Ẹyano 14 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹsamuo rẹ Abadi Ọvwavware na

¹ Etiyin Ọrovwohwo da ta kẹ Mosis,

² Ta kẹ ihwo rẹ Izrẹl rere ayen rhẹriẹ oma re ayen won phihọ obaro ri Pihahirọt, vwẹ uvwre ri Migdọl vẹ abadi na vwẹ obaro ri Balzefọn; we mi mu erhọn phihọ obaro rọye, vwẹ oma rẹ abadi na.

³ Kidie Fero cha ta kpahe emọ rẹ Izrẹl na, Ayen gba phihọ vwẹ otọ na; aton na bru ayen dje.

⁴ Ki mi ru udu ri Fero gan, kọ cha vwọ tua ayen ki mi che vwo urinrin vwẹ enu ri Fero vẹ urogho rọye; ihwo rẹ Ijipt na ke cha riẹn nẹ Mẹvwẹ Ọrovwohwo na. Ayen de ru ọtiọye.

⁵ Ọke ra vwọ ta kẹ ovie rẹ Ijipt nẹ ihwo na djẹre, udu ri Fero vẹ idibo rọye de kurhẹriẹ kpahe ihwo na, ayen da ta, ọnana kidie avwanre ruru na, rẹ avwanre vwo siobọ nẹ Izrẹl kpo nẹ ọ gbe ga avwanre-e?

⁶ Ọtiọye na ọ da rhuẹrẹ akpẹrẹ rẹ ofovwi rọye phihọ otọ ọ da rọye unuofovwi rọye kẹrẹ oma,

⁷ ọ da sanọ akpẹrẹ rẹ ofovwi ujorin esan, kugbe akpẹrẹ rẹ ofovwi efa rẹ Ijipt vẹ ilori ro vwo mu vwẹ enu rẹ ayen.

⁸ Ọrovwohwo de ru udu ri Fero ovie rẹ Ijipt gan ọ da vwọ tua ihwo rẹ Izrẹl na rẹ ayen vwọ yanran vẹ udu gbae.

⁹ Ihwo rẹ Ijipt na da vwọ tua ayen, iyesi ri Fero ejobi vẹ akpẹrẹ rọye vẹ ihwo re gua iyesi rọye vẹ otuofovwi rọye, ayen da rhe yan mu ayen rẹ ayen vwo mu erhọn vwẹ oma rẹ abadi na, vwi Pihahirọt, vwẹ obaro ri Balzefọn.

¹⁰ Ọke ri Fero vwo si kẹrẹ ayen re, ihwo rẹ Izrẹl da kpare ẹro rayen, nighe, ihwo rẹ Ijipt na ra vwọ tua ayen; oshọ rode de rhi mu ayen. Ihwo rẹ Izrẹl de kperi se Ọrovwohwo;

¹¹ ayen da ta kẹ Mosis, E jẹn ishi ẹmrẹ vwẹ Ijipt ọye wọ vwọ rọye avwanre rhi hwe vwẹ evun rẹ aton na? Die wo ru avwanre na, wọ vwọ rọye avwanre nẹ otọ rẹ Ijipt rhe?

¹² Ọnana dia obo rẹ avwanre ta kẹ wẹ vwẹ Ijipt na, Yan jẹ avwanrẹ vwo rere avwanre ga ihwo rẹ Ijipt na? Kidie ofori re avwanre ga ihwo rẹ Ijipt nọ ọ rẹ avwanre de ghwu phihọ aton na.

¹³ Mosis da ta kẹ ihwo na, Wa djoshọ-ọ, we mudia gan, re wa mrẹ esivwo rẹ Ọrovwohwo na, ro che ru kẹ ovwan nonẹ na, kidie ihwo rẹ Ijipt re wa mrẹ nonẹ na, wa gbe cha mrẹ ayen ọfa-a.

¹⁴ Ọrovwohwo na cha họnre kẹ wẹ, oma ọvo we hwemu.

¹⁵ Ọrovwohwo da ta kẹ Mosis, Die wo vwo kpere se vwẹ? Ta kẹ ihwo rẹ Izrẹl rere ayen yan obaro.

¹⁶ Kpare ọkpọ wẹn na kpenu, wọ riẹn obọ wẹn phihọ abadi na rere wọ gharọ, rere ihwo rẹ Izrẹl vwọ yan wan otọ ọyaya rẹ abadi na.

¹⁷ Ki mi che ru udu rẹ ihwo rẹ Ijipt na gan, rere ayen ruọ nene ayen ki mi vwo urinrin vwẹ enu ri Fero vẹ urogho rọye, vwẹ enu rẹ akpẹrẹ rọye, vẹ ihwo re gua iyesi rọye.

¹⁸ Ihwo rẹ Ijipt na ke cha riẹn nẹ Mẹvwẹ Ọrovwohwo, ọke mi de vwo urinrin vwẹ enu ri Fero, akpẹrẹ rọye, vẹ ihwo re gua iyesi rọye.

¹⁹ Etiyin amakashe rẹ Ọghẹnẹ rọ ka obaro kẹ ihwo rẹ Izrẹl na de kpo obuko rayen; osunsun rẹ egho de nẹ obaro rayen rhi mudia obuko rayen,

²⁰ ọ da rhe uvwre rẹ ihwo rẹ Ijipt vẹ ọ rẹ Izrẹl. Kẹ etiyin osunsun na vẹ egho na epha, ason na da rhe wan vrẹn je ohwohwo si kẹrẹ ohwo vwẹ ason na-a.

²¹ Mosis da riẹn obọ rọye phihọ abadi na; Ọrovwohwo da djẹ abadi na kpo uko vwẹ odju ọgangan ro dju nẹ obaro ọnre rhe vwẹ ason na ejobi, o de ru abadi na kpọ yamu, ame na da ghare.

²² Ihwo rẹ Izrẹl da yan otọ ọyaya ruẹ evun rẹ abadi na, ame na de mu igbẹhẹ vwẹ obọrhe vẹ obọhwẹre rayen.

²³ Ihwo rẹ Ijipt na da vwọ tua ayen, ayen de nene ayen ro evun rẹ abadi na, iyesi ri Fero ejobi, akpẹre rọye, vẹ ihwo re gua iyesi rọye.

²⁴ Vwẹ ọke rẹ ohẹrhẹ rẹ irhiọke Ọrovwohwo da wan osunsun rẹ egho vẹ erhanre na ni ihwo rẹ Ijipt, o de phi ozighi phihọ urogho rẹ Ijipt na,

²⁵ adjugẹ rẹ akpẹrẹ rayen de bruro ibehre ọtiọye na kẹ ayen djẹ tẹgbẹ tẹgbẹ; ihwo rẹ Ijipt na da ta, E jẹn a djẹ nẹ oma rẹ ihwo rẹ Izrẹl na, kidie Ọrovwohwo yen họnra ihwo rẹ Ijipt kẹ ayen na.

²⁶ Etiyin Ọrovwohwo da ta kẹ Mosis, Riẹn obọ wẹn phihọ abadi na, rere ame na rhi rhurhu ihwo rẹ Ijipt na, te akpẹrẹ rayen, vẹ ihwo re gua iyesi rayen.

²⁷ Etiyin Mosis da riẹn obọ rọye phihọ abadi na, abadi na da djẹ kugbe vwẹ irhiọke, ihwo rẹ Ijipt na da djẹ ruọ, Ọrovwohwo da hra ihwo rẹ Ijipt na vwẹ evun rẹ abadi na.

²⁸ Ame na de hirhe o de rhurhu akpẹrẹ na vẹ ihwo re gua iyesi na vẹ urogho ri Fero ejobi ri nene ayen ro evun rẹ abadi na, ọvuọvo rọye chekọ-ọ.

²⁹ Ẹkẹvuọvo ihwo rẹ Izrẹl da wan otọ ọyaya vrẹn vwẹ abadi na, ame na da dia igbẹhẹ kẹ ayen vwẹ ẹbẹre nana te ẹbẹre yena.

³⁰ Enẹ Ọrovwohwo sivwi Izrẹl nẹ abọ rẹ ihwo rẹ Ijipt; Izrẹl da mrẹ ihwo rẹ Ijipt ri ghwuru vwẹ oma rẹ abadi na.

³¹ Izrẹl da mrẹ iruo ride rẹ Ọrovwohwo ru kpahe ihwo rẹ Ijipt, ihwo na da djẹ oshọ rẹ Ọrovwohwo, ayen de se Ọrovwohwo vi Mosis rẹ odibo rọye gbuyota.