Ẹyano 37 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Obo ra Kanre Ekpeti na Wan

¹ Bezalẹl da kare ekpeti rẹ ẹrọn; ugrogro rọye kubit ivẹ gbẹ ubro, kubit ọvo gbẹ ubro ke rha ohẹhẹre rọye, kubit ọvo gbẹ ubro ke rha enuẹra rọye.

² O da vwẹ omamọ rẹ oro vwọ pharọ te evun te otafe, ọ da wran oro yariẹ phihọ,

³ ọ da rha vwẹ isabọ rẹ oro ẹne phihọ igogo ẹne rọye na, isabọ ivẹ ẹbẹre ọvo, isabọ ivẹ ẹbẹre ọfa.

⁴ Ọ da kare ekpọ rẹ ẹron ọ da vwẹ oro phare ayen,

⁵ o de dje ekpọ na phihọ abọ ra sa phihọ oma rẹ ekpeti na, re vwo mu ekpeti na.

⁶ Ọ da ma akpanurhe rẹ arodọvwẹ rẹ oro ọvo; ugrogro rọye kubit ivẹ gbẹ ubro, kubit ọvo gbẹ ubro ke rha ohẹhẹre rọye.

⁷ Ọ da ma chẹrobim ivẹ ra vwẹ oro duvwu; ọ da ma ayen phihọ oba ivẹ rẹ akpanurhe rẹ arodọvwẹ na.

⁸ Ọvo ọ obo ẹtan ọvo, ọvo ọ obo ẹtan rivẹ; ubro ọvuọvo ọye ọ vwọ ma akpanurhe rẹ arodọvwẹ na vi chẹrobim na ra ma phihọ oba rọye ivẹ na.

⁹ Chẹrobim na da bẹre ibekpe rayen sa obenu, uhoho rẹ ibekpe rọye de rhurhẹ akpanurhe rẹ arodọvwẹ na, ayen de hirhe epharo ku ohwohwo; akpanurhe rẹ arodọvwẹ na kọye epharo ri chẹrobim na nẹ.

Ekanrọ rẹ Imẹjẹ na

¹⁰ Ọ da je kare imẹjẹ rẹ ẹron; kubit ivẹ ugrogro rọye, kubit ọvo ke rha ohẹhẹre rọye, kubit ọvo gbẹ ubro ke rha enuẹra rọye;

¹¹ Ọ da reyọ omamọ rẹ oro vwọ pharọ, ọ da ma oro riariẹ phihọ.

¹² Etiyin o de phi edọvi phihọ riariẹ, ohẹhẹre rọye kerẹ ohẹhẹre rẹ ehẹrhobọ, ọ da rha wran oro riariẹ edọvi na phihọ.

¹³ O de phi isabọ rẹ oro ẹne phihọ, o de churu abọ na mu igogo ẹne rẹ awọ ẹne rọye na.

¹⁴ Abọ na de bi kẹrẹ edọvi na, keye a vwọ yọnrọn ekpọ na rere ayen vwo ghwa imẹjẹ na.

¹⁵ Ọ da kare ekpọ rẹ ẹrọn re vwo mu imẹjẹ na, ọ da vwẹ oro phare ayen.

¹⁶ Ọ da rha vwẹ omamọ rẹ oro vwo ru ekuakua re cha dia enu rẹ imẹjẹ na, isete rọye vẹ egebule rọye ra vwọ torhẹ insens, iko rọye vẹ ọmọtoto rọye ra vwọ jẹ ame rẹ ẹga na.

Ekanrọ rẹ Ogburhukpẹ na

¹⁷ O de rhe ji ru ogburhukpẹ rẹ oro ọvo, obotọ vẹ adjugẹ rẹ ogburhukpẹ na e duvwu ayen; iko rọye, iyovwi rọye, vẹ idodo rọye ejobi vọye ọvo.

¹⁸ Eghọn esan eye nẹ ẹhẹre rọye rhe, eghọn erha rẹ ogburhukpẹ na nẹ ẹbẹre rọye ọvo rhe, eghọn erha rẹ ogburhnkpẹ na de rhe nẹ ẹbẹre rivẹ rọye rhe.

¹⁹ Iko erha re ruru kerẹ orhomrẹ ọvuọvo vẹ uyovwi vẹ ododo, vwẹ oghọn ọvo, iko erha efa re ruru kerẹ orhomrẹ ọvuọvo vẹ uyovwi vẹ ododo, vwẹ oghọn ọfa–ọtiọye kọye ọ epha kẹ eghọn esan ri nẹ oma rẹ ogbnrhukpẹ na rhe.

²⁰ Vwẹ enu rẹ oghurhukpẹ na dẹn iko ẹne re ruru kerẹ orhomrẹ herọ, ayen vẹ iyovwi rayen vẹ idodo,

²¹ uyovwi rẹ ubro ọvuọvo vọye vwẹ obotọ rẹ eghọn ivivẹ ri yoro nẹ eghọn esan na rhe na.

²² Te iyovwi rayen vẹ eghọn rayen ejobi ubro ọvuọvo; omamọ rẹ oro e vwo duvwu ayen ejobi ọvuọvo.

²³ Ọ da vwẹ oro vwo ru irhukpẹ ighwren rọye vẹ akpẹn rọye kugbe ize rọye.

²⁴ Ọ da vwẹ talẹnt rẹ omamọ rẹ oro ọvo vwo ruo vẹ ekuakua rọye ejobi.

Obo re ru Agbada rẹ Ogboduma na wan

²⁵ Ọ da rha vwẹ ẹron vwo ru agbada rẹ ugboduma; ugrogro rọye kubit ọvo, ohẹhẹre rọye kubit ọvo; ugrogro te ohẹhẹre abavo, enuẹra rọye kubit ivẹ; idjo rọye vọye oma ọvo.

²⁶ Ọ da rọye omamọ rẹ oro vwọ pharọ obenu rọye, vẹ oma rọye ejobi, vẹ idjo rọye; ọ da ma oro riariẹ phihọ,

²⁷ Ọ da vwẹ isabọ rẹ oro ivẹ phihọ vwẹ otọ rẹ oro ra mare na, vwẹ ẹbẹre rivẹ rọye ri nẹ ohwohwo, re yọnrọn ekpọ na re vwo muo na.

²⁸ Ọ da vwẹ ẹron vwo ru ekpọ na, ọ da vwẹ oro vwọ phare ayen.

Obo re ru Evwri rẹ Eghworo na wan kugbe Ugboduma

²⁹ O de ji chere ori ọfuanfon re vwo ghworo rhe, omamọ rẹ ugboduma ro gbo ọnrhe ororo, rẹ echeri rẹ a gua kugbe.