Ezra 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ighweghwoghwo ri Sairọs

¹ Vwẹ evun rẹ ukpe rẹ esosuọ ri Sairọs ovie ri Pẹsha, rere ota rẹ Ọrovwohwo wan unu ri Jerimaya ta vwọ mrẹ asan sẹ, Ọrovwohwo da kpare ẹnwẹ ri Sairọs ovie ri Pẹsha kpenu, ke etiyin O da nẹrhẹ nẹ oghwoghwo wan irere re yariẹ uvie rọye phihọ, O ji ghwe si ayen phihọ evun rẹ ọbe.

² Enẹ Sairọs ovie ri Pẹsha tare: Ọrovwohwo Ọghẹnẹ rẹ Odjuvwu na, reyọ uvie rẹ akpo na ejobi vwọ kẹ vwẹ, o de ji urhi kẹ vwẹ nẹ me ra bọn uwevwi kẹ ọye vwi Jerusalẹm ri Juda.

³ Kono vwẹ usun rẹ ovwan na vwẹ evun rẹ ihwo rọye na, e jẹn Ọghẹnẹ rọye nene dia, gbe jo kpo obi Jerusalẹm ri Juda, rere ọ rhoma bọn uwevwi rẹ Ọrovwohwo Ọghẹnẹ rẹ Izrẹl rọye. Ọghẹnẹ ro hẹ evun ri Jerusalẹm

⁴ e jẹn kohwo kohwo ro chekọ vwi kasan kasan ro dia ejobi, e jẹn ihwo re asan rọye chukọ vẹ idọnọ vẹ oro, kugbe ekuakua buebu vẹ eranvwe, kugbe ẹkpẹvwẹ ro nẹ udu rhe vwọ rhe uwevwi rẹ Ọghẹnẹ vwi Jerusalẹm.

Ihwo re muru rhivwi kpo Jerusalẹm

⁵ Etiyin igbuyovwi rẹ uwevwi rẹ esemọ ri Juda kugbe Bẹnjamin, de vrẹn kugbe irherẹn vẹ ihwo ri Livae, kugbe kohwo kohwo re Ọghẹnẹ kpare ẹnwẹ rọye kpenu nẹ ayen yanran ra rhoma bọn uwevwi rẹ Ọrovwohwo rọ hẹ obi Jerusalẹm,

⁶ ihwo re kẹrẹ ayen ejobi da vwẹ ekuakua rẹ idọnọ vẹ ọrọ vwọ cha ayen uko, vẹ ekuakua efa, eravwe kugbe erọvwo eghanghanre kugbe ẹkpẹvwẹ buebu ro nẹ udu rhe.

⁷ Sairọs ovie na da je ghwẹ ekuakua rẹ uwevwi rẹ Ọrovwohwo na phihọ otafe, e rẹ Nebukadreza ghwẹ reyọ nẹ Jerusalẹm rhe, re mu phihọ uwevwi rẹ edjọ rọye.

⁸ Sairọs ovie ri Pẹsha da ghwẹ ena vwọ phia vwo nẹ obọ rẹ Mitredat ọyọnrigho, o de kere ayen vwọ kẹ Sheshbaza ọmọ rẹ ovie ri Juda.

⁹ Ọnana kọye unu rẹ ayen; ize uriori rẹ oro, ize uriori rẹ idọnọ, imize uje gbẹ irhiri ra vwọ tọrhe izobo

¹⁰ idjokpo ọgban rẹ oro, idjokpo uriori ivẹ ujori ẹne kugbe ihwe rẹ idọnọ, kugbe ekuakua uriori efa,

¹¹ ekuakua rẹ oro ejobi kugbe e rẹ idọnọ ejobi da dia uriori iyori ujori ẹne kugbe ujorha gbẹ irhiri. Enana ejobi eye Sheshbaza reyọ rhe, vwẹ ọke ra vwọ reyọ ighuvwu na nẹ Babilọn kpo Jerusalẹm.