhe fiki rẹ esegbuyota;

¹⁰ rere me vwọ riẹn vẹ ogangan rẹ evrẹnushi rọye, rere me je ghare ẹkẹn reyọ vwẹ oja rọye, re me vwọ họhọ vwẹ evun rẹ ughwu rọye,

¹¹ ọ da lọhọ mi mi ji se vrẹnushi kirobo ro vrẹnri.

Ma ra pharha kpo obaro

¹² Ọ dianẹ mi vwo ọnana nure-e eyẹ ke me ghwa fon nure-e; ẹkẹvuọvo me pharha kpo obaro rere mi vwo ru ọmẹ, fikiridie Kristi Jesu vwẹ ovwẹ ru ọrọye nure.

¹³ Imoni, mi ghwe roro nẹ mi vwiro ru ọmẹ nure-e; ẹkẹvuọvo emu ọvo mi ruru na, emu ejobi re hẹ obuko da chọrọ ovwẹ ẹro ke me riẹn obọ brẹ obo re hẹ obaro,

¹⁴ me ra pharha kpo obaro fiki rẹ osa rọ hẹ use na vwẹ obenu vwẹ evun ri Kristi Jesu.

¹⁵ E gbe jẹ avwanre ri te omiragua re na roro ọnana mrẹ; emu ọfa da rha herọ ru we ji roro phia-a, Ọghẹnẹ kọ vwọ phia kẹ ovwan rhe.

¹⁶ Uche asan rẹ avwanre riẹn te na e gbe jẹ a yọnrọn ọyena gan.

¹⁷ Imoni, ovwan koko vwẹ ẹro kere uvwe, rere a ka oka phihọ ayen otu re vwẹ avwanre ru oniru na.

¹⁸ Kidie ihwo buebu, re me ta kẹ ovwan kẹdẹ kẹdẹ re me je vwẹ oviẹ ta kẹ ovwan na nẹ i yerẹ kerẹ ivwighrẹ rẹ agbagba ri Kristi.

¹⁹ Oba rayen kẹ ẹghwọrọ, ẹdjọ rẹ ayen gọ kẹ evun, omaẹvuọ rayen kọye ayen vwọ yan eyan, vẹ iroro rẹ ayen vwọ kpahe emu rẹ akpọ na.

²⁰ Ẹkẹvuọvo avwanre kẹ emotọ rẹ odjuvwu, kẹ etiyin avwanre da hẹrhẹ Osivwi, Ọrovwohwo Jesu Kristi,

²¹ ohwo ro che ku orharhe rẹ oma rẹ avwanre na rhẹriẹ hirhe phihọ oma rẹ urinrin rọye, vwẹ ogangan rọ nẹrhẹ ọ vwẹ emu na ejobi hwaotọ kẹ oma rọye.