Ẹyano 21 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Obo ra Yọnre Eviẹn wan

¹ Asakiephana enana ẹgha ru wo che keri kẹ ayen.

² Wọ da dẹ ọviẹn ri Hibru, ọ me ga ikpe esan, ọ rẹ ighwrẹn yẹ e mi siobọ no kpo ọphẹ.

³ Ọ da dia ọye ọvo rhere, ọye ọvo ri ji kpo; ọ da dianẹ o vwo aye nu rọ ke rhe, aye rọye ko ji nene kpo.

⁴ Onini rọye da vwẹ aye kẹ o de vwiẹ emeshare vẹ emetẹ kẹ aye na vẹ emọ rọye ke rẹ onini rọye ọye ọvo kọye kpo.

⁵ Ẹkẹvuọvo ọviẹn na da ta phia nẹ, Me guọnọ onini mẹ, aye mẹ, vẹ emọ mẹ, mi se kpo ọphẹ-ẹ,

⁶ etiyin onini rọye kọ rọye vwo rhe Ọghẹnẹ, ọ me rọye rhe anurhoro eyẹ ẹchẹ rẹ uwevwi na, onini rọye me vwẹ isapara rharhe erhọn rọye, kọ ga bẹdẹ.

⁷ Ọke rẹ ohwo da shẹ ọmọtẹ rọye kpo ọviẹn, o rhe se kpo ada kirobo rẹ eviẹn rẹ eshare ruẹ-ẹ.

⁸ Ọ da dianẹ o gbi rhe ru obo ri je onini rọye-e, rọ reyerọ kẹ oma rọye-e, o mi jovwo rere a tan; o vwo ogangan ọvuọvo rọ vwọ shẹ kẹ ọrhorha-a, kidie ọ rovwerọ beku nure.

⁹ Ọ da dianẹ ọ vwe rọ kẹ ọmọshare rọye nẹ ọ vwọ rọvwọ, ọ vẹ ọye ki yeri kerẹ ọmọ vẹ ọsẹ.

¹⁰ Ọ da rọye aye ọfa, e jo siẹnẹ emuọre rọye-e, amwa rọye, eyẹ ogangan rẹ aye ro rhere jovwo e jo ghwrẹ-ẹ.

¹¹ O gbi rhe ru emu nana erha na kẹ-ẹ, ọ me yan jovwo kpo ọphẹ, ọ gbe hwa igho ọvuọvo-o.

Urhi kpahe Ohwo ro Gbe Ozighi

¹² Ohwo kohwo rọ teye ohwo o de ghwu, ohwo yena e mi hwe ghwu.

¹³ Ẹkẹvuọvo ọ da dianẹ ọ hwa phihọ hẹrhẹ-ẹ, ẹkẹvuọvo Ọghẹnẹ ruro ro de she phihọ obọ, ki mi che dje asan rọ cha djẹ ra kẹ wẹ.

¹⁴ Ẹkẹvuọvo ọ da vwẹ arudo vẹ ọnko vwo hwe, we mi sionẹ agbada mẹ, rere o ghwu.

¹⁵ Ohwo rọ teyọ ọsẹ rọye yẹrẹ oni rọye ka teyọ hwe.

¹⁶ Ohwo ro cho ohwo, owenẹ ọ shẹrẹ eyẹ a mrẹrẹ vwẹ obọ rọyee je hwe ghwu.

¹⁷ Ohwo rọ harhe ọsẹ eyẹ oni rọye ka teyọ hwe.

¹⁸ Ihwo da kọ unu ọvo da rọye oragha vwọ teye ọrivẹ yerẹ obọ ọ vwọ teyọ ẹkẹvuọvo ohwo na ghwuru-u, rọ da woma;

¹⁹ ohwo na de vrẹn kẹ ọkpọ kọye ọ vwọ yan kpo asan ejobi jẹ ota nẹ ọ rọ teyerọ na oma; ọke rọ ghwọre ọvo kọye ọ hwa osa rọye, ọ me rha nabọ sivwo.

²⁰ Ohwo da ghwiẹ ọviẹn rọye rẹ ọshare yẹrẹ ọ rẹ aye ro de ghwu ghene, e mi gboja kẹ re.

²¹ Ẹkẹvuọvo ọviẹn na da dia ẹdẹ ọvo yẹrẹ ivẹ, e gbi hwe-e; kidie ọviẹn na igho rọye.

²² Ihwo da họnra, ayen da wan aye vẹ evun oma, rẹ evun na de she nu, je emu rọ brare ọfa ruro-o, e mi ho ohwo rọ wanrọ oma na kirobo rẹ ọshare rẹ aye na tare nẹ ọ hwa, ọ me hwa kirobo rẹ iguẹdjọ na tare.

²³ Emu rọ brare de ruo, ọke yena a me vwẹ arhọ hwa osa rẹ arhọ,

²⁴ ẹro hwa osa rẹ ẹro, ako hwa osa rẹ ako, obọ hwa osa rẹ obọ, owọ hwa osa rẹ owọ,

²⁵ ẹtorhẹ hwa osa rẹ ẹtorhẹ, omẹwan hwa osa rẹ omẹwan, oka hwa osa rẹ oka.

²⁶ Ohwo da ghwiẹ ẹro rẹ ọviẹn rọye rẹ ọshare yẹrẹ aye, ro de rhu, ko siobọ nẹ ọviẹn na kpo ọphẹ fiki rẹ ẹro na.

²⁷ Ọ da teyọ ako rẹ ọviẹn rọye rẹ ọshare yẹrẹ ọ rẹ aye kpare nu, ko siobọ no kpo ọphẹ fiki rẹ ako na.

Urhi kpahe Obo rẹ Ohwo ro vwo Oviẹn ru

²⁸ Erhuẹn de dje ọshare yẹrẹ aye ghwu, ke phi erhuẹn na hwe, ẹkẹvuọvo a ria oma rọyee; ẹkẹvuọvo obọ rẹ ohwo ro vwo erhuẹn na nuro.

²⁹ Ẹkẹvuọvo erhuẹn na de rhe dje ihwo hwe vẹrhẹ ra da vuẹ ohwo ro vworo ro gbi rhe churo vwẹ uwevwi-i, o de hwe ọshare yẹrẹ aye, ke phi erhuẹn na hwe, e mi ji hwe ohwo ro vworo ghwu.

³⁰ A da tanẹ ọ tan, kemu kemu ra tanẹ ọ hwa kọye ọ hwa vwọ tan oma rọye.

³¹ Ọ de dje ọmọshare yẹrẹ ọmọtẹ rẹ ohwo ọfa ghwu kerẹ urhi nana kọye eruo nene.

³² Erhuẹn na de dje ọviẹn ọshare yẹrẹ ọ rẹ aye, ohwo ro vworo me hwa shekẹl ọgban rẹ idọnọ kẹ onini rọye, e mi rhe phi erhuẹn na hwe.

³³ Ọke re ohwo de rhie ọgọdọ, eyẹ ohwo da tọn ọgọdọ yo rhurhuro-o, rẹ erhuẹn yẹrẹ ẹkẹtẹkẹtẹ de she phihọ,

³⁴ ohwo ro vwo ọgọdọ na kọ hwa osa rọye; kọ vwẹ igho kẹ ọ ro vworo, eranvwe oghweghwu na kọ dia ọrọye.

³⁵ Erhuẹn rẹ ohwo ọvo da wan erhuẹn rẹ ọrivẹ rọye oma, o de ghwu, ka shẹ erhuẹn ọkpọkpọ na ayen me ghare igho rọye, ayen ke je ghare erhuẹn oghweghwu na.

³⁶ Yẹrẹ a da rha mrẹ vughe nẹ erhuẹn na ko dje ihwo vẹrhẹ, jẹ ohwo ro vworo rhe churo vwẹ uwevwi-i, kọ vwẹ erhuẹn hwa osa rẹ erhuẹn, eranvwe re oghwuru na ko muo rọye.