Ezra 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Umwemwu ẹfan rẹ Ẹzra

¹ Re vwo ru imu nana ejobi nu, iruiruo na de bru vwe rhe tanẹ, Ihwo rẹ Izrẹl vẹ irherẹn na kugbe ihwo ri Livae na je hẹriẹ oma nẹ ihwo rẹ otọ na vẹ ẹgua raye-en, vwo nẹ ihwo ri Kenan, ihwo ri Hẹt, ihwo ri Periz, ihwo ri Jebus, ihwo rẹ Ammọn, ihwo ri Moab, ihwo rẹ Ijipt, kugbe ihwo rẹ Amọr.

² Fikiridie ayen reyọ emetẹ rayen evo vwọ ru eya kẹ oma rayen vẹ emọ rayen, kọye uvwiẹ ọfuanfọn na vẹ ihwo rẹ otọ na da rhe dia ọguagua. Vwe evun ri je segbuyota nana abọ rẹ iruiruo na vẹ ilori rẹ ihwo na eye ma ka obaro.

³ Oke mi vwo nyo ọnana, me da bẹrẹ ewun mẹ vẹ ukpo mẹ, me da sanvwẹ ẹto rẹ uyovwi mẹ vẹ agbotọ mẹ, mi de tidia fọ gbiei.

⁴ Etiyin ihwo ejobi re phariẹ vwẹ oma rẹ eta rẹ Ọghẹnẹ rẹ Izrẹl na, fiki ri je segbuyota rẹ ihwo ri rhivwi nẹ imu rhe na, ayen da rhe gba yariẹ ovwẹ phihọ vwẹ ọke mi vwo tidia fọ gbiei na rhiri rhi te ọke rẹ izobo rẹ ovwọnvwon.

⁵ Vwẹ ọke rẹ izobo rẹ ovwọnvwọn na vwo te nu, Mi de vrẹn nẹ evun rẹ owẹvwe echiro mẹ, iwun kugbe ukpo mẹ re bẹre ejobi, mi de she diguẹ me da riẹn abọ mẹ kẹ Ọrovwohwo rẹ Ọghẹnẹ mẹ,

⁶ tanẹ, E Ọghẹnẹ mẹ, oma vo vwẹ opharo mẹ ke ghwọkpọ ọ gbi ju vwe kpare opharo mẹ ni we-e, Ọghẹnẹ mẹ, orukuruku rẹ avwanre kpare kpenu nọ uyovwi rẹ avwanre, abe rẹ avwanre ma kpenu re te odjuvwu,

⁷ nẹ ẹdẹ rẹ esẹ rẹ avwanre rhe rhi te nonẹ na, ọye avwanre vwọ hẹ evun rẹ abe, vwi fiki rẹ imwemwu rẹ avwanre, avwanre vẹ ivie rẹ avwanre, kugbe irherẹn rẹ avwanre: e vwo mu avwanre phihọ obọ rẹ ivie rẹ otọ na, vwọ kẹ ọlọkọ, vwọ kẹ ighuvwu, vwọ kẹ ugborho, vwọ kẹ omaẹvuọ kirobo rọ epha rhi te nonẹ na.

⁸ Ẹkẹvuọvo vwẹ ọmọke krẹn nana Ọrovwohwo Ọghẹnẹ rẹ avwanre da vwẹ aroesiri rọye vwo nẹ avwanre, o de ji umuku vwo kẹ avwanre, ọ da kẹ avwanre asan kokoroko vwẹ asan ọfuanfon rọye, rere Ọghẹnẹ rẹ avwanre vwọ sasa ẹro rẹ avwanre re ọ je kẹ avwanre oma ẹsasọ vwẹ ọviẹn rẹ avwanre epha na.

⁹ Kidie avwanre eviẹn, ẹkẹvuọvo Ọghẹnẹ rẹ avwanre siẹn avwanre vwẹ otọ rẹ eviẹn rẹ avwanre epha na-a, ẹkẹvuọvo ọ da riẹn abọ rẹ eguọnọ ro jẹrhẹriẹ rọye kẹ avwanre vwẹ obaro rẹ ovie ri Pẹsha, re ọ vwọ sasa avwanre oma rere avwanre re mu uwevwi rẹ Ọghẹnẹ vi, ra rhuẹrẹ asan ro miovwiri vwọ ejobi, rere ọ rha vwẹ ugbuko rhurhu avwanre vwi Juda vi Jerusalẹm.

¹⁰ Vwẹ asakiephana, E Ọghẹnẹ rẹ avwanre, kidie avwanre ta vwẹ ọnana? Kidie irhi wẹn chọrọ avwanre ẹro,

¹¹ re wọ wan unu rẹ idibo wẹn na emraro na ji tanẹ, Otọ na rẹ ovwan ra ro na, rẹ ovwan cha reyọ vwọ re uku na, ọye otọ ro jefuọn rọ vọnre vẹ ẹgua rẹ ihwo re otọ na, vẹ omaetuo rayen rọ vọnrọ kugbe ijẹfuọn nẹ oba re te oba.

¹² Fiki rẹ ọtiọye na, ovwan gbe vwẹ emetẹ rẹ ovwan vwọ kẹ emeshare raye-en, ovwan je reyọ emetẹ rayen vwọ kẹ emeshare rẹ ovwa-an, ovwan je guọnọ ufuoma vẹ erhuvwu vwọ kẹ aye-en rere ovwan vwo ogangan, vwọ re emu esiri rẹ otọ na, rere ovwan je yan jẹn ayen vwo re dia ukuẹriọ kẹ emọ rẹ ovwan bẹdẹ.

¹³ Vwẹ ọke rẹ imu nana ejobi rhe vwọ phia kẹ avwanre fiki rẹ imwemwu rẹ avwanre nu, ra vwọ mrẹ nẹ wẹwẹ, Ọghẹnẹ rẹ avwanre, ruẹ ehwe wẹn hanvwe nọ obo rẹ umwemwu rẹ avwanre bu te wọ ke je kẹ avwanre umuku otiọna na,

¹⁴ kẹ avwanre rhoma gbẹ irhi wẹn ku obọ riẹe vwọ rọvwọ emetẹ rẹ ihwo ri ruẹ emu rẹ ẹgua etiọna na? Ivun rẹ avwanre rhe miovwo uwe bẹsiẹ ru wo guọghọ avwanre, rẹ umuku vwo je chekọ kẹ avwanre, rẹ ohwo ọvuọvo vwo jẹ abọ eva?

¹⁵ E Ọrovwohwo Ọghẹnẹ rẹ Izrẹl, wẹwẹ ohwo rẹ ọsoso, kidie a yan jẹ umuku re vabọ na vwo kẹ avwanre kirobo rọ epha nonẹ na. Nighe, avwanre mudia vwẹ obaro wẹn vwẹ evun rẹ abe rẹ avwanre, kidie o vwo ohwo ro se mudia vwẹ obaro wẹn fiki rẹ ọnana-a.