Ẹsta 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A gba Heman mu ọghọ kẹ Modekai

¹ Vwẹ ason yena ovie na gbẹ sa vwerhẹ-ẹ, ọ da tanẹ a reyọ ẹbe rẹ ekarohọ rẹ uruemu esiri na rhe, ẹbe rẹ ikun na, e de se ayen kẹ ovie.

² A da mrẹ obo re siri, ri Modekai ta kpahe Bigtan kugbe Teresh, ivẹ vwẹ eghwara rẹ ovie na, re rhẹrẹ anurhoro na, e rẹ guọnọ ovie Ahasuerus hwe.

³ Etiyin ovie na da ta, Didi ọghọ yẹrẹ ọrho a vwọ kẹ Modekai fiki rẹ ọnana? Idibo rẹ ovie re ga da ta, E ji ru emu ọvuọvo kẹ-ẹ.

⁴ Etiyin ovie da ta, Ono re hẹ ọguan na? Vwẹ ọke yena Heman ghwa rua ọguan rẹ uphephẹ rẹ ighẹn rẹ ovie na rọ cha vwọ ta kẹ ovie na nẹ e rhi churu Modekai si etan rọ rhuẹrẹ phihọ kẹ na.

⁵ Etiyin idibo rẹ ovie na da ta kẹ, Heman etiyin, o mudia vwẹ evun rẹ oguan na. Ovie na da ta, Jọ ro uwevwi.

⁶ Etiyin Heman da ro uwevwi, ovie na da ta kẹ, Didi emu e ru kẹ ohwo rẹ ovie guọnọ mu ọghọ kẹ?

⁷ Etiyin Heman da ta kẹ ovie na, vwọ kẹ ohwo rẹ ovie guọnọ mu ọghọ kẹ,

⁸ e jẹn a reyọ edagba rẹ ovie rhe, e rẹ ovie ghware na, kugbe iyesi rẹ ovie gua na, vẹ erhu rẹ ovie vwo tughẹ na,

⁹ ra vwẹ edagba na vẹ iyesi na vwọ hẹ obọ rẹ ọhọnvwọre ọvo rọ ma rho vwẹ isun na, e gbe jọ rhuẹrẹ ohwo rẹ ovie guọnọ mu ọghọ kẹ na oma, wọ mi rhe jo suo ohwo na vwẹ enu rẹ iyesi na wan ọsuere re orere na, yẹ o ghwoghwo vwẹ obaro rọye. Ọtiọna e ru kẹ ohwo rẹ ovie guọnọ mu ọghọ kẹ.

¹⁰ Etiyin ovie na da ta kẹ Heman, Jọphẹre, reyọ edagba na vẹ iyesi na, kirobo rẹ wọ tare na, wo ru ọtiọye kẹ Modekai ohwo ri Ju na ro tidia anurhoro rẹ ovie na. Wo jẹn emu ri wo keri na ọvuọvo no-o.

¹¹ Etiyin Heman da reyọ edagba na vẹ iyesi na, ọ da rhuẹrẹ Modekai oma ọ da vwọ gua wan ọsuere rẹ orere na yo ghwoghwo, Ọtiọna e ru kẹ ohwo rẹ ovie guọnọ mu ọghọ kẹ.

¹² Etiyin Modekai de hirhe kpo anurhoro rẹ ovie. Ẹkẹvuọvo Heman da họrhọ kpo uwevwi rọye, vẹ omaemuohọ vẹ uyovwi ro rhurhuru.

¹³ Heman da ta kẹ aye rọye re se Zẹrẹsh vẹ igbeyan rọye emu ejobi re phia kẹ. Etiyin evwaghwanre rọye vẹ aye rọye Zẹrẹsh da ta kẹ, Ọ da dia nẹ Modekai, ọ ru wo she vwẹ obaro rọye na, da dia ohwo ri Ju yu wo che se ruo emuọvo-o, ẹkevuọvo wo che she kẹ.

¹⁴ Rẹ ayen vwo nene ta ota na, eghwanre rẹ ovie na da rhe kpakpẹ Heman vwo kpo ẹriọ rẹ emu rẹ Ẹsta cheri na.