Ezra 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ivwighrẹ da iruo na ji

¹ Asakiephana ivwighrẹ ri Juda vi Bẹnjamin vwo nyo nẹ ihwo re muru na rhivwi rhe nẹ ayen bọn uwevwi kẹ Ọrovwohwo, Ọghẹnẹ rẹ Izrẹl na,

² ayen de si kẹrẹ Zerubabel vẹ igbuyovwi rẹ uwevwi rẹ esemọ na, ayen da ta kẹ ayen, We jẹ avwanre nene ovwan bọn, kidie avwanre je ga Ọghẹnẹ wẹn na kirobo wo ruẹ na, rẹ avwanre ji ze izobo kẹ rhabae rhe nẹ ọke rẹ Esarhadọn ovie rẹ Asiria rọ vwẹ avwanre rhe etinẹ.

³ Ẹkẹvuọvo Zerubabẹl, Jeshua kugbe igbuyovwi rẹ uwevwi rẹ esemọ rẹ Izrẹl na da ta kẹ ayen nẹ, O dia ovwan vẹ avwanre vwo obọ kugbe vwẹ ebabọn rẹ uwevwi kẹ Ọghẹnẹ rẹ avwanre-e, ẹkẹvuọvo avwanre ọvo re bọn uwevwi kẹ Ọrovwohwo, Ọghẹnẹ rẹ Izrẹl na, kirobo ri Sairọs ovie ri Pẹsha ji urhi kẹ avwanre.

⁴ Etiyin na ihwo rẹ otọ na de mu idido phihọ ihwo ri Juda, oshọ rẹ ayen vwọ bọn uwevwi de mu ayen.

⁵ Ayen de durhie evwẹghwanre re vwẹ imuoshọ vwo mu iroro, vwẹ ẹdẹ ri Sairọs ejobi ovie ri Pẹsha tobọ rhiri rhi te ẹriọ ri Dariọs ovie ri Pẹsha.

⁶ Vwẹ evun rẹ ẹriọ rẹ Ahasuerus, vwẹ ẹtuọhọ rẹ ẹriọ roye, ayen de si ọbe rẹ iguegu vwọ kpahe ihwo re dia Juda kugbe Jerusalẹm.

⁷ Vwẹ evun re ọke rẹ Artaxserxes, Bishlam kugbe Mitredat kugbe Tabeel kugbe irivẹ rọye ri chekọ de si ọbe rhe Artaxserxes ovie ri Pẹsha, e de si ọbe na vwẹ ephẹrẹ ri Aramia ayen da fotọ rọye.

⁸ Rehum rẹ ojurhi kugbe Shimshai rẹ osiẹbe de si ọbe kpahe Jerusalẹm vwo rhe Artaxserxes rẹ ovie na ọtiọna–

⁹ etiyin Rehum rẹ olotu kugbe Shimshai rẹ osiẹbe, vẹ irivẹ rọye ri chekọ, iguẹdjọ na, isun na, iruiruo na, ihwo ri Pẹsha na, ihwo rẹ Erẹk, ihwo ri Babilọn, ihwo ri Susa, kọye ihwo rẹ Elam de si ọbe,

¹⁰ kugbe ẹgborho ri chekọ rẹ ohworode kugbe ọhọnvwọnre na Osnappa muru vwo orere rẹ Sameria kugbe ubrakpọ efa ri chekọ vwẹ obovrẹn rẹ Urhie na,

¹¹ asakiephana ọnana koye isiesi rẹ ọbe na rẹ ayen vwo yanran na–Vwo rhe Artaxserxes rẹ ovie na. Idibo wẹn, ihwo rẹ Obovrẹn re Urhie na, vwẹ uyere rhe we.

¹² Asakiephana gbẹ jẹ ovie riẹn nẹ ihwo ri Ju ri nẹ asan wẹn bru avwanre rhe na, ayen te Jerusalẹm re. Ayen rhoma bọn orere rẹ okpetu kugbe orere umwemwu yena. Ayen joma bọn igbẹhẹ rọye nure, ayen je ghwa rhuẹrẹ uchivwo rọye rere.

¹³ Asakiephana gbẹ jẹ ovie riẹn nẹ ọ da dianẹ a rhoma bọn orere na rẹ igbẹhẹ rọye de renu, ayen gbe rhọvwe hwa osa rẹ uyovwi-i, osa rẹ otọ, eyẹ arhọghọ-ọ, ekpu rẹ ovie na kọ cha kpọ.

¹⁴ Asakiephana fiki robo rẹ avwanre vwọ re ughweraka rẹ ọguan na o rhe fo rere avwanre dia iseri rẹ ophọphọvwe rẹ ovie na-a, kọye avwanre rhe vwọ vuẹ ovie na,

¹⁵ rere a nabọ ra hiẹ ọbe re si eyenre rẹ esẹ rẹ ovwan phihọ. Wọ cha mrẹ vwẹ evun rẹ ọbe rẹ eyenre na nẹ orere nana orere rẹ okpetu, rọ djoma kpahe ovie kugbe ubrakpọ ejobi, nẹ nẹ awanre rhe ọye ukpokpoma vwọ herọ. Ọye re sorọ ra vwọ guọghọ fiọtọ na.

¹⁶ Avwanre jẹn ovie riẹn nẹ, ọ da dianẹ a rhoma bọn orere nana rẹ igbẹhẹ rọye de renu, wọ gbi che vwo ughwẹ ọvuọvo vwẹ ubrakpọ rọ hẹ Obovrẹn rẹ Urhie na-a.

¹⁷ Kẹ etiyin ovie na da kpahe rhe ayen; Vwo rhe Rehum rẹ olotu kugbe Shimshai rẹ osiẹbe na vẹ irivẹ rayen ri chekọ re dia Sameria kugbe e re hẹ ubrakpọ rẹ Obovrẹn rẹ Urhie na, uyere.

¹⁸ Obo ru wo si rhe avwanre e sere vwe obaro mẹ.

¹⁹ Me je ra hiẹ otọ rẹ orere na, a da ghene mrẹ vughe nẹ nẹ awanre rhe orere nana ghene vwọ so ivie, nẹ okpetu vẹ ọsẹghẹ vọnrọn.

²⁰ Nẹ ivie re dia egba buebu je dia Jerusalẹm re, ri ji sun ubrakpọ ejobi vwẹ Obovrẹn rẹ Urhie na, ra je hwa osa rẹ uyovwi, osa rẹ otọ, kugbe arhọghọ kẹ re.

²¹ Vwẹ ọtiọye na gbe urhi nẹ enana ejobi na gbe fue, nẹ a gbe rhoma bọn orere na-a bẹsiẹ ri mi vwo ji iji ọfa.

²² We nite re obọ jẹ ovwan ẹrho vwẹ ota nana, die wa vwọ fọ kẹ umiovwo re ọ vwọ rho re vwo ru ovie emu odjadja?

²³ Etiyin, re vwo se ọbe rẹ Artaxserxes Ovie na vwẹ obaro ri Rehum kugbe Shimshai rẹ osiẹbe na vẹ irivẹ rayen, ayen de vrẹn okpokpakpa vwo bru ihwo ri Ju vwi Jerusalẹm ayen da vwẹ ẹgbahọ vẹ ogangan vwọ da iruo na ji.

²⁴ Etiyin iruo rẹ uwevwi rẹ Ọghẹnẹ rọ hẹ obi Jerusalẹm de mudje, etiyin o de mudje rhiri rhi te ukpe rẹ ẹriọ ri Dariọs ovie ri Pẹsha.