Ẹvwọphia 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ovuẹ vwo rhe Ẹfesọs

¹ Amakashe rẹ ishọshi rẹ Ẹfesọs ọye e si ọnana rhe. Eta rẹ ohwo rọ yọnre isio ighwrẹ na vwẹ obọrhe rọye, rọ yan vwẹ ohri rẹ igburhukpe rẹ oro ighwrẹ na.

² Me riẹn iruo wẹn, oma ẹlaghọ wẹn vẹ erhiori wẹn, obo ru wo se chirako rẹ ihwo umwemwu-u ẹkẹvuọvo wọ da davwe otu ri se oma rẹ ayen iyinkọn ni da jẹ iyinkọn rẹ efian ayen ruẹ;

³ Wo de vwo erhiori wo de chirako fiki rẹ odẹ mẹ, oma sa ghwọrọ owẹ-ẹ.

⁴ Ẹkẹvuọvo me mrẹ ọnana ta kpahe owẹ nẹ, wo siobọ nẹ ẹguọnọ wẹn rẹsosuọ.

⁵ Gba karohọ asan ru wo she nurhe, re wo kurhẹriẹ re wọ ghwobọ phihọ iruo wẹn rẹsosuọ. Ọ rha dia ọtiọye-e, ki mi che bru we rhe ki mi si ogburhukpẹ wẹn nẹ ẹdia rọye, jokpa nẹ wo kurhẹriẹ.

⁶ Yẹ emuọvo herọ mi vwo jiri uwe nẹ oma rẹ iruo rẹ ihwo ri Naikolia na tu uwe oma, kirobo ro ji tu uvwe oma.

⁷ Ohwo ro vwo erhọn e jo nyo obo rẹ Erhi na ta kẹ ishọshi na. Ohwo ro phi kparobọ ke me vwẹ urhe rẹ arhọ na kẹ re, rọ he Paradais rẹ Ọghẹnẹ.

Ovuẹ vwo rhe Simana

⁸ Kẹ enẹ o si rhe amakashe rẹ ishọshi ri Simana. Eta rẹ ohwo rẹsosuọ kugbe ọ rọ ka oba, ohwo ro ghwuru rọ da rhoma varhe.

⁹ Me riẹn ọdjarhe wẹn kugbe ẹnso wẹn (ẹkẹvuọvo yi wo feri) kugbe ophọphọvwe rẹ ayen otu ri se oma rẹ ayen ihwo ri Ju yẹ ayen dia ihwo ri Ju-u, ẹkẹvuọvo da yẹ ayen ẹshẹ rẹ Idẹbono.

¹⁰ Wọ djẹ oshọ rẹ oja ru wọ cha re na-a. Nighe, idẹbono cha kpare ẹvo vwẹ usun rẹ ovwan na phihọ uwodi, rere a davwe ovwan ni, kẹ ovwan reoja ẹdẹ ihwe soso. Ovwan vwo esegbuyota re te ughwu, ke me vwẹ erhu rẹ arhọ na kẹ ovwan.

¹¹ Ohwo ro vwo erhọn e jo nyo obo rẹ Erhi na ta kẹ ishọshi na. Ohwo ro phi kparobọ ọ rha cha mrẹ odjadja rẹ ughwu rivẹ-ẹ.

Ovuẹ vwo rho Pẹgamọn

¹² Kẹ enẹ o si rhe amakashe rẹ ishọshi ri Pẹgamọn. Eta rẹ ohwo ro vwo ọgbọdọ rọ dan prẹprẹ na.

¹³ Me riẹn asan re wọ dia, asan rẹ ekete rẹ idẹbono epha; wọ da yọnrọn odẹ mẹ kokoroko wọ sa sen esegbuyota mẹ-ẹ marho kẹ ọke rẹ Antipas oseri mẹ na, ro se vwe gbuyota na, re hweri vwẹ ohri rẹ ovwan na, vwẹ asan rẹ Idẹbono dia na.

¹⁴ Ẹkẹvuọvo mi ji vwo omota me ta kpahe owẹ; kidie wo vwo ihwo ẹvo vwẹ etiyin re yọnre uyono ri Belam, ro yono Balak nọ dia uchukurhe umwemwu kẹ emọ rẹ Izrẹl, nẹ ayen re emu ra vwọ gọ ema rere ayen rhe gbe ọfanrhiẹ.

¹⁵ Ọtiọye rhe ẹvo je yọnre uyono rẹ ihwo ri Nikolia.

¹⁶ Gbe kurhẹriẹ. Ọ dia eriyi-in, mi che bru ovwan rhe nanana ke me cha vwẹ ọlọkọ rẹ unu mẹ vwọ họnre ayen.

¹⁷ Ohwo ro vwo erhọn, e jo nyo obo rẹ Erhi na ta kẹ ishọshi na. Ohwo ro phi kparobọ kẹ me vwẹ mana re sinu rhabae na kẹ, ke mẹ vwẹ ubioragha ọfuanfon kẹ, re si odẹ ọkpokpọ phihọ rẹ ohwo ọfa sa riẹ-ẹn jokpa rẹ ohwo ra vwerọ kẹ ọvo.

Ovuẹ vwo rhe Taetira

¹⁸ Kẹ enẹ o si rhe amakashe rẹ ishọshi ri Taetira; Eta rẹ Ọmọ rẹ Ọghẹnẹ, ro vwo ẹro rọ họhọ ẹkuerhanre, rẹ awọ rọye họhọ ẹrovwo ra fare.

¹⁹ Me riẹn iruo wẹn, ẹguọnọ wẹn kugbe esegbuyota wẹn kugbe ẹga kugbe erhiori vẹ akoechiro, wọ ke rha wian vwẹ ucheke na nọ ọke rẹsosuọ.

²⁰ Ẹkẹvuọvo mi vwo ota re me ta kpahe owẹ, nẹ wo chirako rẹ aye re se Jezibẹl, ro se oma rọye ọmraro o de yono ọ da riẹriẹ idibo mẹ nẹ i gbe ọfanrhiẹ, ọ da nẹrhẹ ayen re emu ra vwọ gọ ema.

²¹ Me vwẹ ọke kẹ nẹ o vwo kurhẹriẹ, ẹkẹvuọvo ọ senre o jẹ ọfanrhiẹ na vwo-o.

²² Nighe, ki mi che vwo shevwerhẹ ehwa rẹ ọga, otu ri bruro kpo ovwerhẹ ejobi ke cha mrẹ ukpokpogho, jokpa nẹ wo kurhẹriẹ.

²³ Emọ rẹ ayen vwẹ ọfanrhiẹ vwiẹ na ki ghwu re. Ishọshi na ejobi ke riẹn nẹ mẹvwẹ re hiẹ iroro kugbe udu, ke me hwa osa kẹ ovwan ọvuọvo kirobo rẹ iruo rẹ ovwan teri.

²⁴ Ẹkẹvuọvo ovwan ihwo ri chekọ vwi Taetira, re yọnrọn uyono nana-a na, re je riẹn obo rẹ otu ẹvo se nẹ emu ikokodo rẹ Idẹbono na-a, ovwan kọye me ta na, mi rhe kru oghwa ọfa nyẹ ovwa-an;

²⁵ umuche ro te ovwan obọ na, wa yọnrọn bẹsiẹ me vwọ rhe.

²⁶ Ohwo ro phi kparobọ rọ yọnre iruo mẹ re te oba, ke me kẹ ogangan vwẹ enu rẹ ẹgborho na,

²⁷ kọ vwẹ ọkpọ rẹ utehru sun ayen, kirobo rẹ ochẹ ghwe ibribro, mrẹmrẹ kirobo rẹ okpuyovwi mẹ je reyọ ogangan mie Ọsẹ mẹ rhe;

²⁸ ke me vwẹ isio rẹ irhiọke kẹ.

²⁹ Ọ ro vwo erhọn, e jo nyo obo rẹ Erhi na ta kẹ ishọshi na.