Ẹyano 4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Etiyin Mosis da kpahe, “Ayen che se vwe gbuyotaa eyẹ ayen cha kerhọ rẹ urhuru mẹẹ, kidie ayen cha ta nẹ, ‘Ọrovwohwo vwẹ oma phia kẹ wẹẹ.”’

² Ọrovwohwo da ta kẹ, “Didi emu ọyen hẹ obọ wẹn?” Ọ da kpahe kẹ, “Ọkpọ.”

³ Ọ da ta, “Phio phiyọ otọ.” Etiyin o de phio phiyọ otọ; ọ de hirhe phiyọ ọrọdekọ. Mosis da djẹ kẹ.

⁴ Ẹkẹvuọvo Ọrovwohwo da ta kẹ Mosis, “Riẹn obọ wẹn phia, wọ yọnrọn urhurhu rọye. Etiyin ọ da riẹn obọ rọye phia ọ da yọnrọn, o de hirhẹ phiyọ ọkpọ vwẹ obọ rọye.

⁵ Ọnana kọye ayen vwo segbuyota nẹ Ọrovwohwo Ọghẹnẹ rẹ esẹ rayen, Ọghẹnẹ rẹ Ebraham, Ọghẹnẹ rẹ Aizik, kugbe Ọghẹnẹ rẹ Jekọp, vwẹ oma phia kẹ wẹ.

⁶ Ọrovwohwo da rhoma ta kẹ, “Gbe phi obọ wẹn phiyọ aviẹvwe wẹn.” O de phi obọ rọyen phiyọ aviavwe rọyen; ro vwo yoro rhe, nighe, obọ rọye da rhe dia fuanfon vẹ oti.

⁷ Etiyin Ọghẹnẹ da ta, “Gba rhoma phi obọ wẹn na phiyọ aviavwe wẹn.” Ọ da rhoma phi obọ rọyen phiyọ aviavwe rọyen; ọke ro wo yoro rhe, nighe, ọ da rhoma rhi hirhe phiyọ oma rọye ri jovwo.

⁸ Ọrovwohwo da ta kẹ, “Ọ da dianẹ ayen rhe se we gbuyotaa, eyẹ ayen gbe kerhọn rẹ oka rẹ ẹsosuọ naa, ayen che se oka rivẹ na gbuyota.

⁹ Ọ da dianẹ ayen gbi se eka nana ivẹ na gbuyotaa, eyẹ ayen gbi nyo urhuru wẹẹn, wọ me rọye ame rẹ urhie rẹ Nail na; wo mi kuo phiyọ otọ ọyaya na; ame ru wọ rọye nẹ urhie rẹ Nail rhe na ko che hirhe phiyọ ọbara vwẹ otọ ọyaya na.”

¹⁰ Etiyin Mosis da ta kẹ Ọrovwohwo, “E Ọrovwovwe!, Me riẹn ota taa, rhiri rhi te ọke re wọ vwọ ta ota kẹ vwẹ odibo wẹn na: ota me pha bọrọbọrọ, erẹvwe mẹ sasaree.

¹¹ Etiyin Ọrovwohwo da ta kẹ, “Ono re ma unu rẹ ohwo? Eyẹ ono re marọ diunu, dierhọn, yẹrẹ ohwo ro sa mrẹ orẹẹ, yẹrẹ orhuẹro? Ọ dia mẹvwẹ hẹ Ọrovwohwo na?

¹² Asakiephana yanran, Me vẹ unu wẹn cha dia, ki mi yono uwe obo re wọ cha ta.”

¹³ Ẹkẹvuọvo ọ da ta, “E Ọrovwohwo, me rẹ wẹ, ji ohwo ọfa.”

¹⁴ Ivun de miovwo Ọrovwohwo kpahe Mosis Ọ da ta, Kẹ Erọn vwoo, oniọvo wẹn, ohwo rẹ Lẹvi? Me riẹnre nẹ ọ riẹn ota ta. Nighere, ọ cha cha vwa wẹ, ọke rọ da mrẹ wẹ oma cha vwerhọ gagan.

¹⁵ Ku wọ cha ta ota kẹ, ki wo phi eta na phiyọ unu rọyen; ki mi nene unu wẹn dia kugbe unu rọyen, ki mi yono uwe obo rẹ wo ru.

¹⁶ Kọ dia ọtota wẹn vwọ kẹ ihwo na; ku wọ dia kerẹ Ọghẹnẹ vwọ kẹ rọ vuẹ obo rẹ cha ọta.

¹⁷ Ku wọ ghwa ọkpọ nana nene oma, kọyen wo vwo ru emu rẹ igbunu na ejobi.

Mosis Rhivwi kpo Ijipti

¹⁸ Mosis de rhivwi bru Jẹtro ọgọ rọye, ọ da ta kẹ, “Ju vwe rhivwi kpo, me rẹ wẹ, bru imoni mẹ vwẹ Ijipti, sẹ ayen je hẹ akpọ.” Etiyin Jẹtro da ta kẹ Mosis, “Gba yanran vwẹ ufuoma.”

¹⁹ Ọrovwohwo da ta kẹ Mosis vwẹ Midian, “Rhivwi kpo Ijipti; kidie ihwo re guọnọ arhọ wẹn ejobi ghwu nure.”

²⁰ Etiyin Mosis da reyọ aye rọyen vẹ emeshare rọyen, o de mu ayen phiyọ enu rẹ ekẹtẹkẹtẹ, o de rhivwi kpo otọ rẹ Ijipti; Mosis da ghwa ọkpọ rẹ Ọghẹnẹ na nene oma.

²¹ Ọrovwohwo da ta kẹ Mosis, ọke wo de te obo Ijipti, wo mi ru emu rẹ igbunu na ejobi kẹ Fẹro mrẹ, e re me vwẹ ogagan rọye kẹ wẹ nẹ wo ru na. Ẹkẹvuọvo mi che ru udu rọyen gan, ọtiọye o rhe che siobọ nẹ ihwo na kpoo.

²² Ku wọ ta kẹ Fẹro, ‘Enẹ Ọrovwohwo tare, “Izrẹl hẹ ọmọkpako mẹ,

²³ Me ta kẹ wẹ, “Jẹn ọmọshare mẹ kpo rere ọ ra gan vwẹ: wọ da sẹn nẹ o kpoo, nighe, ki mi hwe ọmọkpako wẹn.

²⁴ Vwẹ erhọn vwẹ idjerhe Ọrovwohwo da vwa ọ da guọnọ hwe.

²⁵ Etiyin Zipora da reyọ ẹbere rẹ oragha o de bru upheruphe rẹ ọmọshare rọyen, o de vwo te awọ rẹ Mosis, tanẹ, uyota wẹ “Ọpha rẹ ọbara kẹ vwẹ.”

²⁶ Ọtiọye na ọ da yan jovwo. Kọyẹ a vwọ tanẹ, Wẹ Ọpha rẹ ọbara, fiki rẹ oyanvwe na.

²⁷ Ọrovwohwo da ta kẹ Erọn, “Kpo obo aton ra vwa Mosis.” Ọtiọye, ọ da yanran, ọ da ra vwa vwẹ ugbenu rẹ Ọghẹnẹ ọ da fiọnfiọn unu.

²⁸ Mosis da ta eta rẹ Ọrovwohwo na ejobi kẹ Erọn, kugbe eka na ejobi rọ ta kẹ nẹ o ru.

²⁹ Etiyin Mosis vẹ Erọn de re se ekpako rẹ Izrẹl na ejobi koko.

³⁰ Erọn da ta eta rẹ Ọrovwohwo ta kẹ Mosis na ejobi, o de ji ru imu rẹ igbunu.

³¹ Ihwo na de segbuyota; ọke rẹ ayen vwo nyo nẹ Ọrovwohwo bru ihwo rẹ Izrẹl rhe ọke rha je mrẹ oma ẹlaghọ rayen, ayen de gbe uyovwi kpotọ ayen da ga.