Ẹsta 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ihwo ri Ju Guọghọ Ivwighrẹ rayen

¹ Asakiephana vwẹ emeranvwe rihwivẹ, rọ dia emeranvwe rẹ Ada, vwẹ ẹdẹ ihwerha rẹ emeranvwe ọvuọvo na, re vwo muegbe ra cha vwẹ urhi rẹ ovie na ru iruo, vwẹ ẹdẹ yena ọvuọvo na rẹ ivwighrẹ rẹ ihwo ri Ju vwo phiẹrophihọ nẹ ayen che phi ivwighrẹn rayen kparobọ na, ẹkẹvuọvo ọ da rhoma kurhẹriẹ kpo ẹdẹ rẹ ihwo ri Ju rhe vwọ kparobọ vwẹ enu rẹ ivwighrẹn rayen.

² Ihwo ri Ju na de rhi koko vwẹ irere rayen vwẹ ubrakpọ ri Ahasuerus rẹ ovie suẹn na, rere ayen rhi shabọ phihọ ihwo re guọnọ ayen teya hwe na. Ohwo ọvuọvo gbi se mudia hẹrhẹ aye-en, fikiridie oshọ rayen mu ihwo na ejobi.

³ Emọ rẹ ivie re ubrakpọ na vẹ ehọnvwọre rọye vẹ isun na vẹ inotu rẹ ovie na je cha ihwo ri Ju uko, fikiridie oshọ ri Modekai mu ayen.

⁴ Kidie Modekai rhe rho vwẹ uwevwi rẹ ovie na, usi rọye de rhi mu wan ubrakpọ na ejobi, fikiridie ohwo na re se Modekai na rhe gan phihọ.

⁵ Ọtiọye na ihwo ri Ju da vwẹ ọlọkọ hwe ivwighẹn rayen ejobi, ayen hwe ayen je ghwọrọ ayen, ayen de ru ihwo rẹ ivun rayen miovwẹ na obo ri jẹ ayen.

⁶ Vwi Susa rẹ otorere na dẹn ihwo ri Ju de hwe ihwo ujori iyori,

⁷ ayen de ji hwe Pashandata vi Dalfọn vẹ Aspata

⁸ vi Porata vẹ Adalia vẹ Aridata

⁹ vi Pamashta vẹ Arisai vẹ Aridai vẹ Vaizata,

¹⁰ emeshare ihwe ri Heman, ọmọshare ri Hamedata, ọvweghrẹn ri Ju na, ẹkẹvuọvo ayen vwẹ obọ te emu-u.

¹¹ Vwẹ ẹdẹ yena dẹn ihwo rẹ hweri vwi Susa rẹ otorere na a da vwẹ ayen nẹ iyẹnre kẹ ovie.

¹² Etiyin ovie na da ta kẹ Ẹsta rẹ aye rẹ ovie, vwi Susa rẹ otorere ihwo ri Ju de hwe ihwo ujori iyori je vwọ ba emeshare ihwe ri Heman. Kidie ayen rhe ru vwẹ ubrakpọ rẹ ovie ri chekọ! Etine na kidie wọ je nọ? A vwọ kẹ wẹ. Die wọ guọnọ ba. E ruo vọn.

¹³ Etiyin Ẹsta da ta, O de jẹ ovie, jẹn ihwo ri Ju ri Susa ru obo rẹ urhi ri nonẹ na tare vwẹ odẹ rọ cha. Gbe jẹn e churu emeshare ihwe ri Heman si ẹtan na.

¹⁴ Ovie na da tanẹ e ru ọnana e de ji urhi vwi Susa, emeshare ri Haman ihwe e de churu ayen si.

¹⁵ Ihwo ri Ju ri Susa da ghwẹ koko vwẹ ẹdẹ ihwẹne rẹ emeranvwe rẹ Ada ayen de hwe ihwo ujori erha vwi Susa; ẹkẹvuọvo ayen vwẹ obọ te emu raye-en.

Orẹ ri Purim

¹⁶ Asakiephana ihwo rẹ Ju rẹ ovie suẹn na da ghwẹ oma koko rere ayen vwọ họnre kẹ oma rayen, rere oma vwo fu ayen vwẹ ohri rẹ ivwighrẹn rayen, ayen de hwe ihwo uriori ujorha gbẹ ihwiori rẹ ihwo ri mu kpahe ayen, ẹkẹvuọvo ayen vwẹ obọ te emu raye-en.

¹⁷ Ọnana kẹ ẹdẹ ihwerha rẹ emeranvwe rẹ Ada vwẹ edẹ ihwẹne ayen de rovwo oma ayen da vwẹ ẹdẹ yena re orẹ vẹ aghọghọ.

¹⁸ Ẹkẹvuọvo ihwo ri Ju ri Susa de koko vwẹ ẹdẹ rihwiori, ayen da vwẹ ẹdẹ yena re orẹ vẹ omavwerhovwẹ.

¹⁹ Fiki rẹ ọtiọye na ihwo ri Ju re hẹ obo ẹko, re dia irho ride na, ayen da yọnre ẹdẹ ihwẹne rẹ emeranvwe rẹ Ada vwo ru ẹdẹ rẹ omavwerhovwẹ vẹ orẹ vẹ omerovwo, vẹ ẹdẹ re ayen vwo kru oghwa rhe ohwohwo.

²⁰ Etiyin Modekai de si imu nana phihọ otọ, ọ da vwẹ ẹbe rhe ihwo ri Ju ejobi re hẹ ubrakpọ rẹ ovie Ahasuerus suẹn, te e re kẹre te iri sheri,

²¹ ji urhi kẹ ayen nẹ ayen yọnre ẹdẹ rihwẹne rẹ emeranvwe rẹ Ada ji te ẹdẹ ihwiori rọye, kukpe kukpe.

²² Ayen reyọ kerẹ ẹdẹ rẹ ihwo ri Ju re vabọ rẹ ivwighrẹn rayen, kerẹ emeranvwe re vwo ku uvwerhe rayen rhẹriẹ phihọ omavwerhovwẹ vẹ omemuohọ vwo kpo omerovwo, rere ayen vwẹ ayen ru ẹdẹ rẹ orẹ vẹ omavwerhovwẹ, ede re vwo kru oghwa rhe ohwohwo vẹ ẹse eruo kẹ igbere.

²³ Ọtiọye na ihwo ri Ju na de ru obo rẹ ayen ruẹ jovwo, kugbe obo ri Modekai si rhe ayen.

²⁴ Kidie Heman rẹ ohwo rẹ Agag, ọmọ ri Hamedata, ọvweghrẹn rẹ ihwo ri Ju ejobi na, ọ jẹn iroro kpahe ihwo ri Ju rọ vwọ guọghọ ayen, o de duvwu itẹ, rẹ o vwo ghwọrọ ayen nẹ otọ na;

²⁵ ẹkẹvuọvo ọke rẹ Ẹsta vwo bru ovie rhe, o de ji urhi re si phihọ otọ nẹ iroro umwemwu rọ jẹ kpahe ihwo ri Ju na da rhoma she nyẹ uyovwi rọye, rere tẹ ọye vẹ emeshare rọye vwo she ẹtan rẹ obọ rọye.

²⁶ Fiki rẹ ọtiọye na ayen de se ẹdẹ yena Utẹ, kirobo re se Itẹ. Fiki rẹ obo re si phihọ ẹbe na, vẹ obo rẹ ayen mrẹre vwẹ ota na, vẹ obo re phia kẹ ayen.

²⁷ Ihwo ri Ju na de vwo mu ayen da rha reyọ kẹ oma rẹ ayen vẹ emọ rayen vẹ ihwo ri kuoma gbẹ ayen, nẹ ayen je ẹdẹ nana ivẹ na eyọnrọ-ọn kirobo re siro re bruro phihọ ọke kukpe kukpe na.

²⁸ Nẹ a karophihọ ẹdẹ nana a me rha yọnrọn ayen vwẹ uvwiẹ kuvwiẹ, vwẹ evwruwevwi kevwruwevwi, ubrakpọ vẹ orere korere, nẹ ẹdẹ rẹ Utẹ na ihwo ri Ju gbe kuẹ-ẹ, yẹrẹ ẹkarophihọ rẹ ẹdẹ nana fue vwẹ evun rẹ uvwiẹ raye-en.

²⁹ Etiyin Ẹsta aye rẹ ovie, ọmọtẹ rẹ Abihail, vẹ Modekai rẹ ohwo ri Ju na da nabọ sio vẹ ogangan, ayen de rhe ru ọbe rivẹ na gan kpahe Utẹ na.

³⁰ A da vwẹ ẹbe rhe ihwo ri Ju ejobi; re hẹ ubrakpọ ujọsan gbẹ ighwrẹn rẹ uvie rẹ Ahasuerus na, vwẹ eta rẹ ufuoma vẹ uyota,

³¹ nẹ ayen yọnrọn ẹdẹ rẹ Utẹ na vwẹ ọke rayen, kirobo ri Modekai rẹ ohwo ri Ju vẹ Ẹsta aye rẹ ovie ji kẹ ihwo ri Ju na, kirobo rẹ ayen ji phihọ otọ vwọ kẹ oma rayen vẹ emọ rayen vwọ kpahe ewẹvwe echiro vẹ omaevwerhe rayen.

³² Urhi rẹ Ẹsta aye re ovie kọye vwẹ irueru rẹ Utẹ na mu, e de sio phihọ otọ.