Ẹvwọphia 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ovuẹ vwo rhe Sadis

¹ Kẹ enẹ o si rhe amakashe rẹ ishọshi ri Sadis. Eta rẹ ohwo ro vwo erhi ighwrẹ rẹ Ọghẹnẹ na kugbe isio ighwrẹ na. Me riẹn iruo wẹn; a vwẹ owẹ roro ohwo ọkpokpọ, da yi wo ghwuru.

² Vrẹn, wọ vwẹ ogangan kẹ obo ri chekọ ri muegbe rẹ ughwu, kidie me je mrẹ iruo rẹ ovwan rọ ghare vwẹ obaro rẹ Ọghẹnẹ mẹ-ẹ.

³ Karohọ obo rẹ ovwan reyọre kugbe obo we nyori; yọnre ọyena, re we kurhẹriẹ. Wo rhe vrẹ-ẹn, ke me cha rhe kerẹ oji wọ gbe cha riẹn ọke re me cha vwọ ro owẹ-ẹ.

⁴ Dede na wo ji vwo ihwo ẹvo vwi Sadis na, ihwo re je vwẹ ibehre ghworo iwun raye-en; ayen ki che ku iwun efuanfon phihọ yan nene uvwe ukuko, kidie ayen fori.

⁵ Ohwo ro phi kparobọ ko ku iwun tiọna phihọ, mi gbi phoro odẹ rọye nẹ ọbe rẹ arhọ na-a; ke me rhọvwe odẹ rọye vwẹ obaro rẹ Ọsẹ mẹ kugbe emakashe rọye.

⁶ Ohwo ro vwo erhọn, e jo nyo obo rẹ Erhi na ta kẹ ishọshi na.

Ovuẹ vwo rhe Filadẹlfia

⁷ Kẹ enẹ o si rhe amakashe rẹ ishọshi ri Filadẹlfia. Eta rẹ ọfuanfon ọvuọvo na, ohwo rẹ uyota na, ro vwo usiaphrẹ ri Devid, ohwo ro rhie nẹ ohwo ọfa se huho-o, ro de huho nu ohwo ọfa se rhie-e.

⁸ Me riẹn iruo wẹn. Nighe, mi rhie ẹchẹ phihọ ghwroro, rẹ ohwo se huhẹ-ẹ; me riẹnre nẹ ogangan wẹn pha hahavwe, dede na yu wọ yọnre ota mẹ wọ sa sen odẹ mẹ-ẹ.

⁹ Nighe, mi che ru ayen otu re hẹ ẹho rẹ Idẹbono na re tanẹ ayen ihwo ri Ju da yẹ ayen dia ihwo ri Ju-u, ẹkẹvuọvo efian ayen vwọrọn—-nighe, ke cha rhe rhi diguẹ vwẹ agada mẹ, ke riẹn nẹ me guọnọ ayen.

¹⁰ Fikiridie wọ yọnrọn ota mẹ vwe erhiori vẹ akoechiro na, ke me yọnrọn owẹ vwẹ ọke rẹ odavwini rọ cha akpọ na ejobi na, rọ cha davwe ihwo ejobi re dia akpọ na ni.

¹¹ Me cha phẹrẹkpẹ; yọnre esegbuyota ro te we obọ nure na ga, rere ohwo ọfa vwo jẹ erhu wẹn na ẹgborho reyọ.

¹² Ohwo ro phi kparobọ, ki mi che vwo ru uchivwo vwẹ evun rẹ uwevwi rẹ Ọghẹnẹ mẹ; e rhe se ghwie no bẹdẹ-ẹ, ki mi si odẹ rẹ Ọghẹnẹ mẹ vwọ tamuo, kugbe odẹ rẹ orere rẹ Ọghẹnẹ mẹ na, Jerusalẹm Ọkpokpọ na ro nẹ obọ rẹ Ọghẹnẹ rọ hẹ obo odjuvwu rhe otọ na, kugbe odẹ mẹ ọkpokpọ na.

¹³ Ohwo ro vwo erhọn, e jo nyo obo rẹ Erhi na ta kẹ ishọshi na.

Ovuẹ vwo rhe Laodisia

¹⁴ Kẹ enẹ o si rhe amakashe rẹ ishọshi ri Laodisha: Eta rẹ ohwo re se Isẹ, ro segbuyota kugbe oseri rẹ uyota, ẹtuọhọ rẹ emama rẹ Ọghẹnẹ.

¹⁵ Me riẹn iruo wẹn; wọ tuabọ nọ-ọ wo djiro nọ-ọ. Manẹ wo ghwe djiro eyẹ ghwa tuabọ!

¹⁶ Ọtiọye na, fiki robo wọ vwọ dia bọrọbọrọ na, wo djiro nọ-ọ eyẹ wọ tuabọ nọ-ọ na, ki mi dje we kufia nẹ unu mẹ.

¹⁷ Kidie wọ tanẹ, mi feri, o yovwi kẹ vwẹ, emuọvo kare ọvwe-e; da yẹ owẹ orharhe rẹ ohwo fafanrhiẹ diodi, ovwiogbere, rẹ ehrọre rọye re ohwo, orhuẹro, rọ ban phihọ.

¹⁸ Kọye mi vwo dje aghwanre kẹ wẹ nẹ dẹ oro rọ epha wrowro mie vwe, re wo fe; kugbe ewun ọfuanfon wo ku phihọ rere wo rhurhu ẹban wẹ re oma vwo jẹ uwe ẹvuọ, rere wọ rhọghọ ẹro wẹn, re wọ mrorẹ.

¹⁹ Otu re me guọnọre, me ghwọ kuẹ eye me je fa; vwẹ ọtiọye na gbe vwo oruru re wo kurhẹriẹ.

²⁰ Nighe, mi mudia vwẹ anurhoro mi ro hworo; ohwo de nyo urhuru mẹ ro de rhie ẹchẹ kẹ vwẹ, ki mi bro rhe evun rẹ uwevwi ke me vẹ ọye re emu, kọ vẹ ovwẹ je re.

²¹ Ohwo ro phi kparobọ, ke me kẹ ogangan ro vwo tidia ekete mẹ, kirobo ri mi phi kparobọ na re me vẹ Ọsẹ me de tidia ekete rọye na.

²² Ohwo ro vwo erhọn, e jo nyo obo rẹ Erhi na ta kẹ ishọshi na.