Ẹyano 10 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọtiekọ rẹ Ebaka

¹ Etiyin Ọrovwohwo da ta kẹ Mosis, Yanran bru Fero, kidie mi ru udu rọye gan kugbe udu rẹ idibo rọye, rere me vwọ vwẹ eka mẹ nana phia vwẹ ohri rẹ ayen,

² rere wo vwo gbe ikun nana kẹ ọmọshare wẹn vẹ emọ rẹ ọmọshare wẹn obo re me vwẹ ihwo rẹ Ijipt ha eha te, vẹ eka ri mi ru kẹ ayen; rere wọ vwọ riẹn nẹ Mẹvwẹ Ọrovwohwo na.

³ Etiyin Mosis vẹ Erọn de bru Fero, ayen da ta kẹ, Enẹ Ọrovwohwo tare, Ọghẹnẹ ri Hibru, Mavọ o krite wọ vwọ sen nẹ wọ vwẹ oma kpotọ kẹ vwẹ-e? Jẹn ihwo mẹ kpo, rere ayen ra ga vwẹ.

⁴ Kidie wọ da sen nẹ ihwo mẹ kpo-o, nighe odẹ rọ cha na me cha vwẹ ebaka rhe orho wẹn na,

⁵ kẹ ayen che rhurhu otọ na ejobi, ohwo ọvuọvo gbe sa mrẹ otọ na-a, kẹ ayen cha re obo ri chekọ kẹ wẹ rẹ osio rẹ lmieho hwe chekọ, ayen re urhe kurhe wẹn re djẹ vwẹ evun rẹ aghwa,

⁶ kẹ ayen cha vọn iwevwi wẹn, vẹ iwevwi rẹ idibo wẹn ejobi vẹ ọ rẹ ihwo rẹ Ijipt ejobi; ọtioghẹrẹ rẹ esẹ wẹn vẹ esẹ wẹn ride je mrẹ dẹvo-o, nẹ ẹdẹ re wọ vwọ rhe akpọ rhi te nonẹ na. Etiyin o de kuoma rhẹriẹ ọ da yan ji Fero vwo.

⁷ Idibo ri Fero da ta kẹ, Mavọ ohwo nana dia ufi kẹ avwanre krite? Jẹn ihwo na vwo ri kpo, rere ayen ra ga Ọrovwohwo Ọghẹnẹ rayen; wọ je mrẹ vughe nẹ Ijipt ejobi ghwrure?

⁸ Ọtiọye na a da vwi Mosis vẹ Erọn rhivwi rhe Fero; ọ da ta kẹ ayen, Yanran, ra ga Ọrovwohwo Ọghẹnẹ wẹn; ẹkẹvuọvo amono re ra?

⁹ Mosis da ta, Avwanre vẹ imitete te ekpako rẹ avwanre gba ra; avwanre vẹ emeshare vẹ igodẹ rẹ avwanre vẹ ichuru rẹ avwanre ejobi gba ra, kidie avwanre cha re orẹ kẹ Ọrovwohwo.

¹⁰ Ọ da ta kẹ ayen, Ọrovwohwo nene uwe dia, ki mi siobọ nẹ uwe vẹ imitete wẹn na kpo! Nighe, iroro omiomiovwi evo hẹ evun tẹ ovwan.

¹¹ Ẹjo, we kpo, eshare rẹ ohri rẹ ovwan, rere wa ra ga Ọrovwohwo na, kidie ọyena hẹ obo wa guọnọ. A da djẹ ayen nẹ obaro ri Fero.

¹² Ọrovwohwo da ta kẹ Mosis, Riẹn obọ wẹn phihọ otọ tẹ Ijipt na fiki rẹ ebaka na, rere ayen rhe otọ rẹ Ijipt na, rere ayen re kurhe kurhe rọ hẹ otọ na, rẹ osio rẹ imicho na hwe chekọ.

¹³ Ọtiọye na Mosis da riẹn ọkpọ rọye phihọ otọ rẹ Ijipt na, Ọrovwohwo de dju odju nẹ obaro ọnre rhe otọ na vwẹ ẹdẹ yena vẹ ason yena; rẹ ọke rhi vwo rhie odju rẹ obaro ọnre da ghwẹ ebaka na rhe.

¹⁴ Ebaka na da rhe vọn otọ rẹ Ijipt na, ayen de rhurhu otọ rẹ Ijipt na ejobi, kpisi a je mrẹ oghẹrẹ rẹ ebaka nana dẹvo-o yẹ a gbe je cha mrẹ ọfa-a.

¹⁵ Kidie ayen rhurhu otọ na ejobi, ọtiọye otọ na de rhi biku hwi, ayen da re ekakọn na ejobi rẹ otọ na vẹ emamọ ri enu rẹ irhe e rẹ osio rẹ imicho na yan jovwo; ebe ọkpokpọ ọvuọvo rhe chekọ-ọ, tẹ urhe te okakọn rẹ aghwa, vwẹ otọ rẹ Ijipt na ejobi.

¹⁶ Etiyin Fero de se Mosis vẹ Erọn kpatakpata, ọ da ta, Mi ru umwemwu kpahe Ọrovwohwo Ọghẹnẹ wẹn, ji kugbe okpuyovwi wẹn.

¹⁷ Asakiephana, vwẹ umwemwu mẹ ghovwo uvwe, me rẹ wẹ, obọ nana ọvo, rere wọ rẹ Ọrovwohwo Ọghẹnẹ wẹn rere o mu ughwu nana nẹ uvwe.

¹⁸ Ọ da yanran nẹ obaro ri Fero, ọ da ra rẹ Ọrovwohwo na.

¹⁹ Ọrovwohwo da reyọ odju ọgangan nẹ obuko ọnre rhe, ọ da kpare ebaka na kpenu o de re dju ayen phihọ Abadi ọvwavware na; kaka ebaka ọvuọvo gbi chekọ vwẹ otọ tẹ Ijipt na-a.

²⁰ Ẹkẹvuọvo Ọrovwohwo de ru udu ri Fero gan, o gbi rhe siobọ nẹ emọ rẹ Izrẹl kpo-o.

Ọtiekọ rẹ Ebri

²¹ Etiyin Ọrovwohwo da ta kẹ Mosis, Riẹn obọ wẹn kpenu, rere ebri rhi mu vwẹ otọ rẹ Ijipt na, ebri re nyo vwẹ oma.

²² Ọtiọye na Mosis da riẹn obọ rọye kpenu ebri ọgangan na de mu vwẹ otọ rẹ Ijipt na ẹdẹ erha;

²³ ayen gbe mrẹ ohwohwo-o yerẹ ohwo ọvuọvo vrẹn nẹ ẹdia rọye ẹdẹ erha-a; ẹkẹvuọvo ihwo rẹ Izrẹl ejobi de vwo orẹmrẹ vwẹ asan rẹ ayen epha ejobi.

²⁴ Etiyin Fero de se Mosis, ọ da ta, Kpo, ra ga Ọrovwohwo; emọ wẹn se nene uwe; ọvuọvo rọ herọ jẹn ẹko rẹ igodẹ wẹ vẹ e rẹ eranvwe wẹ daji obuko.

²⁵ Ẹkẹvuọvo Mosis da ta, Jẹn avwanre reyọ eravwọ re vwo ze izobo rẹ ẹtorhẹ, rere avwanre vwo ze izobo kẹ Ọrovwohwo Ọghẹnẹ rẹ avwanre.

²⁶ Uchuru rẹ avwanre ji nene avwanre ra; uchukowọ rẹ ọvuọvo che chekọ obuko-o, kidie avwanre vwẹ ayen ba ga Ọrovwohwo Ọghẹnẹ rẹ avwanre, avwanre je riẹn obo rẹ avwanre vwọ ga Ọrovwohwo bẹsiẹ rẹ avwanre vwo te oboyi-i.

²⁷ Ẹkẹvuọvo Ọrovwohwo de ru udu ri Fero gan, o gbi rhe siobọ nẹ ayen kpo-o.

²⁸ Fero da ta kẹ, Bi nẹ uvwe oma; sẹro rẹ oma wẹn; wọ gbe mrẹ opharo mẹ ọfa-a; kidie ẹdẹ wọ mrẹ opharo mẹ ku wo ghwu.

²⁹ Mosis da ta, Kirobo wọ tare na! Me gbe mrẹ opharo wẹn ọfa-a.