Filipae 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Oma Evwokpotọ vẹ Ẹkparọ kpenu ri Kristi

¹ Vwẹ ọtiọye na ọ da dianẹ uchebro herọ vwẹ evun ri Kristi, oruru rẹ ẹguọnọ da herọ, we de vwo obọ vwẹ evun rẹ Erhi na, ọhoho kugbe uvwerhe,

² gbe ru aghọghọ mẹ gba rere ovwan dia evun ọvo, we vwo oghẹre rẹ ẹguọnọ ọvo, we vwo evun ọvo kugbe iroro ọvo.

³ Wa vwẹ urhuru vẹ ophiẹvwe ruẹ emu ọvuọvo-o, ẹkẹvuọvo vwẹ oma evwokpotọ kere phihọ nẹ ihwo efa yovwi nọ ovwan.

⁴ E jẹn ohwo guọnọ erhuvwu rẹ oma rọye ọvo-o, ẹkẹvuọvo ovwan je guọnọ erhuvwu rẹ ihwo efa.

⁵ Gbe vwo iroro na vwẹ ohri rẹ ovwan, rẹ ovwan ji vwo vwẹ evun ri Kristi Jesu,

⁶ dede nẹ, Ọghẹnẹ ọ họhọre, yọ vwẹ oma vwanvwe Ọghẹnẹ-ẹ,

⁷ ẹkẹvuọvo ọ da vwẹ oma kpotọ, ọ da reyọ oma rẹ odibo, e de vwiẹ họhọ ohwo.

⁸ Re vwo vwiẹ họhọ ohwo na ọ da vwẹ ọghọ kẹ oma rọye kẹ eriyin o mu ọghọ phihọ oma rhiri re te ughwu rẹ agbagba na.

⁹ Kọye Ọghẹnẹ vwọ kparọ kpenu gangan o de mu odẹ ro kpenu nọ odẹ kodẹ kẹ,

¹⁰ nẹ kohwo kohwo ejobi ki she diguẹ kẹ odẹ ri Jesu, emu re hẹ obo odjuvwu kugbe e re hẹ obotọ rẹ akpọ na,

¹¹ nẹ unu kunu ejobi ke cha rhọvwe nẹ Jesu Kristi hẹ Ọrovwohwo, fiki rẹ urinrin rẹ Ọghẹnẹ Ọsẹ na.

Elo kerẹ Urhukpe vwẹ evun rẹ Akpo na

¹² Vwẹ ọtiọye na, imoni mẹ, kirobo rẹ ovwan mu ọghọ jovwo na, ọtiọye asakiephana, ọ dia irharo mẹ ọvo-o ẹkẹvuọvo ji te obuko mẹ rhe, ovwan gba vwẹ oshọ vẹ ophariẹ vwọ wian owian rẹ esivwo rẹ ovwan phia;

¹³ kidie Ọghẹnẹ ri ruẹ iruo vwẹ evun rẹ ovwan, ọye re rhọvwa nẹ we ru iruo fiki rẹ erhuvwu rọye.

¹⁴ Ovwan ru emu ejobi wẹ guẹ iguegu-un eyẹ a nọ enanọ-ọ,

¹⁵ rere we vwo jẹ abe ẹriọ rere we vwo jẹ ẹgua evwo, emọ rẹ Ọghẹnẹ ri vwo eka-an vwẹ uherevie rẹ uvwiẹ ogugunu chọchọ na, ohri rẹ ayen ovwan da la kerẹ urhukpẹ vwẹ akpọ na,

¹⁶ re yọnre ota rẹ arhọ na kokoroko, rere me vwọ yan eyan vwẹ ẹdẹ ri Kristi da rhe nẹ me rha djẹ ugbonẹ mẹ eyẹ wian owian mẹ kufia-a.

¹⁷ Ọ da tobọ dianẹ e bru uvwe ku iye vwi fiki rẹ esegbuyota dede, oma vwerhe ovwẹ me vẹ ovwan ejobi ke ghọghọ.

¹⁸ Ọtiọye rhe oma je vwerhe ovwan rẹ ovwan da ghọghọ kẹ vwẹ.

Timoti vẹ Epafroditọs

¹⁹ Mi phiẹrohọ vwẹ evun rẹ Ọrovwohwo Jesu nẹ mi che ji Timoti rhe phẹrẹkpẹ, rere udu mẹ vwo te otọ kpahe ikun rẹ ovwan rọ cha ghwa rhe.

²⁰ Me rha vwẹ ẹro so ohwo ọfa rọ sa vwẹ ẹro te ovwan kerẹ ọye-e.

²¹ Ọ robọ rayen ọvo ayen ejobi na guọnọ, ọ dia ọ ri Kristi-i.

²² Ẹkẹvuọvo ovwan riẹn obo ri Timoti ghare te, kirobo rẹ ọmọ ga ọsẹ eriyin ọ ga vwẹ vwẹ iyẹnrẹ esiri na.

²³ Mi phiẹrohọ ni mi che jo rhe phẹrẹkpẹ vwẹ ọke re me da mrẹ obo rẹ emu na ejobi wan re nu.

²⁴ Me je vwẹ ẹro so Ọrovwohwo nẹ ọmọke krẹn emerha me cha kparoma rhe vwẹ obọ.

²⁵ Mi rori nẹ o fori rere mi ke ji Epafroditọs oniọvo mẹ kugbe usun mẹ vwẹ iruo na kugbe usun mẹ ri isodje, kugbe ọyinkọn rẹ ovwan kugbe ogbeodibo rẹ ọbẹnvwẹ mẹ,

²⁶ kidie urhuru rẹ ovwan ejobi siro hwe, oma ke rha ghwọrọ fikiridie ovwan nyori nẹ ọ mwa ọga.

²⁷ Uyota ọ ghene mwa gangan, o dino ghwu. Ẹkẹvuọvo Ọghẹnẹ ni arodọvwẹ rọye, ọ dia ọye ọvo-o ẹkẹvuọvo ji te omẹvwẹ rhe, ọ dia ọtiọye vwo-o ye me vwẹ uvweri ba uvweri.

²⁸ Kọye oma vwọ bajẹ ovwẹ ri mi vwo jo rhe, rere, oma vwọ vwerhe ovwan siẹ rẹ ovwan da mrẹ, re mi vwo jẹ ẹnwan ẹruọ.

²⁹ Vwẹ ọtiọye na we gbe dede reyọ vwẹ odẹ rẹ Ọrovwohwo vẹ aghọghọ; re we mu ọghọ kẹ oghẹre rẹ ohwo ọtiọye,

³⁰ kidie o dino ghwu fiki re iruo ri Kristi na, ako gbẹ ẹrẹvwe o vwo se ru iruo rẹ ovwan na gba kẹ vwẹ.