Filimọn 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uyere

¹ Pọl, re mu phihọ uwodi fiki ri Kristi Jesu, kugbe Timoti oniọvo rẹ avwanre, ri si ọbe nana rhe Filimọn rọ ghaghare kugbe ohwo rẹ avwanre vẹ ọye gbe ru iruo kuẹgbe,

² kugbe Afia rẹ oniọvo rẹ avwanre rẹ ọmọtẹ kugbe Akipọs ohwo rẹ avwanre vẹ ọye gbe koko phi ofovwi na, vẹ ishọshi rọ hẹ uwevwi wẹn.

³ Ẹserọphẹ vẹ ufuoma ro nẹ obọ rẹ Ọghẹnẹ Ọsẹ rẹ avwanre rhe kugbe Ọrovwavwanre Jesu Kristi nene ovwan dia.

Ẹguọnọ vẹ Esegbuyota ri Filimọn

⁴ Me kpẹvwẹ Ọghẹnẹ mẹ kọke kọke re me da karohọ owẹ vwẹ ẹrhovwo mẹ,

⁵ fikiridie mi nyo ẹguọnọ wẹn kugbe esegbuyota ru wo vwo kpahe Ọrovwohwo Jesu, kugbe ihwo efuanfon na ejobi,

⁶ rere uruemu esiri rẹ esegbuyota wẹn na vwọ phia kẹ ihwo ejobi mrẹ kugbe erianriẹn ri kemu kemu esiri ejobi ru wo vwori vwẹ oma ri Kristi.

⁷ Kidie ẹguọnọ wẹn, oniọvo mẹ, vwẹ uchebro vẹ aghọghọ kẹ vwẹ, enana ejobi da vwẹ omavwerhe kẹ udu rẹ ihwo efuanfon na.

Pọl vwẹ ẹkẹn unu rẹ Onisimọs guẹ

⁸ Vwẹ ogangan ri Kristi vwọ kẹ vwẹ, ki mi se vwo arueyivwo re me vwọ ta ota ro fori kẹ wẹ,

⁹ ẹkẹvuọvo fiki rẹ ẹguọnọ ki mi gbobọnyẹ eyena, wọ riẹnre ne me ghworeọ, me kẹ rha hẹ ekanrọ fiki ri Kristi Jesu na;

¹⁰ Me rẹ wẹ fiki rẹ ọmọ mẹ Ọnismọs, ri mi vwiẹri vwẹ evun rẹ imu mẹ,

¹¹ (mi nyori nẹ orharhe rẹ ohwo kẹ wẹ jovwo, ẹkẹvuọvo asakiephana ke rha omamo rẹ ohwo kẹ vwẹ vẹ owẹ).

¹² Ke me reyerọ nẹ ọ rhoma rhivwi bru uwe rhe, rọ vwọ cha na vwenẹ, ọ vẹ abọvo rẹ udu mẹ dẹn re gba cha na.

¹³ Me guọnọre jovwo nẹ ọ vẹ ovwẹ dia obonẹ rere ọ vwẹ ẹro te vwe, kerẹsiẹ ra mrẹ nẹ ohwo ru wo muobọ vwo rhe vwẹ, vwẹ evun rẹ uwodi na ro nene uvwe gbe ikun esiri na;

¹⁴ mi se ru emuọvo-o jokpa nẹ wọ rhọvwere, ọ dianẹ ke me gba wẹ ruo-o, ẹkẹvuọvo jo nẹ otọ rẹ evun wẹn rhe.

¹⁵ Ọkeọvo yi fiki rẹ ọtiọnana ọ vwọ djẹ nẹ uwe obọ rhawẹrhẹye, rere ọke ro de rhivwi rhe ọ vwọ sa dia owẹ bẹdẹ,

¹⁶ ọ gbe dia ọviẹn ọfa-a, ẹkẹvuọvo kọ rho nọ ọviẹn, oniọvo rọ ghare kẹ vwẹ, rọ je ghare kẹ wẹ gangan kerẹ ugbeyan vẹ oniọvo vwi Kristi.

¹⁷ Wo de se vwẹ ọrivẹ wẹ vwẹ ọ rẹ uyota, gba reyọ kirobo re wọ reyọ ovwẹ.

¹⁸ Ẹkẹvuọvo ọ dianẹ o ru we chọ, eyẹ ọ re osa wẹ, gbe roro kẹ vwẹ re me hwa.

¹⁹ Mẹvwẹ ri Pọl, re vwẹ obọ mẹ si ọbe na, ke me ghene hwa kẹ wẹ; ọ dianẹ ke wọ re vwẹ osa-a, ekpuyovwi wẹn me ta.

²⁰ Wo nyori, oniọvo mẹ, biko ru ẹse nana kẹ vwẹ vwẹ odẹ rẹ Ọrovwohwo; ru rere oma vwerhe ovwẹ vwẹ evun ri Kristi.

²¹ Me vwẹ ẹro so nẹ wo se mu ọghọ nana kẹ vwẹ, o mu vwẹ ẹro nẹ wo ru nọ obo re me tare na.

²² Ọ rọ marho rhuẹrẹ asan ri mi wo phihọ hẹrhẹ ovwẹ; mi phiẹrohọ nẹ ẹrhovwo ru wọ nẹ kẹ vwẹ sa kẹ vwẹ ogangan re me vwọ rhe oboyi.

Uyere rẹ ka oba

²³ Epafras re mu kugbe uvwe vwẹ uwodi na vwi fiki ri Kristi Jesu, nẹ e yere uwe;

²⁴ eriyin ji te Mak, Aristakọs, Dimas, Luk, otu re me vẹ ayen gbe koko ru iruo na.

²⁵ Ẹserọphẹ rẹ Ọrovwavwanre Jesu Kristi nene erhi wẹn dia. Isẹ.