Ẹyano 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Eruofon rẹ Emekpako

¹ Ọrovwohwo da ta kẹ Mosis,

² Ru emekpako rẹ ovwan ejobi fuanfon kẹ vwẹ; kohwo kohwo rọ bẹrẹ urhoro rẹ ihwo rẹ Izrẹl ejobi, te ohwo te eranvwe, ọmẹ.

Orẹ rẹ Ikara ro Jephuo

³ Mosis da ta kẹ ihwo na, Karophihọ ẹdẹ ri nonẹ, ri wo vwo nẹ otọ rẹ Ijipt rhe na, nẹ uwevwi rẹ ọviẹn, fiki rẹ ogangan rẹ obọ rẹ Ọrovwohwo ọ vwọ reyọ owẹ nẹ etinẹ na; wa re ikara ro phuẹ-ẹ.

⁴ Nonẹ na ku wa yan phia, vwẹ evun rẹ emeranvwe re se Abib.

⁵ Ọke rẹ Ọrovwohwo da reyọ owẹ vwọ rhe otọ rẹ ihwo ri Kenan, ihwo ri Het, ihwo rẹ Amọr, ihwo ri Hiv, ihwo ri Jebus, ro ve kẹ esẹ wẹn nẹ ọye vwọ kẹ wẹ, otọ rọ djẹ ọkẹre rẹ ame rẹ ivie vẹ ọnyọn ku wọ gọ ẹga nana vwẹ emeranvwe nana.

⁶ Ẹdẹ ighwrẹn wọ vwọ re ikara ro jephuo, vwẹ ẹdẹ righwrẹn na ku wa re orẹ kẹ Ọrovwohwo.

⁷ Ikara ro jephuo ọye wọ re ẹdẹ ighwrẹn; we ja mrẹ wẹ vẹ ikara ro phuru-u we ja mrẹ ọ rọ ophuru vwẹ asan ro wa dia-a.

⁸ Ku wọ ta kẹ emọ wẹn vwẹ ẹdẹ yena, Fiki rẹ obo rẹ Ọrovwohwo ru kẹ wẹ vwẹ ọke ri mi vwo nẹ otọ rẹ Ijipt na.

⁹ Kọ cha dia oka vwẹ obọ wẹn kugbe ẹkarophihọ vwẹ ẹto wẹn, rere urhi rẹ Ọrovwohwo vwọ dia unu wẹn, kidie obọ ọgangan Ọrovwohwo vwọ rọye owẹ nẹ Ijipt rhẹ.

¹⁰ Ku wọ yọnrọn ẹgha nana vwẹ asa rẹ ọke rọye de te nẹ ukpe ra ro ukpe.

Emekpako na

¹¹ Ọke rẹ Ọrovwohwo da rọye owẹ rhi vwo te otọ rẹ ihwo ri Kenan, kirobo ro ve kẹ wẹ vẹ esẹ wẹn, rọ da vwọ kẹ wẹ,

¹² ku wọ hẹriẹ phihọ akakọ kẹ Ọrovwohwo emu ejobi re bẹrẹ urhoro rẹ oni rọye. Otuvwiẹ rẹ eranvwe re dia eshare ke dia erẹ Ọrovwohwo.

¹³ Otuvwiẹ rẹ ekẹtẹkẹtẹ ka vwẹ ogodẹ tan, wọ gbe rha ta-an, wọ me chahe ohọre rọye. Otuvwiẹ rẹ ohwo ejobi vwẹ ohri rẹ emeshare wẹn ku wọ tan;

¹⁴ vwẹ ọke rọ cha rẹ ọmọshare wẹn da nọ wẹ, Die otọ rẹ ọnana? ku wọ ta kẹ, Obọ ọgangan Ọrovwohwo vwo si avwanre nẹ otọ rẹ Ijipt rhe, nẹ uwevwi rẹ oviẹn.

¹⁵ Kidie ọke ri Fero vwọ sẹn kokoroko nẹ avwanre kpo-o, Ọrovwohwo de hwe emekpako rẹ otọ rẹ Ijipt ejobi emekpako rẹ ihwo vẹ erẹ eranvwe. Fiki rẹ ọtiọye me vwọ rọye emeshare re bẹre urhoro rẹ oni rayen vwo ze izobo kẹ Ọrovwohwo, ẹkẹvuọvo otuvwiẹ rẹ emeshare mẹ ejobi me tan ayen.

¹⁶ Kọ cha dia oka vwẹ obọ wẹn yẹrẹ, egbene wo vwo mu arhare; kidie obọ ọgangan Ọrovwohwo vwọ rọye avwanre nẹ Ijipt rhe.

Osunsun rẹ Egho kugbe Osunsun rẹ Erhanre

¹⁷ Ọke ri Fero vwo si obọ nẹ ihwo na kpo, Ọghẹnẹ gbi rhe sun ayen wan otọ rẹ ihwo ri Filistia-a, dede na yẹ ọye ma kẹre; kidie Ọghẹnẹ tare, ọ dia ọtiọye-e ihwo na de rhivwi siẹ rẹ ayen da mrẹ ofovwi, ayen de rhe rhivwi kpo Ijipt.

¹⁸ Ẹkẹvuọvo Ọghẹnẹ de sun ihwo na riariẹ idjerhe rẹ aton na, kpo obo Abadi ọvwavware na. Emọ rẹ Izrẹl da yan nẹ otọ rẹ Ijipt vẹ omaẹcha rẹ ofovwi.

¹⁹ Mosis da rọye ibeku ri Josẹf nene oma, kidie Josẹf ta kẹ ihwo rẹ Izrẹl, tanẹ, Ọghẹnẹ che bru ovwan rhe: wa me rọye ibeku mẹ nẹ etinẹ.

²⁰ Ayen de vrẹn nẹ Sukọt, ayen de mu erhọn phihọ Etam, vwẹ orhoma rẹ aton na.

²¹ Ọrovwohwo da karọ kẹ ayen vwẹ oghẹruvo vwẹ osunsun rẹ egho ro sun ayen vwẹ idjerhe na, vwẹ uvo, vwẹ ason osunsun rẹ erhanre rọ kẹ ayen orẹmrẹ ro sun ayen vwẹ ason; vwọ yan vwẹ ason vẹ uvo.

²² Osunsun rẹ egho vwẹ oghẹruvo kugbe osunsun rẹ erhanre vwẹ ason gbi rhe bi nẹ oma rẹ ihwo na-a.