Ẹyano 25 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Izrẹl vwẹ Ekpẹvwẹ rhe

¹ Ọrovwohwo da ta kẹ Mosis,

² Ta kẹ ihwo rẹ Izrẹl, rere ayen rọye izobo vwo rhe vwe; kohwo kohwo rẹ udu rọye rhọvwere ọye wo mie izobo rọye vwo rhe vwe.

³ Ọnana izobo ru wo che mie ayen rhe vwe. Oro, idọnọ ọfuanfon vẹ odje,

⁴ ọgiọgiọ vẹ orhurhu, isene vẹ esada ra nabọ me, ẹton rẹ ẹvwe,

⁵ ophiẹn rẹ egbo re cheri, ophiẹn rẹ ẹvwe, ẹrọn,

⁶ evwri rẹ irhukpẹ, egẹn re phihọ udẹ vwo ghworo vẹ ugboduma ri gbo ọnrhe ororo.

⁷ Eragha eghaghare vẹ eragha rẹ ebabọn, vẹ ibuluku vẹ adja.

⁸ Gbe jẹn ayen bọn ẹshẹ kẹ vwẹ, rere me dia uherevie rayen.

⁹ Kirobo ri mi dje kẹ wẹ kpahe obo rẹ ọgarivi na cha dia, kugbe ekuakua ra vwọ rhuẹrẹ ejobi, ọtiọye wo che ruo.

Ekpeti rẹ Iseri na

¹⁰ Kẹ ayen kare ekpeti rẹ ẹrọn; kubit ivẹ gbẹ ubro vwẹ ugrogro, kubit ọvo gbẹ ubro ohẹhẹre, kubit ọvo gbẹ ubro kpenu.

¹¹ Ku wo vwẹ omamọ rẹ oro pharọ vwẹ evun te uphephẹ, ku wọ ma emama rẹ oro riariẹ phihọ.

¹² Wo mi duvwu isa rẹ oro ẹne phihọ re wo phi ayen phihọ awọ rọye ẹne na, isa ivẹ ẹbẹre ọvo rọye, isa ivẹ ẹbẹre rivẹ rọye.

¹³ Wọ me kare ekpọ rẹ ẹrọn. Wọ me vwẹ oro phare ayen.

¹⁴ Wọ me chọrọ ekpọ na phihọ uphrophro rẹ isa na re oma rẹ ekpeti na, keye e vwo mu ekpeti na.

¹⁵ Ekpọ na ke dia evun rẹ isa rẹ ekpeti na, we siẹ ayen no-o.

¹⁶ Wo mi phi phihọ evun rẹ ekpeti na iseri na ejobi re me cha vwọ kẹ wẹ na.

¹⁷ Wọ me ma akpanurhe rẹ arodọvwe rẹ omamọ rẹ oro, ugrogro rọye kubit ivẹ gbẹ ubro, ohẹhẹre rọye kubit ọvo gbẹ ubro.

¹⁸ Wọ me ma ehẹrobim ivẹ rẹ oro; a me nabọ duvwu ayen, vwẹ enyẹ ivẹ rẹ akpanurhe rẹ arodọvwe na.

¹⁹ Ma chẹrobim ọvo phihọ ubienyẹ ọvo, wọ me rha ma ọvo phihọ ubienyẹ rivẹ; wo mi ru chẹrobim ivẹ na rẹ hẹ ẹnyẹ ivẹ na abavo phihọ akpanurhe rẹ arodọvwe na.

²⁰ Chẹrobim na ke riẹn ibekpe rayen phihọ obenu, ayen me vwẹ ibekpe rayen rhurhu akpanurhe rẹ arodọvwe na, ayen mi hirhe opharo ku ohwohwo; epharo ri chẹrobim na ivivẹ na ki ni akpanurhe re arodọvwe na.

²¹ Wo mi mu akpanurhe rẹ arodọvwe na phihọ enu rẹ ekpeti na; wo mi rhe phi iseri na re me cha vwọ kẹ wẹn na phihọ evun rẹ ekpeti na.

²² Etiyin kọye me vẹ owẹ da vwa oma, nẹ obenu rẹ akpanurhe rẹ arodọvwe na, nẹ uvwre ri chẹrobim ivẹ na re hẹ enu rẹ ekpeti rẹ iseri na, kẹ etiyin mi de nene uwe ta ota rẹ iji mẹ na ejobi re me vwọ kẹ ihwo rẹ Izrẹl na.

Imẹjẹ rẹ Ikara rẹ Opharo na

²³ Wọ me vwẹ ẹrọn na kare imẹjẹ; ugrogro rọye kubit ivẹ, ohẹhẹre rọye kubit ọvo, enuẹra rọye kubit ọvo gbẹ ubro.

²⁴ Wọ me vwẹ omamọ rẹ oro vwọ pharọ, wọ me ma emama rẹ oro yariẹ.

²⁵ Wo mi hwe omophapha tẹrẹ yariẹ wọ me rha ma emama rẹ oro yariẹ ophapha na.

²⁶ Wo mi duvwu isa rẹ oro ẹne kẹ, wọ gba isa na phihọ akakọ ẹne rẹ awọ rọye ẹne na.

²⁷ Isa na mi bi kẹrẹ omophapha na, keye e che ku phihọ ekpọ na re che vwo mu imẹjẹ na.

²⁸ Wọ me vwẹ ẹrọn kare ekpọ na, wọ me vwẹ oro phare ayen, ena kọye e vwo mu imẹjẹ na.

²⁹ Wo mi ru isete vẹ idjikpo ra vwọ yọnrọn insens, vẹ ichago vẹ iko re vwo ku idi; omamọ rẹ oro wo vwo ru ayen.

³⁰ Ku wo phi ikara rẹ obaro phihọ enu rẹ imẹjẹ na kẹ vwẹ vwẹ ọke ejobi.

Ogburhukpẹ rẹ Oro na

³¹ Wọ me kare ogburhukpẹ rẹ oro. Te obotọ te ẹgbẹn rẹ obenu rẹ urhukpe na a me nabọ duvwo; iko rọye, vẹ ẹrhẹgbẹ rọye, idodo rọye e me dia oka ọvuọvo;

³² eghọn esan ri nẹ oma rọye rhe, eghọn erha rẹ ogburhukpẹ na me tan nẹ ẹbẹre ọvo rhe; eghọn erha efa me rha tan nẹ abọ rivẹ rẹ ogburhukpẹ na rhe.

³³ Iko erha re ruru kerẹ orhomrẹ, ọvuọvo vẹ ẹrhẹghẹ vẹ idodo, vwẹ oghọn ọvo, vẹ iko erha re ruru kerẹ orhomrẹ ọvuọvo vẹ ẹrhẹghẹ vẹ idodo vwẹ eghọn rẹ ivẹ etiọye kọye eghọn esan na ri nẹ ogburhukpẹ na rhe epha;

³⁴ vwẹ enu rẹ ogburhukpẹ na hẹ iko ẹne rẹ ruru kerẹ almond herọ, vẹ ẹrhẹghẹ re ayen vẹ idodo,

³⁵ ẹrhẹghẹ na ẹbẹre ọvo vẹ ọye vwẹ otọ rẹ ivivẹ rẹ eghọn esan ri nẹ ẹdia rẹ ogburhukpẹ na rhe.

³⁶ Ẹrhẹghẹ rayen vẹ eghọn rayen vẹ ọye me dia abọvo, ejobi me dia ẹbẹre ọvo ra nabọ vwẹ omamọ rẹ oro duvwu.

³⁷ Wo mi rhe ru irhukpẹ ighwrẹn vwọ kẹ; a me vwẹ irhukpẹ na kpenu rere e vwọ sa la mu uphephẹ rẹ obaro rọye.

³⁸ Ahwa rọye vẹ etẹtẹ rọye me dia omamọ rẹ oro.

³⁹ Talent rẹ oro e vwo ruo, ọ vẹ ekuakua rọye ejobi.

⁴⁰ Wo mi ru ayen kirobo rẹ ayen epha, kirobo re djere kẹ wẹ vwẹ enu rẹ ugbenu na.