Filipae 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uyere

¹ Ọbe ri Pọl kugbe Timoti, idibo ri Kristi Jesu, si rhe ihwo efuanfon ejobi vwẹ evun ri Kristi Jesu re hẹ Filipae, vẹ ibishọpu kugbe idikini:

² Ẹserọphẹ dia kẹ ovwan kugbe ufuoma ro nẹ obọ rẹ Ọghẹnẹ Ọsẹ rẹ avwanre kugbe Ọrovwohwo Jesu Kristi rhe.

Ẹrhovwo ri Pọl nẹ kẹ Ihwo ri Filipae

³ Me kpẹvwẹ Ọghẹnẹ me re me da karohọ ovwan ejobi,

⁴ kọke kọke vwẹ ẹrhovwo kẹrhovwo mẹ ejobi re me nẹ kẹ ovwan vẹ aghọghọ,

⁵ vẹ ẹkpẹvwẹ fiki rẹ oma ekuogbe rẹ ovwan vwẹ iyẹnrẹ esiri na nẹ ẹdẹ rẹsosuọ rhi te ọke nana.

⁶ O mu uvwe ẹro nẹ ohwo rọ to iruo esiri nana phihọ vwẹ evun rẹ ovwan na o ji che ruo gba vwẹ ẹdẹ ri Jesu Kristi da rhe.

⁷ O shehọ kẹ vwẹ mi vwo vwo iroro nana kpahe ovwan ejobi, fikiridie ovwan epha ghaghare vwẹ obọ mẹ, kidie ovwan ejobi vẹ ovwẹ ri gbe koko vwo obọ vwẹ ẹserọphẹ na, te evun rẹ uwodi re me epha kugbe ochọ ẹchọ kugbe orugan rẹ iyẹnrẹ esiri na.

⁸ Kidie Ọghẹnẹ hẹ oseri mẹ, obo rẹ urhuru rẹ ovwan ejobi sivwe te vwẹ ẹguọnọ ri Kristi Jesu.

⁹ Ke me rẹ rere ẹguọnọ rẹ ovwan vwo dje ebuo ebuo, vẹ erianriẹn kugbe ẹmrẹ vughe,

¹⁰ rere ovwan vwo vugbe obo ri yovwiri, rere ovwan fon vwo jẹ abe ẹriọ vwẹ ẹdẹ ri Kristi da rhe,

¹¹ rere ovwan da rhe vọn vẹ emamọ rẹ ovwata rọ wan oma ri Jesu Kristi rhe, vwọ kẹ urinrin vẹ ejiro rẹ Ọghẹnẹ.

Ra vwọ rhọ Ọye hẹ Kristi

¹² Imoni mẹ, mi je ovwan riẹn nẹ, ukpokpogho rọ phia kẹ vwẹ na o ghine nẹrhẹ iyẹnrẹ esiri na yan hẹ obaro,

¹³ ọtiọye na otu rẹ isodje rẹ ọguan na kugbe otu ri chekọ ejobi da wan etiyin riẹn nẹ e mu vwe phihọ uwodi fiki ri Kristi.

¹⁴ Buebu vwẹ imoni na da rhe vwẹ ẹro so Ọrovwohwo na fiki rẹ uwodi re me pha, ayen de rhi yivwaro phihọ vwọ ta ota rẹ Ọghẹnẹ na.

¹⁵ Evo ghwoghwo iyẹnrẹ ri Kristi na vwẹ omaẹriọ vẹ oseghe, ẹkẹvuọvo efa ta vwẹ evun esiri.

¹⁶ Edje rẹ ukuko na ta vwẹ ẹguọnọ, vẹ ẹriẹn nẹ ochọ rẹ iyẹnrẹ esiri na me chọ;

¹⁷ edje rẹsosuọ na ghwoghwo Kristi vwẹ ohẹriẹ, ọ dia ọ rẹ evun esiri-i ẹkẹvuọvo ki roro obo rẹ ayen vwọ vwẹ oja re vwẹ vwẹ evun rẹ uwodi re me epha.

¹⁸ Kidie ọyena firi? Ọvuọvo na nẹ vwẹ idjerhe kidjerhe, owenẹ vwẹ omeru eyẹ vwẹ uyota, Kristi e ghwoghwori; ọye kọye hẹ aghọghọ mẹ.

¹⁹ E, ke me ghọghọ. Kidie me riẹnre nẹ vwẹ oma rẹ ẹrhovwo rẹ ovwan kugbe ọchuko rẹ Erhi ri Jesu Kristi ọnana kọ cha dia esivwo kẹ vwẹ.

²⁰ Rẹ ọ vwọ dia obo re me hẹrhẹ vẹ iphiẹrohọ na oma gbe rha vo o vwẹ kaka-a, ẹkẹvuọvo vwẹ evun rẹ aroeyivwo vwẹ ọke ejọbi ka sa vwẹ ọghọ kẹ Kristi vwẹ oma mẹ, owenẹ ọ dia ughwu eyẹ arhọ.

²¹ Kidie vwọ kẹ vwẹ ra vwọ rhọ ọye ota ri Kristi, re vwo ghwu kọye hẹ erere.

²² Ọ dianẹ re vwo vwo arhọ vwẹ evun rẹ ugboma, kọye hẹ owian vẹ erere kẹ vwẹ. Kẹ ọrhọ me riẹnre re me jẹ?

²³ Ahwarha dẹn kọye me epha. Ẹgnọnọ mẹ kẹ ukpo re mi vi Kristi ra dia, kidie ọye ri me yovwi.

²⁴ Ẹkẹvuọvo re me vwọ dia vwẹ ugboma ọye me yovwi kẹ ovwan.

²⁵ Rẹ ọna vwo mu vwe ẹro na, me riẹnre nẹ ke me da oma ji re me vẹ ovwan ejobi dia, vwọ kẹ eyan hẹ obaro vẹ aghọghọ vwẹ evun rẹ esegbuyota na.

²⁶ Vwẹ ọtiọye na vwẹ oma mẹ ovwan mrasan vwẹ ejiro kẹ Kristi Jesu, fiki rẹ obo re me vwọ rhoma bru ovwan rhe.

²⁷ Ọvo na gbe jẹn eyere rẹ ovwan fo kẹ iyẹnrẹ esiri ri Kristi na, kọye owenẹ me rhere rhe mrẹ ovwan eyẹ mi vwo jẹ cha, jẹ uvwe nyo nẹ ovwan mudia gan vwẹ erhi ọvo, vẹ udu ọvo vwọ pharha kuẹgbe vwẹ esegbuyota rẹ iyẹnrẹ esiri na.

²⁸ Ovwan phariẹ kẹ ivwighrẹ rẹ ovwa-an. Ọnana kọ cha dia echa kẹ ayen otu re guọnọ ẹghwọrọ rayen, ẹkẹvuọvo ọye kẹ esivwo rẹ ovwan, ọyena kẹ obọ rẹ Ọghẹnẹ o nurhe.

²⁹ Kidie a rhọvwerọ kẹ ovwan nẹ fiki ri Kristi ọ dia esegbuyota ọvo ovwan vwo-o ẹkẹvuọvo ovwan ke je reoja fiki rọye.

³⁰ Ovwan je họnre ohọnre ọvuọvo na rẹ ovwan mrẹre na rẹ ovwan ji nyo asakiephana nẹ me họnra na.