Ezra 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Etiyin Darios ovie de ji urhi, ayen de kpo ehiahiẹ vwi Babilọn, vwẹ uwevwi ra da sẹro rẹ ẹbe na.

² Vwẹ Ẹkbatana, vwẹ otorere rẹ ubrakpọ ri Media, a da mrẹ ekpirhi rẹ ọbe re si eta nana phihọ: Ọbe rẹ ekarophihọ.

³ Vwẹ ukpe rẹ ẹsosuọ ri Sairọs rẹ ovie, Sairọs ovie de ji urhi: Vwọ kpahe uwevwi rẹ Ọghẹnẹ rọ hẹ obi Jerusalẹm na, e jẹn arhoma bọn, asan re de ze izobo na ra ghwẹ izobo rẹ atorhẹre cha na, enu era rọye e jọ dia kubit ujorha ohẹhẹre rọye kubit ujorha,

⁴ vẹ edje erha rẹ ibie ragha ride kugbe urhe ọvo rẹ igedu, e ja hwa unu rẹ igho rọye nẹ ekpo rẹ igho rẹ ovie rhe.

⁵ E ja rhoma reyọ oro vẹ idọnọ rẹ ekuakua rẹ uwevwi rẹ Ọghẹnẹ ri Nebukadreza muru nẹ uwevwi rọ hẹ obi Jerusalẹm vwo kpo Babilọn na, vwọ rhivwi ra reyọ ayen vwo kpo uwevwi rẹ Ọghẹnẹ vwẹ obi Jerusalẹm vwo kpo dohwo dasan rọye, wo phi ayen phihọ uwevwi rẹ Ọghẹnẹ na.

⁶ Ẹkẹvuọvo Tattenai, osun rọ hẹ ubrakpọ rọ Obọvrẹn rẹ Urhie na, Shetabọzenai, vẹ otu wẹn osun rẹ Obovrẹn rẹ Urhie na, we tephe,

⁷ wa do obọ rẹ iruo rẹ uwevwi rẹ Ọghẹnẹ na jẹ-ẹ, jẹ isun rẹ ihwo ri Ju na vẹ ekpako rayen rhoma bọn uwevwi rẹ Ọghẹnẹ na phihọ ẹdia rọye.

⁸ Ọ rọ marho mi ji urhi rẹ obo ru we ru vwọ kẹ ekpako ri Ju nana re rhoma bọn uwevwi rẹ Ọghẹnẹ na, uchunu rẹ igho rọye ka hwa kẹ ihwo nana gba. A reyọ nẹ ekpu rẹ igho rẹ ovie rhe, vwẹ arhọghọ ro nẹ ubrakpọ rẹ Obovrẹn rẹ Urhie na cha.

⁹ Kemu kemu rẹ ayen guọnọre emọ rẹ erhuẹn, igbo, eyẹ igodẹ re vwo ze izobo rẹ ẹtorhẹ kẹ Ọghẹnẹ rẹ Odjuvwu, ọka, ughweraka, wain eyẹ evwri kirobo rẹ irherẹn rẹ obi Jerusalẹm guọnọre jẹn a vwọ kẹ ayen kẹdẹ kẹdẹ e jo re-e.

¹⁰ Rere ayen vwo ze izobo ro yovwiri kẹ Ọghẹnẹ rẹ odjuvwu, rere ayen nẹ ẹrhovwo vwọ kẹ ovie vẹ emọ rọye.

¹¹ Me je rhoma ji urhi nẹ kohwo kohwo de ku urhi nana rhẹriẹ, ke yoro ugbere nẹ uwevwi rọye, ka gba ohwo na mu ọkpọ, uwevwi rẹ ohwo na ke vwo ru erhurhu.

¹² Jẹn Ọghẹnẹ rọ tanẹ odẹ rọye dia etiyin na gere kovie kovie eyẹ ihwo she re riẹn obọ rhe ri ku urhi nana rhẹriẹ, eyẹ vwọ guọghọ uwevwi rẹ Ọghẹnẹ rọ hẹ obi Jerusalẹm na. Mẹvwẹ Dariọs ri ji urhi na, e jẹn a nabọ vwẹ oma kpotọ ruo.

¹³ Etiyin, kerẹ ota ri Dariọs ovie vuẹ rhe na, Tattenai, osun rẹ ubrakpọ rọ Obovrẹn rẹ Urhie na, Shetabozenai, kugbe irivẹ royẹ da nabọ vwẹ oma kpotọ ru obo ri Dariọs ovie tare na.

¹⁴ Ekpako ri Ju na da bọn, o de yovwi kẹ ayen, vwẹ oma rẹ aruẹmrẹ ri Hegae rẹ ọmraro na kugbe Zakaraya ọmọ rẹ Iddo. Ayen da bọn uwevwi na vwẹ oma rẹ urhi rẹ Ọghẹnẹ rẹ Izrẹl ji kugbe urhi ri Sairọs vẹ Dariọs kugbe Artaxserxes ovie ri Pẹsha.

¹⁵ A da bọn uwevwi na re vwẹ ẹdẹ re erha rẹ emeranvwe rẹ Adar, vwẹ ukpe resan rẹ ẹriọ ri Dariọs ovie na.

¹⁶ Ihwo rẹ Izrẹl, irherẹn vẹ ihwo ri Livae, kugbe ighuvwu ri chekọ ri rhivwi rhe, da ghọghọ vwẹ oma rẹ orẹ rẹ erhie rẹ uwevwi rẹ Ọghẹnẹ na.

¹⁷ Ayen de ze izobo vwẹ ẹdorẹ rẹ erhie rẹ uwevwi rẹ Ọghẹnẹ na, irhuẹn re eshare ujori, eghwanran uri, imigodẹ ujori ẹne, kugbe izobo rẹ umwemwu kẹ Izrẹl ejobi ẹkpro ihwivẹ, kirobo rẹ orua rẹ Izrẹl epha.

¹⁸ Ayen de dje irherẹn na phihọ oghoghare rayen, ihwo ri Livae na utute rayen, vwi fiki rẹ ẹga rẹ Ọghẹnẹ vwẹ obi Jerusalẹm, kirobo rẹ esiro phihọ ọbe ri Mosis.

¹⁹ Vwẹ ẹdẹ rihwẹne rẹ emeranvwe rẹ ẹsosuọ na ihwo re muru ri rhivwi rhe na da re orẹ rẹ ẹwanvrẹn na.

²⁰ Kidie irherẹn na vẹ ihwo ri Livae na nabọ ru oma rayen fon kugbe, ayen ejobi da fon. Ọtiọye ayen de hwe omogodẹ rẹ ẹwanvrẹn na fiki rẹ ihwo re muru ri rhivwi rhe na, vwọ kẹ ayen otuotu rẹ irherẹn na vẹ oma rayen.

²¹ Ihwo rẹ Izrẹl ri rhivwi nẹ imu rhe na eye rerọ, ji kugbe ohwo kohwo ro kuoma gbẹ ayen ro de sioma rọye nẹ ẹgua rẹ ihwo rẹ otọ na ra ga Ọrovwohwo, rẹ Ọghẹnẹ rẹ Izrẹl na.

²² Ayen da re orẹ rẹ ikara ro jephuo na ẹdẹ ighwrẹn soso vẹ aghọghọ, fikiridie Ọrovwohwo nẹrhẹ ayen ghogho. O de ku ẹnwẹ rẹ ovie rẹ Asiria rhẹriẹ kẹ ayen, rọ da nẹrhẹ ọ cha ayen uko vwo ru iruo rẹ uwevwi rẹ Ọghẹnẹ na, Ọghẹnẹ rẹ Izrẹl na.